کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

’غیر آئینی اقدام پر آئین کا آرٹیکل چھ لاگو ہوتا ہے‘

پنجاب اسمبلی میں قائد حزبِ اختلاف حمزہ شہباز شریف کا کہنا ہے کہ عدم اعتماد کی تحریک جمع ہو جائے تو وزیرِ اعظم قومی اسمبلی نہیں توڑ سکتے۔ انہوں نے غیر آئینی اقدام کیا ہے جس پر آئین کا آرٹیکل چھ لاگو ہوتا ہے۔

تحریک انصاف کے منحرف رہنما علیم خان اور دیگر ارکان اسمبلی کے ہمراہ میڈیا سے گفتگو کرتے ہوئے حمزہ شہباز کا کہنا تھا کہ پرویز الہی تحریک انصاف کے ووٹ سے اسپیکر منتخب ہوئے تھے۔ اب ان کے ووٹ پورے نہیں ہو رہے تو ان کو یہ ارکان اسمبلی برے لگ رہے ہیں۔

سپریم کورٹ میں قومی اسمبلی کی کارروائی کے حوالے سے سماعت پر انہوں نے کہا کہ عدالت سے امید ہے کہ اچھا فیصلہ ہوگا اور اس سے آئین و قانون کو تقویت ملے گی۔

’کوئی حکومتی ادارہ غیر آئینی حرکت نہیں کرے گا‘

پاکستان میں جاری سیاسی صورتِ حال پر سپریم کورٹ نے تمام سیاسی جماعتوں کو حکم دیا ہے کہ وہ امن برقرار رکھیں۔ عدالت نے کہا ہے کہ کوئی حکومتی ادارہ غیر آئینی حرکت نہیں کرے گا۔ عدالتی کارروائی کی مزید تفصیلات بتا رہے ہیں ہمارے نمائندے عاصم علی رانا۔

سیاسی صورتِ حال پر از خود نوٹس؛ سپریم کورٹ کا لارجر بینچ تشکیل

پاکستان کی سپریم کورٹ نے موجودہ سیاسی صورتِ حال پر ازخود نوٹس پر لارجر بینچ تشکیل دینے کا فیصلہ کیا ہے۔

چیف جسٹس عمر عطا بندیال کی سربراہی میں پانچ رکنی بینچ پیر کو دن ایک بجے اس نوٹس کی سماعت کرے گا۔

قبل ازیں اتوار کو تین رکنی بینچ نے اس معاملے کی سماعت کی تھی۔

سپریم کورٹ نے آرٹیکل 63-اے کی تشریح کے معاملے کی سماعت مؤخر کر دی ہے۔

عمران خان کا غیر جمہوری عمل کوئی سرپرائز نہیں ہے: بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ عمران خان کا غیر جمہوری عمل ان کے لیے کوئی سرپرائز نہیں ہے بلکہ آج جو ہوا وہ وزیرِ اعظم کی اقتدار پر قابض رہنے کی کوشش تھی۔ انہوں نے وزیرِ اعظم اور اسپیکر قومی اسمبلی پر آرٹیکل چھ کا مقدمہ چلانے پر بھی زور دیا۔ اپوزیشن عمران خان کی حکومت کی مدت ختم ہونے سے صرف ڈیڑھ سال قبل تحریکِ عدم اعتماد کیوں لائی اور اب حزبِ اختلاف کی کیا حکمتِ عملی ہوگی؟ جانتے ہیں بلاول بھٹو کی وائس آف امریکہ کی سارہ حسن سے گفتگو میں۔