یورپین کمیشن: 18 سال سے زائد عمر کے افراد کے 'ایسٹرا زینیکا' ویکسین کی منظوری
یورپی کمیشن نے 18 سال سے زائد عمر کے افراد کے لیے ‘ایسٹرا زینیکا’ کی تیار کردہ کرونا ویکسین استعمال کرنے کی منظوری دے دی ہے۔
یہ منظوری یورپی کمیشن پر کی جانے والی تنقید کے بعد دی گئی ہے، ناقدین کی جانب سے کہا جا رہا تھا کہ کمیشن آبادی کو کرونا ویکسین لگانے سے متعلق مطلوبہ اقدامات نہیں کر رہا۔
یورپین میڈیسن ایجنسی (ای ایم اے) کے ماہرین نے مشترکہ طور پر کرونا ویکسین 18 سال یا اس سے زائد عمر کے افراد کے لیے استعمال کی منظوری جمعے کو دی ہے۔
'ایسٹرا زینیکا' کی تیار کردہ کرونا ویکسین تیسری ویکسین ہے جس کے استعمال کی منظوری دی گئی ہے۔ جب کہ اس سے قبل ‘فائزر’ اور ‘موڈرنا’ کی تیار کردہ ویکسین کی منظوری دی گئی تھی۔
ای ایم اے کا مزید کہنا ہے کہ 55 سال سے زائد عمر کے افراد میں اس ویکسین کے نتائج سے متعلق خاطر خواہ نتائج دستیاب نہیں ہیں۔ تاہم ایجنسی کے مطابق اسے امید ہے کہ ویکسین ان افراد میں بھی کار آمد ہو گی۔
خیال رہے کہ 'ایسٹرا زینیکا' کی ویکسین کی دو خوراکیں لگائی جائیں گی۔ جب کہ ویکسین کی دوسری خوراک پہلی خوراک کے چار سے 12 ہفتوں کے اندر لگوانی ہوگی۔
پاکستان میں وبا سے ایک ہفتے میں 378 افراد ہلاک
پاکستان میں کرونا وائرس سے گزشتہ ایک ہفتے میں 378 افراد ہلاک ہوئے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں وبا سے مزید 65 افراد ہلاک ہوئے ہیں جس کے بعد اموات کی مجموعی تعداد 11 ہزار 623 ہو گئی ہے۔
گزشتہ ایک ہفتے میں سب سے زیادہ 26 جنوری کو 74 افراد اموات ہوئی۔ جب کہ 23 جنوری کو 48، 24 جنوری کو 23، 25 جنوری کو 58، 26 جنوری کو 74، 27 جنوری کو 64، 28 جنوری کو 46 اور گزشتہ روز 65 افراد وبا کے باعث ہلاک ہوئے۔
کرونا جنگ میں تارکینِ وطن کا اہم کردار، مثبت تاثر میں اضافہ
ترکی سے تعلق رکھنے والے ایک مسلمان سائنس دان جوڑے نے جب گزشتہ سال کرونا وائرس سے بچاؤ کی ویکسین دریافت کی۔ تو امریکی ذرائع ابلاغ نے ان کی کامیابی کو سرخیوں کے ساتھ نمایاں کیا۔
فائزر اور بائیو این ٹیک کے لیے انتہائی مؤثر ویکسین بنانے والے اوگر ساہین اور ان کی اہلیہ اوزلم ان لاکھوں تارکین وطن میں سے صرف دو افراد ہیں جو کرونا وائرس کے خلاف امریکہ کی جنگ میں اہم ترین شعبوں میں خدمات انجام دے رہے ہیں۔
ایسے کارکنان کی اکثریت غیر معروف ہے لیکن دنیا کے مختلف ممالک سے آ کر بسنے والے یہ کارکنان عالمی وبا کے دوران امریکی زندگی کو رواں دواں رکھنے میں کلیدی کردار ادا کر رہے ہیں۔
حالیہ تحقیق کے مطابق بعض سیاسی حلقوں میں تارکین وطن کے خلاف بیان بازی کے باوجود امریکی عوام کی اکثریت کرونا بحران میں ان کی خدمات کو قدر کی نگاہ سے دیکھتی ہے۔
رومانیہ میں کرونا اسپتال میں آتش زدگی، چار افراد ہلاک
رومانیہ کے دارالحکومت بوکارسٹ میں کرونا وائرس کے لیے مختص اسپتال میں آتش زدگی سے چار افراد ہلاک ہو گئے۔
خبر رساں ادارے 'رائٹرز' کے مطابق گزشتہ تین ماہ میں یورپ کے کسی بھی اسپتال میں آتش زدگی کا یہ دوسرا ہلاکت خیز واقعہ ہے۔
حکام کے مطابق اسپتال میں آتش زدگی کے بعد 102 مریضوں کو محفوظ مقامات پر بھی منتقل کیا گیا۔
مٹائی بالز اسپتال میں ایک عمارت آگ کے لپیٹ میں آئی جس کے چار کمرے زیادہ متاثر ہوئے۔ حکام کا کہنا ہے کہ وہ آگ لگنے کی وجوہات کی تحقیقات کر رہے ہیں۔
یہ اسپتال ملک میں وبا سے متاثرہ افراد کے علاج لیے مختص بڑے اسپتالوں میں سے ایک ہے۔
اسپتال میں زیرِ علاج 44 افراد کو دیگر اسپتالوں میں منتقل کیا گیا ہے۔ جب کہ باقی کو اسپتال کے مختلف وارڈز اور کمروں میں رکھا گیا ہے۔