عالمی تحقیقاتی ٹیم کا چین میں جانوروں کے طبی مرکز کا دورہ
عالمی ادارۂ صحت (ڈبلیو ایچ او) کی تحقیقاتی ٹیم نے چین کے شہر ووہان میں جانوروں کے علاج کے ایک طبی مرکز کا دورہ کیا ہے۔
منگل کو کیا جانے والا دورہ اس تحقیقات کا حصہ ہے جو کہ ٹیم کرونا وائرس کے پھیلاؤ کے حوالے سے کر رہی ہے۔
دسمبر 2019 میں کرونا وائرس کے ابتدائی کیسز چین کے صوبے ہوبی کے شہر ووہان سے رپورٹ ہوئے تھے۔ اب عالمی ماہرین کی ایک ٹیم اس وبا کے پھیلاؤ کی تحقیقات کے لیے اس شہر کا دورہ کر رہی ہے۔
چین پر ابتدا سے یہ الزام عائد کیا جاتا رہا ہے کہ اس نے وبا کے حوالے سے ابتدائی معلومات مخفی رکھی ہیں۔ جب کہ عالمی دباؤ کے بعد ڈبلیو ایچ او کی ٹیم کو یہاں کا دورہ کرنے کی اجازت دی ہے۔
جنوری میں امریکہ میں یومیہ اوسطاََ تین ہزار سے زائد اموات
امریکہ میں جنوری کرونا وائرس کے حوالے سے ہلاکت خیز ثابت ہوا ہے۔
امریکہ کے خبر رساں ادارے 'ایسوسی ایٹڈ پریس' کے مطابق جنوری میں امریکہ میں ہلاک ہونے والوں کی تعداد چار لاکھ 40 ہزار سے تجاوز کر گئی۔ جب کہ جنوری میں وبا سے مزید 95 ہزار افراد ہلاک ہوئے۔
اعداد و شمار کے مطابق جنوری کا مہینہ امریکہ میں وبا کے حوالے سے ہلاکت خیز ثابت ہوا ہے اور یومیہ اوسطاََ تین ہزار سے زائد اموات ہوئی ہیں۔
رپورٹس کے مطابق امریکہ میں وبا کے پھیلاؤ میں معمولی کمی آئی ہے البتہ امید ظاہر کی جا رہی ہے کہ ویکسی نیشن سے اس میں مزید کمی ہو گی۔
پاکستان میں ویکسی نیشن کا آغاز
پاکستان میں وزیرِ اعظم عمران خان کی موجودگی میں ڈاکٹر کو ویکسین کا انجیکشن لگا کر ویکسی نیشن مہم کا آغاز کر دیا گیا ہے۔
اس موقع پر وزیرِ اعظم نے خطاب کرتے ہوئے کہا کہ پہلے مرحلے میں فرنٹ لائن ورکرز کو ویکسین لگائی جائے گی۔
انہوں نے ویکسین کی فراہمی پر چین کا بھی شکریہ ادا کیا۔
قبل ازیں پاکستان کے وفاقی وزیر برائے منصوبہ بندی اسد عمر نے کہا تھا کہ وزیرِ اعظم عمران خان کی موجودگی میں پاکستان میں کرونا ویکسین لگانے کی مہم کا آغاز ہو گا۔
ان کا کہنا تھا کہ بدھ کو تمام صوبائی دارالحکومت میں قومی کرونا ویکسی نیشن مہم شروع ہو جائے گی۔
وفاقی وزیر نے ایک بار پھر واضح کیا کہ کرونا ویکسین سب سے پہلے فرنٹ لائن ورکرز یعنی طبی عملے کو لگائی جائے گی۔
واضح رہے کہ پاکستان کو چین نے پانچ لاکھ ویکسین کی خوراکیں عطیہ کی ہیں۔ جو کہ خصوصی طیارے کے ذریعے پیر کو پاکستانی لائی گئی ہیں۔
پاکستان میں متاثرہ افراد کی نشان دہی کے لیے ٹیسٹ 80 لاکھ سے متجاوز
پاکستان میں کرونا وائرس سے متاثرہ افراد کی نشان دہی کے لیے کیے جانے والے ٹیسٹس کی مجموعی تعداد 80 لاکھ سے زائد ہو چکی ہے۔.
سرکاری اعداد و شمار کے مطابق پاکستان میں گزشتہ 24 گھنٹوں میں 38 ہزار 813 ٹیسٹ کیے گئے جس کے بعد ٹیسٹس کی مجموعی تعداد 80 لاکھ 5 ہزار 794 ہو گئی ہے۔
حکومت کے مطابق پاکستان میں گزشتہ 24 گھنٹوں میں ٹیسٹ مثبت آنے کی شرح 3.1 فی صد رہی۔