امریکہ: سینیٹ کے منظور کردہ 19 کھرب ڈالر کے کرونا ریلیف بل میں کیا ہے؟
امریکی سینیٹ نے صدر جو بائیڈن کے تجویز کردہ 19 کھرب ڈالرز کے کرونا ریلیف بل کی منظوری دے دی ہے۔ یہ رقم کرونا وبا اور امریکیوں کو درپیش مشکلات سے نمٹنے کے لیے خرچ کی جائے گی۔ ری پبلکن پارٹی نے اس بل کی مخالفت کی ہے۔
ہفتے کو کئی گھنٹوں کی بحث کے بعد سو رُکنی سینیٹ نے 49 کے مقابلے میں 50 ووٹوں سے بل کی منظوری دی۔ ایوانِ نمائندگان پہلے ہی اس بل کی منظوری دے چکا ہے۔
البتہ، سینیٹ نے بل میں کئی تبدیلیاں تجویز کی ہیں۔ جس کے لیے یہ بل دوبارہ ایوانِ نمائندگان میں بھجوایا جائے گا جہاں آئندہ ہفتے اس پر ووٹنگ ہو گی۔
ووٹنگ کے بعد صدر بائیڈن اس بل پر دستخط کریں گے جس کے بعد یہ قانون بن جائے گا۔
حکمراں جماعت ڈیمو کریٹک پارٹی کا دعویٰ ہے کہ یہ بل کرونا وبا کو شکست دینے اور معیشت کی بحالی میں مددگار ثابت ہو گا۔
البتہ، حزبِ اختلاف کی جماعت ری پبلکن پارٹی کا مؤقف ہے کہ اس بل میں ضرورت سے زیادہ رقم مختص کی گئی ہے۔
اس امدادی پیکیج کی مد میں جہاں ویکسین اور طبی اشیا کے اخراجات کو پورا کیا جائے گا۔ وہیں اکثر شہریوں کو 1400 ڈالر فی کس کی ادائیگی بھی کی جائے گی۔
فن لینڈ: کیسز بڑھنے کے سبب مقامی حکومتوں کے انتخابات ملتوی
فن لینڈ نے ملک میں بڑھتے ہوئے کرونا کیسز کے باعث آئندہ ماہ مقامی حکومتوں کے لیے ہونے والے انتخابات وسطی جون تک ملتوی کر دیے ہیں۔
ملک میں کرونا کیسز کے بڑھنے کی وجہ سے خدشہ ظاہر کیا جا رہا تھا کہ انتخابات کے دن وائرس کے کیسز میں زیادہ تیزی سے اضافے کے خطرے کے پیش نظر ووٹرز کی تعداد پر اثر پڑ سکتا ہے۔
وزیر انصاف آنا مایا ہینریکسن نے کہا ہے کہ اس بات کا خطرہ بہت زیادہ تھا کہ انتخابات ناکام ہو جائیں گے۔
ملک کی پارلیمنٹ میں 10 میں سے نو سیاسی جماعتوں نے اس فیصلے سے اتفاق کیا ہے۔
ملک میں 61 ہزار سے زائد افراد کرونا سے متاثر اور 767 ہلاکتیں ہو چکی ہیں۔
یورپی یونین امریکہ میں بنائی گئی ایسٹرا زینیکا ویکسین تک رسائی کی خواہش مند
یورپی یونین امریکہ میں بننے والی ایسٹرا زینیکا ویکسین کی یورپ درآمد کی خواہش مند ہے۔
اخبار 'دی فنانشل ٹائمز' کی ایک رپورٹ میں بتایا گیا ہے کہ یورپی یونین امریکہ میں بننے والی ایسٹرا زینیکا ویکسین کی لاکھوں خوراکوں کی یورپ درآمد کی اجازت مانگے گا۔
اخبار کے مطابق یہ اقدام ویکسین کی رسد میں کمی کو ختم کرنے کی کوششوں میں سے ایک ہے۔
یورپی یونین یہ بھی چاہتی ہے کہ امریکہ ویکسین کی پیداوار کے لیے ضروری اجزا کی یورپ برآمد کو آسان بنائے۔
رپورٹ کے مطابق کمیشن کو امید ہے کہ امریکہ ویکسین بنانے والی کمپنیوں کے یورپ کے ساتھ معاہدوں کا احترام کرے گا۔
سعودی عرب میں اتوار سے کرونا وائرس کے باعث عائد پابندیاں ہٹانے کا فیصلہ
سعودی عرب اتوار سے کرونا وائرس کے باعث عائد پابندیاں ہٹا رہا ہے۔
سرکاری خبر رساں ایجنسی 'ایس پی اے' کے مطابق سنیما دوبارہ کھولنے، انٹرٹینمنٹ کی سرگرمیاں، محافل بحال اور گھروں میں دعوتوں کی اجازت دی جائے گی.
'ایس پی اے' نے وزارتِ داخلہ کے ذرائع کے حوالے سے بتایا کہ کچھ سرگرمیوں پر ابھی بھی پابندی رہے گی جن میں شادیوں اور کمپنیوں کے بڑے اجلاس شامل ہیں۔
اس کے علاوہ سماجی محافل میں زیادہ سے زیادہ 20 افراد کی تعداد کی حد برقرار رہے گی۔