سفر کے لیے 'ویکسین پاسپورٹ' کے اجرا پر یورپ تقسیم
ایسے افراد جنہیں ویکسین لگ چکی ہو، انہیں ایک 'ویکسین پاسپورٹ' پر سفر کرنے کی اجازت دینے کے سوال پر یورپ میں حکومتیں تقسیم کا شکار ہیں۔
جنوبی یورپ کے ممالک، جن کا انحصار سیاحت پر ہے، کرونا وائرس کی وجہ سے سخت نقصان میں ہیں کیوں کہ تمام بین الاقوامی سرحدیں بند ہیں۔
یہ ممالک اس بات پر زور دے رہے ہیں کہ ایسے افراد جنہیں ویکسین لگ چکی ہو، ان کے لیے سرحدیں کھول دی جائیں اور انہیں سفر کی اجازت دی جائے۔
یونان کے وزیرِ اعظم، کِری آکو متسو تاکیس یورپی کمیشن پر زور دے رہے ہیں کہ ویکسین حاصل کرنے والوں کو ایک سرٹیفکیٹ دیے جانے پر کام کیا جائے۔
گزشتہ ہفتے انہوں نے یورپی کمیشن پر زور دیا کہ وہ کوئی مشترکہ حکمت عملی ترتیب دیں جس سے ویکسین کا سرٹیفکیٹ تمام رکن ممالک میں قابل قبول ہو۔
یورپ کی فضائی کمپنیاں، ہوٹل کی صنعت اور ٹریول ایجنسیوں کا کہنا ہے کہ ویکسین لگوانے کے سرٹیفکیٹ سے یورپی ممالک کے لیے اپنی سرحدیں کھولنے میں تیزی آئے گی۔
پاکستان میں اموات کی تعداد 11 ہزار 376 ہو گئی
پاکستان میں کرونا وائرس سے ہلاک ہونے والے افراد کی تعداد 11 ہزار 376 تک پہنچ گئی ہے۔
سرکاری اعداد و شمار کے مطابق ملک بھر میں گزشتہ 24 گھنٹوں کے دوران وبا سے مزید 58 افراد ہلاک ہوئے ہیں۔
واضح رہے کہ پاکستان میں وبا سے متاثرہ افراد کی نشان دہی کے لیے 77 لاکھ 22 ہزار ٹیسٹ کیے جا چکے ہیں۔ جب کہ گزشتہ روز مزید 42 ہزار سے زائد ٹیسٹ کیے گئے۔
پاکستان میں چھ فی صد متاثرہ افراد اب بھی زیرِ علاج
پاکستان میں کرونا وائرس سے متاثرہ چھ فی صد افراد کا علاج ابھی جاری ہے۔ جن میں سے دو ہزار 228 افراد انتہائی نگہداشت میں ہیں۔
سرکاری اعداد و شمار کے مطابق پاکستان میں وبا سے پانچ لاکھ 35 ہزار 914 افراد متاثر ہوئے تھے جن میں سے 91.5 فی صد یعنی چار لاکھ 90 ہزار 126 افراد صحت یاب ہو چکے ہیں۔ جب کہ 2.12 فی صد مریضوں کی موت ہوئی ہے۔
اعداد و شمار کے مطابق ملک بھر میں اب بھی 6 فی صد یعنی 34 ہزار 412 افراد اب بھی زیرِ علاج ہیں۔ جن میں سے 2228 افراد انتہائی نگہداشت میں ہیں۔
بنگلہ دیش نے بھارت سے ویکسین کی 50 لاکھ خوراکیں حاصل کر لیں
بنگلہ دیش نے بھارت میں ایسٹرازیینکا اور آکسفورڈ یونیورسٹی کی ویکسین بنانے والے ادارے سے کرونا ویکسین کی 50 لاکھ خوراکیں حاصل کر لی ہیں۔
بنگلہ دیش نے بھارت کے سیرم انسٹیٹیوٹ سے تین کروڑ خوراکوں کی خریداری کا فیصلہ کیا ہے۔
پیر کو بنگلہ دیش کی ایک کمپنی 'بیکسیمو فارماسوٹیکل' نے بھارت سے 50 لاکھ خوراکوں کی پہلی کھیپ وصول کی ہے۔
بیکسیمو کے مینیجنگ ڈائریکٹر نظم الحسن نے کہا ہے کہ یہ ویکسین حکام کو فراہم کی جائے گی اور ملک بھر میں اس کی ترسیل کی جائے گی۔
واضح رہے کہ بنگلہ دیش کو بھارت نے ویکسین کی 20 لاکھ خوراکیں تحفتاً بھی دی ہیں جو گزشتہ جمعرات کو بنگلہ دیش نے وصول کی تھیں۔ پیر کو حاصل ہونے والی 50 لاکھ خوراکیں بنگلہ دیش نے خریدی ہیں۔
بنگلہ دیش میں بھی ویکسین سب سے پہلے فرنٹ لائن ہیلتھ ورکرز کو لگائی جائے گی۔