کینیڈا: اہم ایئر لائنز میکسیکو کے لیے پروازوں کی معطلی پر رضا مند
کینیڈا کی اہم ایئر لائنز کرونا وبا کے پیشِ نظر لاطینی امریکہ کے ملک میکسیکو اور بحیرۂ کریبین کے ساحلی علاقوں کے لیے پروازیں تین ماہ کے لیے معطل کرنے پر رضا مند ہو گئی ہیں۔
خیال رہے کہ میکسیکو دنیا بھر میں کرونا سے اموات کی تعداد میں تیسرے نمبر پر ہے اور یہاں ایک لاکھ 56 ہزار افراد وبا سے ہلاک ہو چکے ہیں۔
وزیرِ اعظم جسٹن ٹروڈو کا کہنا ہے کہ تمام ایئر لائنز سے آنے والے مسافروں کے لیے ہوائی اڈوں پر کرونا ٹیسٹ لازمی ہو گا۔ مسافر ٹیسٹ کے نتائج آنے تک تین دن کے لیے اپنے خرچے پر ہوٹلوں میں رہنے کے پابند ہوں گے۔
جسٹن ٹروڈو کا کہنا تھا کہ یہ وقت نہیں ہے کہ ہوائی سفر کیا جائے۔
امریکہ کی جان ہاپکنز یونیورسٹی کے مطابق کینیڈا میں اب تک سات لاکھ 74 ہزار سے زائد افراد کے وبا سے متاثر ہونے کی تصدیق اور لگ بھگ 20 ہزار اموات ہو چکی ہیں۔
نیو یارک میں وسط فروری سے ریستوران مکمل طور پر کھولنے کا اعلان
نیو یارک میں دو ہفتے بعد ریستوران صارفین کو اِن ڈور کھانا فراہم کر سکیں گے۔
امریکہ کی ریاست نیو یارک کے گورنر اینڈریو کومو کا کہنا ہے کہ نیو یارک شہر کے معروف ریستورانوں میں ویلنٹائن ڈے سے اِن ڈور کھانا کھانے کی اجازت ہو گی۔
جمعے کو کیا گیا یہ اعلان امریکہ کی کسی بھی ریاست کی طرف سے کرونا وبا کی شدت میں ہونے والی کمی کو ظاہر کرتا ہے۔
ریستوران کھولنے سے متعلق منعقدہ تقریب سے خطاب میں گورنر اینڈریو کومو کا کہنا تھا کہ وہ کرونا وبا کی شدت میں اضافے سے متعلق آگاہ تھے۔ انہوں نے کامیابی اس کا مقابلہ کیا۔
امریکہ میں آبادی کے لحاظ سے سب سے بڑے شہر نیو یارک میں کرونا ویکسین کی کمی دیکھی جا رہی ہے جس کی وجہ سے گزشتہ ہفتے کئی افراد ویکسین لگوانے سے محروم رہے تھے۔
فرانس کا تیسری بار لاک ڈاؤن نہ کرنے کا فیصلہ
یورپ کے ملک فرانس نے کرونا وائرس کے سبب ملک بھر میں تیسرا لاک ڈاؤن نافذ نہ کرنے اور پابندیوں پر عمل درآمد میں سخت کرنے کا اعلان کیا ہے۔
فرانس کی سرحدوں پر دیگر ممالک سے آنے والوں کے لیے سخت اقدامات، کرفیو کی خلاف ورزی پر پولیس کی کارروائی اور گھروں سے کام کرنے کی پابندی کو پر عمل درآمد کرانے کا فیصلہ کیا گیا ہے۔
فرانس کے وزیرِ اعظم جین کیسٹیکس کا کہنا ہے کہ عوام کی صحت سے متعلق صورتِ حال ابھی بھی پریشان کن ہے۔ جب کہ فرانس میں وبا کے سبب ہونے والی ہلاکتوں کی تعداد 75 ہزار سے تجاوز کر چکی ہے۔
وزیرِ اعظم کا مزید کہنا تھا کہ وہ لاک ڈاؤن کے مضمرات سے آگاہ ہیں۔ انہوں نے گزشتہ چند دن کے اعداد و شمار دیکھیں ہیں جس کے بعد انہوں نے یہ فیصلہ کیا ہے کہ ابھی لاک ڈاؤن نافذ نہ کر کے ایک موقع لیا جا سکتا ہے۔
ان کا مزید کہنا تھا کہ دیگر ضروری سفر کے علاوہ اتوار سے یورپی یونین سے باہر کے ممالک سے فرانس آنے والوں پر مکمل پابندی ہو گی۔
خیال رہے کہ فرانس دنیا بھر میں وبا کے سبب ہونے والی ہلاکتوں کی تعداد کے حساب سے ساتویں نمبر پر ہے۔
پاکستان میں کرونا ویکسین سے متعلق غلط فہمیاں
پاکستان میں چینی کمپنی 'سائنو فارم' کی ویکسین کی پہلی کھیپ کی آمد جلد متوقع ہے۔ ملک بھر میں ویکسین کی آمد سے قبل منفی خیالات گردش کر رہے ہیں۔ گیلپ سروے کے مطابق پاکستانیوں کی بڑی تعداد کے خیال میں کرونا وائرس کے خطرات کو بڑھا چڑھا کر بیان کیا جا رہا ہے۔ دیکھیے نذر الاسلام کی رپورٹ میں۔
