جو بائیڈن کو ویکسین کی دوسری ڈوز دے دی گئی
امریکہ کے نو منتخب صدر جو بائیڈن کو کرونا وائرس سے بچاؤ کی ویکسین کی دوسری خوراک بھی دے دی گئی ہے۔
پیر کو ریاست ڈیلاویئر کے کرسٹینا اسپتال میں ان کے بازو پر ویکسین کے دوسری ڈوز انجیکشن کی صورت دی گئی۔
ان کو ویکسین دینے کے عمل کو براہ راست بھی دکھایا گیا تاکہ شہروں کو یہ باور کرایا جا سکے کہ ویکسین محفوظ ہے۔
واضح رہے کہ امریکہ میں شہریوں کو ویکسین دینے کا عمل شروع ہو چکا ہے البتہ یہ عمل انتظامیہ کی منصوبہ بندی کے مطابق انجام نہیں دیا جا سکا ہے۔
امریکہ میں جو بائیڈن کی انتقالِ اقتدار کی ٹیم منصوبہ بندی کر رہی ہے کہ زیادہ سے زیادہ شہریوں کو ویکسین کی پہلی خوراک دی جا سکے۔
چین میں مزید شہروں میں لاک ڈاؤن، شہریوں کو ایک ہفتہ گھر میں رہنے کی ہدایت
چین نے کرونا وائرس کے پھیلاؤ کے باعث لاک ڈاؤن کو مزید وسعت دی ہے اور مزید شہروں میں لوگوں کو گھروں میں رہنے کی ہدایت کی ہے۔
خبر رساں ادارے 'ایسوسی ایٹڈ پریس' کے مطابق حکام نے دارالحکومت بیجنگ کے قریب واقع شہر گوان کے رہنے والوں کے لیے احکامات جاری کیے ہیں کہ وہ ایک ہفتے تک گھروں میں رہیں۔ احکامات کا اطلاق منگل سے ہونے جا رہا ہے۔
اسی طرح کے احکامات ووہان کے شہریوں کو بھی گزشتہ برس دیے گئے تھے۔ صوبہ ہوبی کے شہر ووہان سے ہی کرونا وائرس کا آغاز ہوا تھا جس کے بعد 76 روز تک شہریوں کو گھروں میں رہنے کا حکم دیا گیا تھا۔
ہوبی میں صوبائی 'پیپلز کانگریس' کا انعقاد فروری میں ہونا تھا لیکن اسے بھی ملتوی کر دیا گیا ہے۔ یہ واضح نہیں کہ یہ سیاسی اجتماع کب منعقد ہوگا۔
صوبہ ہوبی ہیلتھ کمیشن نے منگل کے روز بتایا کہ صوبے میں 40 کیسز رپورٹ ہوئے ہیں جن میں سے ایک کیس صوبائی دارالحکومت شیجیاژوانگ میں بھی سامنے آیا ہے۔ یہ شہر بیجنگ کے جنوب میں ہے جہاں کے شہریوں کو گھروں میں رہنے کی ہدایت کی گئی ہے اور تمام بین الاصوبائی ٹرانسپورٹ کو بھی معطل کر دیا گیا ہے۔
امریکہ کی 'جان ہاپکنز یونیورسٹی' کے اعداد و شمار کے مطابق چین میں اب تک لگ بھگ 97 ہزار افراد وبا سے متاثر ہوئے ہیں۔ جبکہ وبا سے 4739 اموات ہوئی ہیں۔
بھارت: شہروں کو ویکسین کی ترسیل کا عمل شروع
بھارت کی حکومت نے مختلف شہروں کو کرونا کے انسداد کی ویکسین کی ترسیل شروع کر دی ہے۔
خبر رساں ادارے 'ایسوسی ایٹڈ پریس' کی رپورٹ کے مطابق سیرم انسٹیٹیوٹ آف انڈیا تیار کی گئی ویکسین کی ترسیل کا آغاز منگل کو پونے شہر سے کیا گیا۔
سیرم انسٹیٹیوٹ کی تیار کردہ ویکسین کو مخصوص درجۂ حرارت والے ٹرکوں کے ذریعے ہوائی اڈوں تک پہنچایا جا رہا ہے۔ بعد ازاں ان کو نجی طیاروں کے ذریعے شہروں کو فراہم کیا جائے گا۔
سول ایوی ایشن کے وزیر ہردیپ سنگھ نے ویکسین کے مقررہ مقامات تک پہنچانے کے عمل کو 'اہم ترین مشن' قرار دیا ہے۔
بھارت میں چار دن بعد ملک بھر کے ڈاکٹرز، نرسز اور دیگر طبی عملے کو ویکسین دینے کا آغاز ہو رہا ہے۔ پہلے مرحلے میں تین کروڑ افراد کو ویکسین کے انجیکشن لگائے جائیں گے۔
دوسرے مرحلے میں 27 کروڑ افراد کو ویکسین دی جائے گی جن میں 50 برس سے زائد عمر کے افراد اور وہ مریض شامل ہیں جن کی حالت تشویشناک ہونے کا اندیشہ ہے۔
سیرم انسٹیٹیوٹ کی تیار گئی ویکسین کو 'کوی شیلڈ' کا نام دیا گیا ہے۔ یہ ویکسین بنیادی طور پر آکسفورڈ یونیورسٹی اور آسترازنیکا نے بنائی ہے۔
پاکستان میں مزید 41 افراد ہلاک، مجموعی اموات 10 ہزار 700 سے متجاوز
پاکستان میں کرونا وائرس سے اموات 10 ہزار 717 ہو گئی ہیں۔
سرکاری اعداد و شمار کے مطابق ملک بھر میں گزشتہ 24 گھنٹوں کے دوران مزید 41 افراد ہلاک ہوئے ہیں جس کے بعد اموات 10 ہزار 7 سو سے تجاوز کر گئی ہیں۔
واضح رہے کہ پاکستان میں وبا سے پہلی لہر میں ابتدائی اموات گزشتہ برس فروری کے وسط میں ہوئی تھیں۔ بعد ازاں مئی کے اختتام سے جولائی کے وسط تک ہلاکتوں کی شرح بلند رہی۔ اس کے بعد اموات میں کمی آ گئی تھی۔
وبا کی دوسری لہر میں نومبر کے اختتام سے ایک بار پھر ہلاکتوں میں اضافہ ہوا۔ سب سے زیادہ یومیہ 111 اموات ہلاکتیں 23 دسمبر کو تھیں۔ اب بتدریج ہلاکتوں میں کمی آئی ہے لیکن اموات کی شرح ستمبر اور اکتوبر کے مقابلے میں بلند ہے۔