پاکستان: لوگوں کو ویکسین لگوانے پر آمادہ کرنا بڑا چیلنج
پاکستان میں کرونا وائرس کی ویکسی نیشن کا آغاز ہو چکا ہے اور پہلے مرحلے میں طبی عملے کو ویکسین دی جا رہی ہے۔ لیکن حکام کو یہ خدشہ بھی ہے کہ پاکستان میں لوگوں کو کرونا وائرس کی ویکسین لگوانے پر قائل کرنا ویکسین حاصل کرنے سے بڑا چیلنج ثابت ہو گا۔ مزید تفصیلات جانتے ہیں اس رپورٹ میں۔
غریب ممالک کے لیے اقوامِ متحدہ کا ایک ارب کرونا ویکسین کا معاہدہ
اقوامِ متحدہ کے بچوں کے ایمرجنسی فنڈ کے ادارے یونیسف نے بھارت کے سیرم انسٹی ٹیوٹ سے ویکسین کی ایک اعشاریہ ایک ارب خوراکوں کو مہیا کرنے کا معاہدہ کیا ہے۔
اس معاہدے کے تحت سیرم انسٹی ٹیوٹ ایسٹرا زینیکا اور آکسفورڈ کے شراکت سے بنائی گئی ویکسین اور انووا ویکس ویکسین تین ڈالر فی خوراک کے قیمت پر مہیا کرے گا۔
یونیسیف ڈائریکٹر ہینرییتا فور کے مطابق یہ کوویکس ویکسین کی پہلی کھیپ ہو گی اور اس کے بعد ویکسین کی مزید خوراکیں حاصل کی جائیں گی تاکہ اس سال کے پہلے حصے کی ضروریا ت پوری کی جاسکیں۔
یاد رہے کہ کوویکس کے اشتراکی پروگرام کے تحت عالمی ادارہ صحت، ویکسن کے حصول کے لیے قائم کیا گیا ویکسین اتحاد اور سینٹر وبا کے امراض سے نمٹنے کی تیاری کے ادارے سی ای پی آئی کے ساتھ مل کر دنیا کے سب سے کم آمدنی والے غریب ممالک کے لیے ویکسین کی تقسیم کا کام کیا جار ہا ہے۔
بالی وڈ کے گانوں پر رقص کرنے والے امریکی 'ڈانسنگ ڈیڈ'
کرونا وائرس کے دوران گھروں میں رہتے ہوئے اپنی بوریت مٹانے کے لیے لوگوں نے بہت کچھ منفرد کیا اور اب بھی کر رہے ہیں۔ ملیے ایک ایسے ہی امریکی والد سے جنہوں نے اپنے ڈانس کی ویڈیوز بنا کر سوشل میڈیا پر شیئر کرنا شروع کیں اور اب وہ دنیا کے کئی حصوں میں مقبول ہو چکے ہیں۔ آؤنشمن آپٹے کی رپورٹ
چین کا ترقی پذیر ممالک کو ویکسین کی ایک کروڑ خوراکیں فراہم کرنے کا اعلان
چین نے اعلان کیا ہے کہ وہ کرونا سے بچاؤ کے عالمی پروگرام کے لیے کرونا ویکسین کی ایک کروڑ خوراکیں ترقی پذیر ممالک کو فراہم کرے گا۔
وزارتِ خارجہ کے ترجمان وینگ وینبن نے کہا ہے کہ چین عالمی ادارۂ صحت کے دنیا بھر میں ترقی پذیر ممالک کے لیے ویکسین فراہم کرنے کے مطالبے کے جواب میں یہ ویکسین فراہم کرے گا۔ تاہم انہوں نے یہ نہیں بتایا کہ چین کون سی ویکسین فراہم کرے گا۔
چین اس سے پہلے اس سے کہیں زیادہ کرونا ویکسین کی خوراکوں کی امداد اور سودے 30 سے زائد ممالک کے ساتھ کر چکا ہے۔
چینی کمپنی سائنوویک بائیوٹیک نے ترکی کے ساتھ اپنی ویکسین کی پانچ کروڑ خوراکوں کا معاہدہ کیا ہے۔
خبر رساں ادارے 'اے پی' کے مطابق ماہرین کا خیال ہے کہ چین کے اس اقدام سے عالمی سطح پر اپنی ساکھ بحال کرنے کی کوشش کر رہا ہے۔ کیوں کہ یہ نظریہ عام ہے کہ کرونا وائرس کی عالمی وبا چین کے شہر ووہان سے پھوٹی تھی۔