وزیرِ اعظم عمران خان کے خلاف تحریکِ عدم اعتماد کامیاب
وزیرِ اعظم عمران خان کے خلاف تحریکِ عدم اعتماد کامیاب ہو گئی ہے۔ 174 اراکینِ قومی اسمبلی نے قرارداد کی حمایت میں ووٹ دیے۔ تحریکِ عدم اعتماد کی کارروائی شروع ہونے سے قبل ہی تحریکِ انصاف کے اراکینِ قومی اسمبلی ایوان سے واک آؤٹ کر گئے۔
کسی سے بدلہ نہیں لیں گے، قانون اپنا راستہ خود بنائے گا: شہباز شریف
عمران خان کے خلاف تحریکِ عدم اعتماد کی کامیابی کے بعد قومی اسمبلی میں اظہارِ خیال کرتے ہوئے متحدہ اپوزیشن کے نامزد قائدِ ایوان شہباز شریف نے کہا کہ آج پاکستان میں ایک نئی صبح کا آغاز ہو گا۔
اُن کا کہنا تھا کہ وہ کسی سے بدلہ نہیں لیں گے بلکہ قانون اپنا راستہ خود بنائے گا۔ کسی کو جیلوں میں نہیں ڈالیں گے اور نہ ہی کسی سے ناانصافی کریں گے۔
شہباز شریف کا کہنا تھا کہ وہ آج کی اس کامیابی پر متحدہ اپوزیشن کے قائدین کو سلام پیش کرتے ہیں جنہوں نے اتحاد اور نظم و ضبط کا مظاہرہ کیا جس کی پاکستان کی تاریخ میں کم ہی مثال ملتی ہے۔
شہباز شریف کا کہنا تھا کہ یہ اتحاد پاکستان کو ایک نئے سفر پر گامزن کرے گا۔
ویلکم بیک ٹو پرانا پاکستان: بلاول بھٹو زرداری
قومی اسمبلی میں وزیرِ اعظم عمران خان کے خلاف تحریکِ عدم اعتماد کامیاب ہونے کے بعد اپنے خطاب میں چیئرمین پیپلزپارٹی بلاول بھٹو زرداری نے کہا کہ جمہوریت بہترین انتقام ہے۔
اُن کا کہنا تھا کہ ویلکم بیک ٹو پرانا پاکستان۔
فخر ہے کہ عمران خان نے حکومت کی قربانی دی لیکن کسی کی غلامی منظور نہیں کی: علی محمد خان
وزیرِ اعظم عمران خان کے خلاف تحریکِ عدم اعتماد کی کامیابی کے بعد اظہارِ خیال کرتے ہوئے تحریکِ انصاف کے رہنما علی محمد خان نے کہا ہے کہ یہ عارضی شکست ہے۔ عمران خان دو تہائی اکثریت سے دوبارہ اقتدار میں آئیں گے۔
علی محمد خان کا کہنا تھا کہ روس صرف بہانہ ہے عمران اصل نشانہ ہے۔
اُن کا کہنا تھا کہ اُنہیں فخر ہے کہ میرا لیڈر جھکا نہیں اور بکا نہیں اور آخری گیند تک ڈٹا رہا۔
علی محمد خان کا کہنا تھا کہ بہت جلد عمران خان عوام کی طاقت سے اسی کرسی پر دوبارہ براجمان ہوں گے۔
علی محمد خان کا کہنا تھا کہ آج بھی پاکستان میں کچھ لوگ ایسے ہیں جو سامراج اور امریکہ کے سامنے کھڑے ہیں۔