امریکہ میں کرونا وائرس سے اموات چار لاکھ سے متجاوز
امریکہ کی جان ہاپکنز یونیورسٹی کے اعداد و شمار کے مطابق ملک بھر میں کرونا وائرس سے اموات کی مجموعی تعداد چار لاکھ سے تجاوز کر گئی ہے۔
دارالحکومت واشنگٹن ڈی سی کے لنکن میموریل پر اس مہلک وبا کے ہاتھوں جان کی بازی ہارنے والوں کی یاد میں منگل کی شام ایک تقریب کا بھی اہتمام کیا گیا۔
اس موقع پر منتخب صدر جو بائیڈن نے اپنے مختصر بیان میں کہا ہے کہ بعض اوقات یاد کرنا ایک مشکل امر ہوتا ہے، لیکن اسی طرح زخم بھرتے ہیں۔ بحیثیت قوم ایسا کرنا اہم ہے۔
اسی طرح کاملا ہیرس نے کہا ہے کہ کئی ماہ سے ہم سب افسردہ ہیں۔ لیکن ہم سب مل جل کر ایک دوسرے کا دُکھ بانٹنے کے لیے متحد ہیں۔
جاپان نے کرونا ٹیسٹ کرنے والے روبوٹ تیار کر لیے
جاپان کے وزیرِ صحت نے منگل کو ایسے روبوٹس کے پہلے نمونوں کا معائنہ کیا جو ایک مصنوعی بازو کے ذریعے مریض کی ناک کے اندر سے کرونا ٹیسٹ کے نمونے حاصل کرے گا اور 80 منٹ کے اندر نتیجہ دے دے گا۔
یہ روبوٹ کاواساکی ہیوی انڈسٹریز نے بنایا ہے اور جاپان رواں برس اولمپکس سے پہلے کرونا وبا کو کنٹرول کرنے کے لیے دیگر اقدامات کے علاوہ کرونا ٹیسٹ میں تیزی لانا چاہتا ہے۔
یہ روبوٹ سسٹم شپنگ کنٹینرز کے ذریعے ٹرکوں پر لاد کر کھیل کے میدانوں، پارکوں اور دوسرے ایسے مقامات پر پہنچائے جا سکتے ہیں جہاں بڑے اجتماعات متوقع ہوں اور کم وقت میں بڑی تعداد میں کرونا ٹیسٹ کرنے ہوں۔
وزیر صحت نوریہیشا تامورا نے صحافیوں سے بات کرتے ہوئے کہا کہ ہمیں دنیا بھر میں ردعمل دیکھنا چاہیے۔ ہمیں ٹیسٹوں کی تعداد میں اضافہ کرنا چاہیے۔
ورچوئل ریئلٹی: کرونا وبا کے دور میں تربیت کا بہترین ذریعہ
کرونا وائرس کی عالمی وبا کی وجہ سے جب بہت سے لوگوں کے دفاتر ان کے گھروں میں ہی منتقل ہو گئے تو کاروبار مالکان اور مینیجرز کو نئے چیلنج کا سامنا ہوا۔یہ چیلنج تھا اپنے نئے اور پرانے ملازمین کی ٹریننگ کا۔ لیکن اس مسئلے سے نمٹنے کے لیے اب 'ورچوئل ریئلٹی' ٹیکنالوجی کی مدد لی جا رہی ہے۔
پاکستان میں 91 فی صد متاثرہ افراد صحت یاب، سات فی صد زیرِ علاج
پاکستان میں کرونا وائرس سے متاثر ہونے والے افراد میں سے 91 فی صد صحت یاب، دو فی صد ہلاک جب کہ لگ بھگ سات فی صد زیرِ علاج ہیں۔
پاکستان میں کرونا وائرس سے گزشتہ 24 گھنٹوں میں مزید 1772 افراد متاثر ہوئے ہیں جس کے بعد متاثرہ افراد کی مجموعی تعداد 5 لاکھ 24 ہزار سے زائد ہو گئی ہے۔ جن میں سے 11ہزار 103 افراد ہلاک جب کہ 4 لاکھ 78 ہزار سے زائد صحت یاب ہو چکے ہیں۔
سرکاری اعداد و شمار کے مطابق پاکستان میں اب بھی 35 ہزار 163 افراد زیرِ علاج ہیں۔ جن میں سے 2368 مریض انتہائی نگہداشت میں ہیں۔
حکام کے مطابق ملک بھر میں اب تک 74 لاکھ 84 ہزار ٹیسٹ کیے جا چکے ہیں۔