امریکہ میں ایک کروڑ افراد کی کرونا ویکسی نیشن لگا دی گئی
امریکہ میں شہریوں کو کرونا سے بچاؤ کے لیے ویکسین لگانے کا عمل جاری ہے اور اب تک ایک کروڑ سے زائد امریکیوں کو ویکسین لگا دی گئی ہے۔
خبر رساں ادارے 'رائٹرز' کے مطابق امریکہ میں صحتِ کے نگران ادارے سینٹر فار ڈیزیز کنٹرول (سی ڈی سی) نے تصدیق کی ہے کہ ایک کروڑ امریکیوں کو ویکسین کی پہلی خوراک لگائی جا چکی ہے۔
امریکہ میں ویکسین لگانے کا عمل ابتداً سست روی کا شکار تھا، کیوں کہ پہلے صرف طبی عملے کو ہی ترجیحاً ویکسین لگانے کا فیصلہ کیا گیا تھا جس کے بعد ٹرمپ انتظامیہ نے ریاستوں کو ہدایت کی تھی کہ وہ 65 سال سے زائد عمر کے ہر فرد کو ویکسین لگا سکتے ہیں۔
امریکی ریاست کیلی فورنیا نے اس ہدایت نامے کے بعد پہل کرتے ہوئے 65 سال سے زائد عمر کے افراد کو ویکسین لگانے کا عمل شروع کر دیا ہے۔ ریاستی گورنر کا کہنا ہے کہ ریاست میں ایسے 66 لاکھ افراد کا ڈیٹا مرتب کر لیا گیا ہے جو 65 سال سے زائد ہیں۔
امریکہ میں حکام اس توقع کا اظہار کر رہے ہیں کہ 65 سال سے زائد عمر کے افراد کو ویکسین لگانے کی اجازت ملنے کے بعد ویکسی نیشن مہم میں مزید تیزی آئے گی۔
چین میں 8 ماہ بعد کرونا وائرس سے پہلی ہلاکت
چین میں آٹھ ماہ بعد جمعرات کو کرونا وائرس کا ایک مریض ہلاک ہو گیا ہے۔ مرنے والے سے متعلق تفصیلات نہیں بتائی گئیں البتہ صرف اتنا بتایا گیا ہے کہ یہ واقعہ صوبہ ہیبی میں پیش آیا ہے۔
چین میں گزشتہ سال مئی کے بعد سے کرونا وائرس سے ایک بھی ہلاکت سامنے نہیں آئی تھی۔ لیکن حکام کی جانب سے جمعرات کو ایک مریض کی ہلاکت کی تصدیق کی گئی ہے۔
حالیہ چند ہفتوں کے دوران چین میں رپورٹ ہونے والے یومیہ کیسز کی تعداد میں بھی مسلسل اضافہ ہو رہا ہے۔
چین کے نیشنل ہیلتھ کمیشن کے مطابق جمعرات کو مزید 138 افراد میں کرونا وائرس کی تشخیص ہوئی ہے۔
جمعرات کو رپورٹ ہونے والے کیسز کی تعداد گزشتہ سال مارچ کے بعد ایک روز میں سامنے آنے والی سب سے بڑی تعداد ہے۔
پاکستان میں مزید 46 اموات، تین ہزار سے زیادہ کیسز رپورٹ
پاکستان میں کرونا وائرس سے گزشتہ چوبیس گھنٹوں کے دوران 46 اموات اور تین ہزار 97 افراد میں وائرس کی تشخیص ہوئی ہے۔
سرکاری اعداد و شمار کے مطابق پاکستان میں عالمی وبا سے ہلاکتوں کی مجموعی تعداد 10 ہزار 818 ہو چکی ہے جب کہ اب تک پانچ لاکھ گیارہ ہزار سے زیادہ کیسز رپورٹ ہو چکے ہیں۔
حکام کے بقول گزشتہ چوبیس گھںٹوں میں صحت یاب ہونے والے مریضوں کی تعداد 2284 ہے اور اب تک چار لاکھ 67 ہزار سے زیادہ مریض صحت یاب ہو چکے ہیں۔
پاکستان میں کرونا کے شکار 2410 مریضوں کی حالت تشویش ناک بتائی جاتی ہے۔
حکام کا کہنا ہے کہ مزید 41 ہزار سے زیادہ افراد کے گزشتہ چوبیس گھنٹوں میں ٹیسٹ کیے گئے جب کہ ٹیسٹوں کی مجموعی تعداد 72 لاکھ 43 ہزار سے زیادہ ہے۔
کرونا وائرس نے کس طرح جنم لیا؟ تحقیقات کے لیے عالمی ادارۂ صحت کی ٹیم چین میں موجود
عالمی ادارۂ صحت (ڈبلیو ایچ او) کی 10 رکنی ٹیم جمعرات کو کرونا وائرس کے جنم سے متعلق تحقیقات کے لیے چین پہنچ گئی ہے۔
کرونا وائرس کا پہلا کیس 2019 میں چین کے شہر ووہان میں سامنے آیا تھا۔ عالمی ادارۂ صحت کی تحقیقاتی ٹیم کی چین آمد کا مقصد وبائی مرض سے متعلق حساس معلومات اکٹھی کرنا ہے۔
تحقیقاتی ٹیم کے سربراہ پیٹر بین ایمبارک کا کہنا ہے کہ اُن کی ٹیم کام کا آغاز کرنے سے قبل دو ہفتے تک قرنطینہ میں رہے گی جس کے بعد مختلف مقامات کا دورہ کرے گی۔
پیٹر بین کے بقول مختلف علاقوں کے دورے کے موقع پر چینی ہم منصب بھی اُن کے ہمراہ ہوں گے۔
عالمی ادارۂ صحت کی ٹیم چین ایسے وقت پہنچی ہے جب گزشتہ برس مئی کے بعد سے پہلی مرتبہ چین میں کرونا سے ایک شخص کی ہلاکت رپورٹ ہوئی ہے۔
حکام نے مرنے والے شخص سے متعلق تفصیلات نہیں بتائیں البتہ صرف اتنا بتایا گیا ہے کہ یہ واقعہ صوبہ ہیبی میں پیش آیا ہے۔