آسٹریلیا: ویکسین لگوانے والوں کو سرٹیفکیٹ دیا جائے گا
آسٹریلیا میں کرونا وائرس لگوانے والے افراد کو سرٹیفکیٹ جاری کیا جائے گا۔ آسٹریلیا میں رواں ماہ بڑے پیمانے پر ویکسی نیشن مہم شروع کی جا رہی ہے۔
ویکسی نیشن مہم کے لیے آسٹریلیا نے بھرپور عوامی مہم بھی چلائی ہے تاکہ ویکسین سے متعلق عوام کے تحفظات دُور کیے جا سکیں۔
حکام کا کہنا ہے کہ ہیلتھ ورکرز اور معمر افراد کو ترجیحی بنیادوں پر ویکسین لگائی جائے گی۔ آسٹریلیا نے 'فائزر' اور بائیو این ٹیک کی بنی ویکسین کے استعمال کی منظوری دی ہے۔
حکام کا کہنا ہے کہ سرٹیفکیٹ کے حامل افراد کو اسپتالوں اور نرسنگ ہومز تک رسائی میں سہولت ہو گی۔ جہاں وبا کے پیشِ نظر سخت انتظامات کیے گئے ہیں۔
آسٹریلوی حکومت نے دعویٰ کیا ہے کہ اکتوبر تک پوری آبادی کو ویکسین لگا دی جائے گی۔
چین میں مقامی سطح پر دو ماہ بعد کوئی کیس رپورٹ نہیں ہوا: حکام
چینی حکام کا کہنا ہے کہ ملک میں دو ماہ بعد کرونا وائرس کی مقامی سطح پر منتقلی کا کوئی کیس رپورٹ نہیں ہوا۔
چین میں اتوار کو کرونا کے 14 کیس رپورٹ ہوئے تھے۔ تاہم یہ کیسز باہر سے آنے والے افراد میں سامنے آئے تھے۔
خیال رہے کہ سب سے پہلے چین کے شہر ووہان میں 2019 کے اختتام میں کرونا کیسز سامنے آئے تھے جس کے بعد وبا اب تک پوری دنیا کو اپنی لپیٹ میں لے چکی ہے۔
چین میں اب تک 89 ہزار سے زائد کیسز جب کہ 4636 اموات ہو چکی ہیں۔ دنیا بھر میں اب تک کرونا کے 10 کروڑ سے زائد کیسز جب کہ 20 لاکھ سے زائد اموات ہو چکی ہیں۔
بھارت کا افغانستان کو کرونا ویکسین کی پانچ لاکھ خوراکوں کا عطیہ
افغانستان نے بھارت سے آنے والے کرونا ویکسین وصول کر لی ہے۔ نئی دہلی نے کابل کو ویکسین کی پانچ لاکھ خوراکیں عطیہ کی ہیں۔
بھارت کے 'سیرم انسٹی ٹیوٹ' میں تیار ہونے والی 'ایسٹرازینیکا' کی ویکسین کی خوراکیں اتوار کو بھارت سے کابل پہنچیں۔ یہ افغانستان پہنچنے والی پہلی ویکسین تھی۔
لیکن افغانستان کو ویکسین کے استعمال کے لیے عالمی ادارۂ صحت کی جانب سے منظوری کا انتظار ہے۔
افغانستان کی وزارتِ صحت کے حکام کا کہنا ہے کہ ویکسین کی خوراکیں کابل میں ہی محفوظ رکھی جائیں گی جب تک عالمی ادارے کے جانب سے اس کے ہنگامی استعمال کی منظوری نہ مل جائے۔ حکام کو امید ہے کہ یہ منظوری ایک ہفتے میں مل جائے گی۔
جنوبی افریقہ میں ویکسی نیشن مہم منسوخ
جنوبی افریقہ نے آئندہ چند کے دوران ملک بھر میں شروع ہونے والی ایسٹرا زینیکا ویکسین لگانے کی مہم منسوخ کر دی ہے۔
جنوبی افریقہ نے کرونا وائرس کی نئی قسم کے خلاف ایسٹرازینیکا ویکسین کی کم فعالیت کے باعث ویکسی نیشن مہم منسوخ کی ہے۔
جوہانسبرگ کی ایک یونیورسٹی کے مطالعے کے بعد یہ بات سامنے آئی تھی کہ دوا ساز کمپنی ایسٹرازینیکا کی تیار کردہ ویکسین جنوبی افریقہ میں پائی جانے والی کرونا وائرس کی نئی قسم کے خلاف صرف 22 فی صد کارگر ہے اور نوجوانوں کو عالمی وبا سے بچانے کے لیے ویکسین کے نتائج بھی محدود ہیں۔
جنوبی افریقہ میں آئندہ چند روز کے دوران لاکھوں افراد کو ایسٹرازینیکا کی تیار کردہ ویکسین دی جانی تھی۔
دوسری جانب ایسٹرازینیکا نے کہا ہے کہ کرونا وائرس کی نئی قسم کے انسداد کے لیے ایک اور ویکسین تیار کی جا رہی ہے جو موسمِ خزاں تک آنے کی توقع ہے۔
یاد رہے کہ جنوبی افریقہ میں پائی جانے والی کرونا وائرس کی نئی قسم امریکہ سمیت 32 دیگر ملکوں میں موجود ہے۔
کرونا وائرس سے جنوبی افریقہ میں اب تک 46 ہزار سے زیادہ اموات رپورٹ ہو چکی ہیں۔