کرونا پابندیوں کے خلاف مختلف یورپی ملکوں میں مظاہرے، لندن میں درجنوں گرفتاریاں
کرونا وبا کے پیشِ نظر عائد کردہ پابندیوں کے خلاف ہفتے کو برطانیہ اور کئی یورپی ممالک میں شہری سڑکوں پر نکل آئے۔ برطانیہ اور جرمنی میں مظاہرین اور پولیس کے درمیان جھڑپیں بھی ہوئی ہیں۔
برطانیہ کے دارالحکومت لندن میں لوگوں کے جمع ہونے پر پابندی کے باوجود احتجاج کرنے پر پولیس نے درجنوں مظاہرین کو گرفتار کر لیا۔
کرونا وبا کی تیسری لہر کے دوران لاک ڈاؤن کے خلاف یورپ کے دیگر ممالک آسٹریا، بیلجیم، کروشیا، فن لینڈ، پولینڈ، رومانیہ، سوئیڈن اور سوئٹزر لینڈ میں بھی مظاہرے کیے گئے۔
کیسل میں مظاہروں میں 20 ہزار سے زائد مظاہرین نے شرکت کی اس دوران مظاہرین اور پولیس کے درمیان جھڑپیں بھی ہوئیں۔
کیسل کے مرکزی حصے میں مظاہرین نے عدالتی پابندی کے باوجود مظاہرہ کیا اور مظاہرین کی اکثریت نے کرونا وبا سے محفوظ رہنے کے لیے لازمی ماسک بھی نہیں پہنے تھے۔
جرمن ذرائع ابلاغ کے مطاابق کچھ مظاہرین نے پولیس افسران اور صحافیوں پر حملے بھی کیے۔
پولیس نے مظاہرین کو منتشر کرنے کے لیے واٹر کینن کا بھی استعمال کیا۔
یورپ کے کئی شہروں میں ہفتے کو کرونا پابندیوں کے خلاف احتجاج کی کال دی گئی تھی۔
پاکستان میں کرونا کے مزید تین ہزار 667 کیس رپورٹ، 44 ہلاکتیں
پاکستان میں کرونا وائرس کی تیسری لہر جاری ہے اور گزشتہ 24 گھنٹوں میں تین ہزار 667 نئے کیسز رپورٹ ہوئے ہیں۔
سرکاری اعداد و شمار کے مطابق ملک میں گزشتہ روز 41 ہزار 960 ٹیسٹ کیے گئے جن میں سے تین ہزار 667 ٹیسٹ مثبت آئے ہیں۔ یوں ٹیسٹ مثبت آنے کی شرح 8.7 فی صد رہی۔
اس طرح پاکستان میں کرونا وائرس کے مجموعی کیسز کی تعداد چھ لاکھ 26 ہزار 802 ہو گئی ہے۔
پاکستان میں ویکسی نیشن مہم ایک روز کے لیے اتوار کو معطل کی گئی ہے تاکہ ویکسی نیشن سینٹرز کو جراثیم کش اسپرے سے صاف کیا جا سکے۔
بھارت میں چار ماہ بعد کرونا کے ریکارڈ 43 ہزار 846 کیس
بھارت میں تقریباً چار ماہ بعد کرونا وائرس کے ریکارڈ 43 ہزار 846 یومیہ کیس سامنے آئے ہیں۔
بھارتی ذرائع ابلاغ کے مطابق پنجاب، مہاراشٹر، مدھیا پردیش اور تمل ناڈو جیسی ریاستوں میں کیسز کے تیزی سے بڑھنے کے باعث ان ریاستوں کے کئی اضلاع میں لاک ڈاؤن، تعلیمی اداروں کی بندش اور اجتماعات پر پابندیاں لگانے پر غور ہو رہا ہے۔
بھارت میں اتوار کو سامنے آنے والے اعدادوشمار کے مطابق 197 افراد اس مہلک وائرس کے باعث ہلاک بھی ہو گئے ہیں۔
حکام کے مطابق ریاست مہاراشٹر، پنجاب، کیرالہ، کرناٹک اور گجرات میں وائرس تیزی سے پھیل رہا ہے۔ صرف مہاراشٹر میں 27 ہزار سے زائد کیس رپورٹ ہوئے ہیں۔
جانز ہاپکنز یونیورسٹی کے اعدادوشمار کے مطابق بھارت میں اب تک ایک کروڑ 16 لاکھ کے لگ بھگ کیس جب کہ ایک لاکھ 59 ہزار سے زائد اموات ہو چکی ہیں۔
برطانیہ میں لاک ڈاؤن کے خلاف مظاہرے اور جھڑپیں
برطانیہ کے دارالحکومت لندن میں ہفتے کو کرونا وبا کے پیشِ نظر نافذ کردہ لاک ڈاؤن کے خلاف احتجاج کرنے والے مظاہرین اور پولیس کے درمیان جھڑپیں ہوئیں۔ مظاہرین نے پابندیوں کی خلاف ورزی کرتے ہوئے وسطی لندن میں مظاہرہ کیا جس پر پولیس نے 33 افراد کو گرفتار کر لیا۔
خبر رساں ادارے 'رائٹرز' کے مطابق مظاہرے میں لگ بھگ 10 ہزار لوگ شریک تھے جو "ہمارے بچوں کی زندگی تباہ نہ کرو" اور "فیک وبا" کے نعرے لگا رہے تھے۔
برطانیہ میں وبا کے سبب عائد کردہ پابندیوں کے دوران لوگوں کے اجتماع پر پابندی عائد ہے۔ تاہم رواں ہفتے ان پابندیوں کی مخالفت میں اضافہ دیکھا گیا ہے۔
خیال رہے کہ 60 سے زاائد برطانوی قانون سازوں نے وزیرِ داخلہ پریتی پٹیل کو جمعے کو لکھے گئے خط میں مطالبہ کیا تھا کہ لاک ڈاؤن کے دوران مظاہروں کی اجازت دی جائے اور مظاہروں میں حصہ لینا جرم نہیں ہونا چاہیے۔
امریکہ کی جانز ہاپکنز یونیورسٹی کے اعداد و شمار کے مطابق برطانیہ میں اب تک کرونا وبا کے 43 لاکھ چار ہزار 839 کیس جب کہ اس مہلک وائرس سے اب تک ایک لاکھ 26 ہزار سے زائد اموات ہو چکی ہیں۔