برطانیہ میں وبا کی سامنے والی قسم مہلک قرار
اقوامِ متحدہ کی جانب سے کرونا وائرس کو عالمی وبا قرار دیے ہوئے ایک سال مکمل ہو گیا ہے۔
وبا کا ایک سال مکمل ہونے پر شائع ہونے والی ایک رپورٹ میں کہا گیا ہے کہ برطانیہ میں سامنے آنے والی کرونا وائرس کی نئی قسم دیگر تمام اقسام سے زیادہ مہلک ہے۔
'برٹش میڈیکل جرنل' میں بدھ کو شائع ہونے والی رپورٹ میں بتایا گیا ہے کہ کرونا وائرس کی نئی برطانوی قسم کا نشانہ جو افراد بنے ہیں، ان میں دیگر اقسام سے متاثر ہونے والوں کے مقابلے میں موت کا امکان 64 فی صد زیادہ ہے۔
گزشتہ ستمبر میں جنوب مشرقی برطانیہ سے پھیلنے والی کرونا وائرس کی نئی قسم اب دنیا کے 100 سے زیادہ ممالک میں پہنچ چکی ہے۔ اس سے قبل ہونے والی ریسرچز میں یہ بات بھی سامنے آئی ہے کہ یہ قسم کرونا وائرس کی اصل قسم سے کہیں زیادہ تیزی سے پھیلتی ہے۔
دوسری طرف اقوامِ متحدہ کی جانب سے کرونا وائرس کو عالمی وبا قرار دیے جانے کو ایک سال مکمل ہو گیا ہے۔ اس موقع پر برازیل میں کرونا وائرس سے ایک ہی دن میں ریکارڈ 2286 اموات رپورٹ ہوئی ہیں۔
کرونا بحران میں 'لٹل پاکستان' کے کاروباری پریشان
امریکہ کا نیویارک شہر کرونا وائرس کی عالمی وبا کا مرکز رہا ہے۔ نیویارک کے علاقے 'کونی آئی لینڈ' کو پاکستانیوں کا گڑھ ہونے کے وجہ سے 'لٹل پاکستان' بھی کہا جاتا ہے۔ 'لٹل پاکستان' بھی کرونا بحران میں بری طرح متاثر ہوا۔ اب ایک سال بعد یہاں کی صورتِ حال کیسی ہے؟ جانتے ہیں آؤنشمن آپٹے کی رپورٹ میں۔
پاکستان میں وبا کی تیسری لہر کی آمد کی تصدیق
پاکستان کے وزیرِ اعظم عمران خان کے معاونِ خصوصی برائے صحت ڈاکٹر فیصل سلطان نے کہا ہے کہ پاکستان میں واضح طور پر کرونا وائرس کی نئی لہر آ چکی ہے۔
ڈاکٹر فیصل سلطان نے ایک ویڈیو بیان میں کہا کہ بالخصوص پنجاب کے بڑے شہروں سمیت پورا پاکستان کرونا وائرس کی نئی لہر کی زد میں ہے۔
ان کا مزید کہنا تھا کہ دنیا بھر میں وائرس کی نئی اقسام آ چکی ہیں۔ یہ بھی دیکھا گیا ہے کہ نئی اقسام تیزی سے پھیلتی ہیں۔یہ بھی خدشہ ظاہر کیا گیا کچھ اقسام بہت زیادہ خطرناک بھی ہو سکتی ہیں۔
معاونِ خصوصی برائے صحت نے کہا کہ اگر ہم نے احتیاط کا دامن ہاتھ سے چھوڑ دیا تو یہ لہر پورے پاکستان میں پھیل سکتی ہے۔
انہوں نے عوام سے درخواست کی کہ حکومت کی طرف سے وضع کردہ احتیاطی تدابیر پر سختی سے عمل کریں۔
ڈاکٹر فیصل سلطان کے مطابق مریضوں کی تعداد میں اضافہ ہو رہا ہے۔ عوام وائرس سے خود بھی بچیں اور اپنے پیاروں کو بھی بچائیں۔
امریکہ کی جانسن اینڈ جانسن کی ویکسین کی 10 کروڑ خوراکیں خریدنے کی منصوبہ بندی
امریکہ کی حکومت جانسن اینڈ جانسن سے کرونا وائرس کی ویکسین کی 10 کروڑ خوراکیں خریدنے کی منصوبہ بندی کر رہی ہے۔
جانسن اینڈ جانسن ویکسئین کی صرف ایک ہی خوراک دی جاتی ہے۔ توقع کی جا رہی ہے کہ صدر جو بائیڈن جانسن اینڈ جانسن اور مرک اینڈ کمپنی کے حکام سے ملاقات کے دوران یہ اعلان کر یں گے۔
امریکی دوا ساز کمپنی مرک ویکسین تیار کرنے کے لیے امریکی فرم جانسن اینڈ جانسن کے ساتھ شراکت دار ہے۔
امریکہ جانسن اینڈ جانسن کو پہلے ہی 10 کروڑ خوراکوں کا آرڈر دے چکا ہے۔
خبر رساں ادارے 'رائٹرز' کے مطابق جانسن اینڈ جانسن رواں ہفتے کوئی ویکسین فراہم نہیں کر سکے گی۔
'این بی سی نیوز' کے مطابق امریکہ نے پہلے ہی ویکسین تیار کرنے والوں کے ساتھ معاہدے کر لیے ہیں جس کے نتیجے میں ہر امریکی بالغ فرد کے لیے خوراک فراہم ہو سکے گی۔
اخبار 'واشنگٹن پوسٹ' کی رپورٹ کے مطابق امریکہ کی حکومت نے موڈرنا اور فائزر اور بائیو این ٹیک کی تیار کردہ دو ویکسین کے 60 کروڑ خوراکوں کا پہلے ہی آرڈر دے چکا ہے۔ ان دونوں ویکسین کی دو دو خوراکیں لگنی ہیں اس لیے یہ خوراکیں 30 کروڑ افراد کے لیے کافی ہوں گی۔ جو کہ ممکنہ طور ہر اگلے چار ماہ میں لگائی جا سکیں گی۔
رپورٹ کے مطابق امریکہ میں 26 کروڑ افراد ویکسین لگوانے کے اہل ہیں۔