کرونا وائرس نے پاکستانی معیشت پر کیا اثرات چھوڑے؟
پاکستان کی معیشت کی حالت پہلے ہی خستہ تھی لیکن کرونا بحران میں اس کا حجم مزید کم ہو گیا ہے۔ ماہر اقتصادیات اور جنرل پرویز مشرف کی حکومت میں وفاقی مشیر رہنے والے ڈاکٹر اشفاق حسن بتا رہے ہیں کہ پاکستان کی معیشت اب کہاں کھڑی ہے اور آنے والے وقت میں کیا امکانات ہیں؟
فرانس: پولیس کی پارٹی منعقد کرنے والوں کے خلاف کارروائی
فرانس کی پولیس نے کرونا وائرس کے باعث عائد پابندیوں کے باوجود شمال مغربی علاقے میں نیو ایئر نائٹ سے جاری پارٹی کو ختم کرا دیا۔ جس میں لگ بھگ دو ہزار افراد شریک تھے۔
پولیس کے مطابق ایک غیر استعمال شدہ ویئر ہاؤس میں جاری پارٹی میں شریک افراد میں سے چند افراد نے پولیس کے ساتھ ہاتھا پائی بھی کی۔
فرانس کے وزیرِ داخلہ گیرلڈ ڈرمانین کا ٹوئٹ میں کہنا تھا کہ پارٹی میں شریک افراد پر جرمانے عائد کر دیے گئے ہیں اور پارٹی کے منتظمین کی شناخت کی جا رہی ہے۔ جن کے خلاف بعد ازاں قانونی کارروائی کی جائے گی۔
واضح رہے کہ فرانس میں کرونا وبا پھوٹنے کے بعد سے دو بار لاک ڈاؤن نافذ کیا جا چکا ہے اور حال ہی میں لگایا جانے والا لاک ڈاؤن دسمبر کے وسط میں ختم کیا گیا تھا۔ تاہم ریستوران اور بارز ابھی بھی بند ہیں۔
کرونا کا یہ مطلب نہیں کہ تخلیقی صلاحیتوں پر بھی لاک ڈاؤن ہو
کرونا کی وبا کے دوران ایک امریکی ٹیچر نے اسکول سے دور ہونے کی وجہ سے پڑھائی کو دلچسپ بنانے کا ایک منفرد طریقہ نکالا اور اپنا کلاس روم درختوں میں لے گئیں۔ 'ٹری ہاؤس' کی تخلیق ان کی اس سوچ کی عکاس ہے کہ کرونا کی پابندیوں کا یہ مطلب نہیں کہ تخلیقی صلاحیتوں پر بھی لاک ڈاؤن ہو۔
عوام کرونا ویکسین سے متعلق افواہوں پر یقین نہ کریں: بھارتی حکام
بھارت کے وزیرِ صحت ہرش وردھن نے عوام سے اپیل کی ہے کہ وہ کرونا ویکسین سے متعلق افواہوں پر یقین نہ کریں۔ ویکسین پورے ملک میں مفت لگائی جائے گی۔
ہرش وردھن کا کرونا ویکسین لگائے جانے کی آزمائشی عمل کے موقع پر صحافیوں سے گفتگو میں کہنا تھا کہ کرونا ویکسین کا مقصد حفاظت اور افادیت کو یقینی بنانا ہے۔ ان کے بقول اس سے متعلق کسی قسم کا سمجھوتہ نہیں کیا جائے گا۔
خیال رہے کہ بھارت میں 'آسٹرا زینیکا' اور 'آکسفرڈ یونیورسٹی' کی تیار کردہ کرونا ویکسین فیز-ون میں 3 کروڑ لوگوں کو لگائے جانے کا عمل آئندہ چند دن میں شروع ہونے جا رہا ہے۔
آسٹرا زینیکا کی تیار کردہ کرونا ویکسین کو جمعے کو ہنگامی حالات میں لگائے جانے کی منظوری دی گئی تھی۔
بھارت دنیا بھر میں امریکہ کے بعد اس وبا سے سب سے زیادہ متاثرہ ملک ہے۔ جہاں اب تک ایک کروڑ دو لاکھ سے زائد افراد متاثر اور ایک لاکھ 48 ہزار سے زائد اموات رپورٹ کی گئی ہیں۔