پاکستان میں کرونا ویکسین شہریوں تک کیسے پہنچے گی؟
پاکستان میں 548 ویکسی نیشن سینٹرز کا قائم کیے جا چکے ہیں۔ پاکستان میں چین سے آنے والی کرونا ویکسین وصول کرنے اور اسے عوام تک پہنچانے کے لیے مزید کیا اقدامات کیے جا رہے ہیں؟ جانتے ہیں لاہور میں وائس آف امریکہ کے نمائندے ضیاء الرحمٰن سے سارہ زمان کی گفتگو میں۔
چین سے ویکسین لانے کے لیے پاکستان سے طیارہ اتوار کو جائے گا
پاکستان میں نیشنل کمانڈ اینڈ کنٹرول سینٹر (این سی او سی) کے ہفتے کو ہونے والے اجلاس میں ملک بھر میں کرونا ویکسین کی فراہمی سے متعلق اقدامات پر روشنی ڈالی گئی۔
این سی او سی کو مطلع کیا گیا کہ کرونا ویکسین کی پہلی کھیپ لانے کے لیے خصوصی طیارہ اتوار کو چین روانہ ہو گا۔ ویکسین کو اسلام آباد میں محفوظ کرنے کے لیے مطلوبہ اقدامات کر لیے گئے ہیں۔
سینٹر کو مزید بتایا گیا کہ دیگر صوبوں کو، خاص طور پر سندھ اور بلوچستان کو، ویکسین بذریعہ طیارے ہی پہنچائی جائے گی۔
این سی او سی میں صوبائی اور ضلعی سطح پر کرونا ویکسین کے انتظامی مراکز بھی قائم کیے جائیں گے۔
بھارت کی معیشت رواں سال 7.7 فی صد سکڑے گی
بھارتی معیشت، موجودہ مالی سال برائے 21-2020 کے دوران 7.7 فی صد تک سکڑ جائے گی۔
جمعہ کو جاری ہونے والی ایک رپورٹ میں کہا گیا ہے کہ معیشت کو کرونا وائرس سے پھیلنے والی عالمی وبا سے نقصان پہنچا ہے۔
معیشت کی صورتِ حال سے متعلق حکومت کے سروے میں یہ اندازہ لگایا گیا ہے۔ ماضی میں تیز رفتار ترقی کرنے والی معیشتوں میں شامل بھارت کی معیشت اس سال اپریل میں شروع ہونے والے مالی سال میں دوبارہ بحال ہو کر 11 فی صد کی رفتار سے نمو پائے گی۔
وزیرِ خزانہ نرملا سیتارامن نے جمعے کو پارلیمنٹ میں ایک رپورٹ پیش کی۔ وہ پیر کو آئندہ مالی سال برائے 22-2021 کے لیے بجٹ پیش کریں گی۔
امریکہ: ایفورڈ ایبل کیئر ہیلتھ انشورنس کی مدت میں تین ماہ کا خصوصی اضافہ
امریکہ کے صدر جو بائیڈن نے صحت سے متعلق ایک انتظامی حکم نامے پر دستخط کیے ہیں جس میں صحت سے متعلق انشورنس کے پروگرام میں خصوصی اندراج کے لیے مدت شامل کی گئی ہے تا کہ کم آمدنی والے افراد انشورنس حاصل کر سکیں۔
اس پروگرام سے ان لوگوں کی مدد ہو سکے گی جن کے پاس اب ہیلتھ انشورنس نہیں ہے۔
امریکیوں کے لیے اپنے آجر کے ذریعے ہیلتھ انشورنس حاصل کرنا سب سے عام طریقہ ہے۔ لیکن کرونا وائرس کے دوران بہت سے افراد کی نوکریاں جاتی رہیں جس کی وجہ سے ان کی ہیلتھ انشورنس بھی ختم ہو گئی ہے۔
صدر بائیڈن کے حکم نامے کے تحت اوباما کیئر کے نام سے معروف ایفورڈ ایبل کیئر ہیلتھ کے تحت بنائی جانے والی انشورنس مارکیٹ میں تین ماہ پر محیط خصوصی اندراج کی مدت دی جا رہی ہے۔
عمومی طور پر اس پروگرام میں اندراج کی مدت ہر سال چھ ہفتوں کے لیے کھولی جاتی ہے۔