کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

ہم ہر نتیجے کے لیے تیار ہیں: شاہ محمود قریشی

وزیرِ خارجہ شاہ محمود قریشی نے کہا ہے کہ وہ ہر نتیجے کے لیے تیار ہیں۔ انہیں ذمے داری دی گئی ہے کہ وہ تحریک انصاف کا اور عمران خان کا مؤقف اسمبلی میں پیش کریں۔

اسپیکر اسد قیصر کی زیرِ صدارت قومی اسمبلی کا اجلاس شروع

قومی اسمبلی کا اجلاس اسپیکر اسد قیصر کی صدارت میں شروع ہو گیا ہے۔

ایوان میں اپوزیشن ارکان کی بڑی تعداد موجود ہے تاہم حکومتی بینچز پر معمول سے کم ارکان براجمان ہیں۔

ایوان کی کارروائی سپریم کورٹ کے حکم کے مطابق چلائی جائے: شہباز شریف

قائدِ حزبِ اختلاف شہباز شریف نے قومی اسمبلی کا اجلاس شروع ہونے پر اظہار خیال کرتے ہوئے اسپیکر سے اپیل کی کہ وہ سپریم کورٹ کے حکم کے مطابق ہاؤس کی کارروائی چلائیں۔

انہوں نے کہا کہ آج پارلیمان ایک نئی تاریخ رقم کرنے جا رہا ہے۔ پارلیمان آئینی و قانونی طریقے سے سلیکٹڈ وزیرِ اعظم کو شکست فاش دینے جا رہا ہے۔

شہباز شریف نے اسپیکر اسد قیصر کو مخاطب کرتے ہوئے کہا کہ "میں یہ کہنا چاہتا ہوں کہ خدارا آپ آج آئین اور قانون اور عدالتی عظمیٰ کے فیصلے کے لیے کھڑے ہو جائیں اور اسپیکر کا کردار ادا کر کے تاریخ میں اپنا نام سنہری حروف میں لکھوا دیں۔ آپ سلیکٹڈ وزیرِ اعظم کی ڈکٹیشن پر نہ چلیں۔"

اپوزیشن لیڈر نے کہا کہ پاکستان کی تاریخ میں جمعرات کا دن تاریخی تھا جب سپریم کورٹ نے آپ کے، عمران خان کے اور ڈپٹی اسپیکر کے اقدام کو غیر آئینی قرار دیا اور نظریہ ضرورت کو ہمیشہ کے لیے دفن کرتے ہوئے پاکستان کا مستقبل تابناک بنا دیا۔

چاہتے ہیں قومی اسمبلی میں عالمی سازش پر بھی بات ہو: اسپیکر

اپوزیشن لیڈر شہباز شریف کی تقریر کے دوران اسپیکر اسد قیصر نے کہا کہ سپریم کورٹ کے حکم میں بیرونی سازش کا ذکر نہیں اور وہ چاہتے ہیں کہ قومی اسمبلی میں عالمی سازش پر بھی بات ہو۔

اس موقع پر قائدِ حزبِ اختلاف نے اسپیکر کو کہا کہ آپ عالمی سازش کی بات کریں گے تو بات دور تک جائے گی اور سپریم کورٹ کے فیصلے کی حکم عدولی ہو گی۔ جس پر اسپیکر اسد قیصر نے کہا کہ جو عدالت کا فیصلہ ہے اس پر عمل ہو گا۔