پاکستان میں مزید 47 اموات
پاکستان میں کرونا وائرس سے مزید 47 افراد ہلاک ہوئے ہیں جس کے بعد اموات کی مجموعی تعداد 11 ہزار 204 ہو گئی ہے۔
حکام کے مطابق پاکستان میں اکتوبر کے آخری دنوں میں کرونا وائرس کی دوسری لہر کے آغاز سے ہلاکتوں میں اضافہ ہونا شروع ہوا ہے۔ دسمبر میں اموات کی شرح کافی بلند رہی۔ البتہ رواں ماہ اس میں کسی حد تک کمی آئی ہے۔
پاکستان میں رواں ماہ یومیہ اموات کی تعداد 40 سے 50 کے درمیان رہی ہے۔ واضح رہے کہ گزشتہ برس اگست کے وسط سے اکتوبر تک یومیہ اموات کی تعداد 10 سے کم ہو گئی تھی۔
صدر بائیڈن کے کرونا بحران سے نمٹنے کے لیے نئے احکامات پر دستخط
امریکہ کے صدر جو بائیڈن نے کرونا بحران سے نمٹنے کے لیے نئے احکامات جاری کر دیے ہیں جس کے تحت مسافروں کے لیے ماسک پہننا لازم قرار دیا گیا ہے۔
وائٹ ہاؤس میں جمعرات کو صحافیوں کے سامنے صدر بائیڈن نے کرونا وائرس کے انسداد کے لیے 198 صفحات پر مشتمل منصوبے پر دستخط کیے۔ اس موقع پر نائب صدر کاملا ہیرس اور کرونا وائرس پر صدر بائیڈن کے مشیر ڈاکٹر انتھونی فاؤچی بھی موجود تھے۔
صدر بائیڈن کے منصوبے کے تحت بیرونِ ملک سے امریکہ سفر کرنے والے ہر مسافر کو ثابت کرنا ہو گا کہ اس کا کرونا ٹیسٹ منفی ہے۔
اسی طرح اندرونِ ملک چلنے والی پروازوں، بسوں اور ٹرینوں میں سفر کرنے والے افراد پر ماسک پہننے کو لازمی قرار دیا گیا ہے۔
امریکہ میں گزشتہ ہفتے مزید 9 لاکھ افراد بے روزگار ہو گئے
امریکہ میں بے روزگاری الاؤنس لینے والوں کی تعداد بدستور بڑھ رہی ہے۔ حکام کے مطابق گزشتہ ہفتے الاؤنس لینے والوں کی تعداد میں مزید اضافہ ہوا ہے جس کی وجہ ملک میں کرونا وائرس کا تیزی سے پھیلاؤ ہے۔ جو دنیا کی سب سے بڑی معیشت کو نقصان پہنچا رہا ہے۔
حکام کا کہنا ہے کہ گزشتہ ہفتے مزید نو لاکھ کارکنوں نے ملازمت سے بر طرفیوں کے بعد بے روزگاری الاؤنس کے لیے درخواستیں دائر کی ہیں۔ تاہم یہ تعداد اس سے ایک ہفتہ قبل کی ترمیم شدہ تعداد سے 26 ہزار کم ہے۔
دو ہفتے قبل سرکاری رپورٹ میں بتایا گیا تھا کہ دسمبر میں امریکی کاروباروں نے اپنے ایک لاکھ 40 ہزار کارکنوں کو فارغ کیا۔ جو ملک میں کرونا وائرس کی دوسری لہر شروع ہونے کے بعد روزگار کے مواقع میں سب سے بڑی گراوٹ تھی۔
امریکہ میں وبا کا پھیلاؤ روکنے کے لیے مزید اقدامات
امریکہ کے صدر جو بائیڈن نےکرونا وائرس کے پھیلاؤ کے روکنے کی کوششوں کو تیز کرنے کے لیے جمعرات کو نئے اقدامات کا اعلان کیا ہے۔ جن میں مرض سے بچاؤ کی ویکسین اور ساز و سامان کی فراہمی میں اضافہ کرنا بھی شامل ہے۔
حکام کے مطابق ان اقدامات سے کاروبار اور تعلیمی اداروں کو محفوظ انداز میں کھولنے میں مدد ملے گی۔
صدر نے دس نئے احکام جاری کیے ہیں تا کہ وبا کی ٹیسٹنگ کو بڑھایا جائے گا۔ ملک میں اگلے ایک ماہ کے دوران 100 کمیونٹی ویکسی نیشن سینٹرز قائم کیے جائیں گے۔