پاکستان: معمر افراد کے لیے کرونا ویکسین کی رجسٹریشن، کیا ہر فرد کو ویکسین مفت ملے گی؟
حکومتِ پاکستان نے ملک بھر میں 65 برس اور اس سے زائد عمر کے افراد کے لیے کرونا ویکسی نیشن کی رجسٹریشن کا اعلان کیا ہے۔ یہ اعلان ایسے موقع پر ہوا ہے جب حکومت نے نجی شعبے کو ویکسین کی خریداری اور درآمد کی اجازت دی ہے۔
پاکستان کے وفاقی وزیر منصوبہ بندی اسد عمر نے پیر کو اپنے ایک ٹوئٹ میں کہا ہے کہ ملک بھر میں 65 برس یا اس سے زائد عمر کے افراد اپنا شناختی کارڈ نمبر 1166 پر میسج کر کے کرونا ویکسی نیشن کے لیے رجسٹر کرا سکتے ہیں۔
اسد عمر کے بقول معمر افراد کو کرونا ویکسی نیشن کا عمل مارچ میں شروع کیا جائے گا۔
پاکستان کی وزارتِ صحت نے گزشتہ ہفتے نجی شعبے کو ویکسین کی خریداری کی اجازت دی تھی جس کے بعد یہ تاثر پیدا ہوا تھا کہ حکومت شہریوں کو مفت ویکسین فراہم کرنے کے وعدے سے دست بردار ہو گئی ہے۔
ویکسین کی سرکاری سطح پر قیمت لاگو کیے بغیر نجی شعبے کو اس کی فروخت کی اجازت دیے جانے پر حکومت کو تنقید کا بھی سامنا ہے۔
تاہم وزیرِ اعظم عمران خان کے معاون خصوصی برائے صحت ڈاکٹر فیصل سلطان کا کہنا ہے کہ نجی شعبے کو ویکسین کی درآمد کی اجازت کا ہر گز مطلب یہ نہیں کہ حکومت مفت ویکسین مہیا کرنے کے وعدے سے دستب ردار ہو گئی ہے۔
ڈاکٹر فیصل سلطان کا کہنا تھا کہ حکومت نجی شعبے کو عوام کا استحصال نہیں کرنے دی گئی اور ویکسین کی دستیابی کے ساتھ ہی اس کی قیمت مقرر کر دی جائے گی۔
وائس آف امریکہ سے بات کرتے ہوئے ڈاکٹر فیصل سلطان نے کہا کہ حکومت ہر بالغ شہری کو ویکسین کی فراہمی کے لیے منصوبہ بندی کے لیے سرگرم ہے اور اس وعدے کو یقینی بنانے کے لیے درکار بجٹ پہلے سے مختص ہے۔
پاکستان میں کرونا سے مزید 26 اموات، 1048 نئے کیس
پاکستان میں کرونا وائرس کے مزید 1048 کیس رپورٹ ہوئے ہیں جس کے بعد مجموعی کیسز کی تعداد پانچ لاکھ 64 ہزار سے بڑھ گئی ہے۔
پاکستان میں مزید 26 اموات کے بعد مجموعی اموات 12333 ہو گئی ہیں۔
نیشنل کمانڈ اینڈ آپریشن سینٹر (این سی او سی) کے مطابق ملک بھر میں اب تک کرونا کے 84 لاکھ 66 ہزار سے زائد ٹیسٹس کیے جا چکے ہیں۔ ملک میں انتہائی نگہداشت کے وارڈز میں 1680 مریض زیرِ علاج ہیں۔
پاکستان میں وبا سے اب تک پانچ لاکھ 25 ہزار سے زائد مریض صحت یاب ہو چکے ہیں۔ ادھر حکومتِ پاکستان نے 65 سال سے زائد معمر افراد کی ویکسی نیشن کے لیے رجسٹریشن کا آغاز کر دیا ہے۔
امریکہ میں کرونا کیسز میں مسلسل کمی
امریکہ میں گزشتہ کئی روز سے کرونا کیسز میں مسلسل کمی آ رہی ہے۔ دسمبر میں امریکہ میں دو لاکھ سے زائد کیسز رپورٹ ہو رہے تھے اب یومیہ کیسز کی تعداد ایک لاکھ سے کم ہو گئی ہے۔
البتہ، حکام کا کہنا ہے کہ گو کہ وبا کی شدت میں کمی آ رہی ہے، لیکن امریکہ اس پر قابو پانے سے بہت دُور ہے۔
امریکی ماہرینِ صحت کا کہنا ہے کہ وبا کی شدت کم ہونے کا ہرگز یہ مطلب نہیں کہ عوام احتیاطی تدابیر چھوڑ دیں۔
ماہرین کا کہنا ہے کہ عوام کو ماسک کی پابندی، سماجی فاصلے اور دیگر احتیاطی تدابیر کا سلسلہ جاری رکھنا ہو گا۔
امریکہ میں اب تک کرونا کے دو کروڑ 76 لاکھ سے زائد کیس جب کہ چار لاکھ 84 ہزار سے زائد اموات ہو چکی ہیں۔
پاکستانی لیب 'اسپتنک فائیو' کرونا ویکسین کمرشل بنیادوں پر لگائے گی
پاکستان میں ایک نجی لیب بہت جلد روس کی تیار کردہ'اسپتنک فائیو' کرونا ویکسین درآمد کرے گی جسے کمرشل بنیادوں پر عوام کو لگایا جائے گا۔
خیال رہے کہ سرکاری سطح پر ویکسی نیشن کے علاوہ حکومتِ پاکستان نے نجی شعبے کو بھی ویکسین درآمد کرنے کی اجازت دے رکھی ہے۔
پاکستان کی بڑی نجی ٹیسٹنگ لیبارٹریز میں شمار ہونے والی 'چغتائی لیب' کے ڈائریکٹر عمر چغتائی نے خبر رساں ادارے 'رائٹرز' کو بتایا کہ انہیں امید ہے کہ ویکسین کی ہزاروں خوراکوں پر مشتمل پہلی کھیپ انہیں اگلے ہفتے تک مل جائے گی۔
وزیرِ اعظم پاکستان کے معاونِ خصوصی برائے صحت ڈاکٹر ظفر مرزا کے مطابق وہ اس معاہدے سے براہ راست آگاہ نہیں ہیں۔
پاکستان دنیا کے اُن پہلے ممالک کی فہرست میں شامل ہو جائے گا جہاں سرکاری سطح کے علاوہ نجی شعبہ کمرشل بنیادوں پر ویکسین لگائی جائے گی۔
پاکستان میں کمرشل بنیادوں پر ویکسین کی فروخت اور ممکنہ طور پر زیادہ قیمت کی وجہ سے بعض حلقوں کی جانب سے تنقید بھی سامنے آئی ہے۔ ناقدین کا کہنا ہے کہ 22 کروڑ آبادی والا ملک جس کا بڑا حصہ کم آمدنی والے طبقات پر مشتمل ہے، یہاں ہر کسی کے لیے ویکسین خریدنا ممکن نہیں ہو گا۔