طورخم بارڈر 15 دن کے لیے بند
پاکستان اور افغانستان کے درمیان مصروف ترین گزر گاہ طورخم کو کرونا وائرس کے پھیلاؤ کے باعث شہریوں کی آمد و رفت کے لیے بند کر دیا گیا۔
عید الفطر سے قبل طورخم کو دو طرفہ آمد و رفت کے لیے آئندہ 15 دن کے لیے جمعرات سے بند کیا گیا ہے۔
وفاقی وزارتِ داخلہ کے اعلامیے کے مطابق ملک بھر میں عید الفطر کے دوران کرونا وائرس پر قابو پانے کے لیے لاک ڈاؤن کا اطلاق افغانستان کے ساتھ آمد و رفت پر بھی لاگو کیا گیا ہے۔
ضلع خیبر کے ڈپٹی کمشنر ارشد منصور کا کہنا ہے کہ 20 مئی تک کسی بھی پاکستانی باشندے کو افغانستان اور کسی بھی افغان باشندے کو پاکستان آنے کی اجازت نہیں ہو گی۔
امریکہ نے کرونا ویکسین کے 'پیٹنٹ' ختم کرنے کی حمایت کر دی
امریکہ نے کووڈ-19 سے بچاؤ کی ویکسین کے پیٹنٹ یعنی ویکسین تیار کرنے کے جملہ حقوق ختم کرنے کی حمایت کا اعلان کیا ہے جس کا مقصد ویکسین کی کمی اور اس ضمن میں عدم مساوات کو ختم کرنا ہے۔
صدر جو بائیڈن کی انتظامیہ کے اس اقدام کو عالمی وبا کے خلاف جنگ میں ایک اہم کامیابی قرار دیا جا رہا ہے۔
خیال رہے کہ کرونا ویکسین کی تیاری اور اس کی فروخت کے حوالے سے چند مخصوص کمپنیاں ہی ورلڈ ٹریڈ آرگنائزیشن (ڈبلیو ٹی او) میں رجسٹرڈ ہیں اور انہی کے پاس یہ لائسنس ہے کہ وہ اسے تیار اور فروخت کر سکتی ہیں۔
ان کمپنیوں میں امریکی دوا ساز کمپنیاں 'فائزر' اور 'موڈرنا' بھی شامل ہیں جو اس تجویز کی مخالفت کر رہی ہیں۔
البتہ، اس تجویز پر عمل درآمد کے بعد دیگر ممالک کی کمپنیاں بھی ویکسین کے فارمولے کو استعمال کر کے اس تیار اور فروخت کر سکیں گی تاکہ ویکسین کی فراہمی میں تیزی لائی جا سکے۔
عالمی ادارۂ صحت (ڈبلیو ایچ او) بھی عرصۂ دراز سے پیٹنٹ حقوق ختم کرنے پر زور دے رہا تھا۔ تاہم بڑی دوا ساز کمپنیاں اس تجویز کی مخالفت کرتی رہی ہیں۔
ادکارہ بشریٰ انصاری کی بہن سنبل شاہد کا کرونا سے انتقال
پاکستان کی معروف اداکارہ اور گلوکارہ بشری انصاری کی بہن سنبل شاہد کرونا وائرس کے باعث لاہور میں انتقال کر گئی۔
مقامی ذرائع ابلاغ کے مطابق سنبل شاہد کرونا کی وجہ سے گزشہ ایک ماہ سے لاہور کے کمبائنڈ ملٹری اسپتال (سی ایم ایچ) میں زیرِ علاج تھیں۔ سانس لینے میں دُشواری کی وجہ سے سنبل شاہد کو وینٹی لیٹر پر منتقل کر دیا گیا تھا۔
سنبل شاہد خود بھی اداکارہ تھیں اور مختلف ڈراموں میں اپنے فن کا مظاہرہ کر چکی تھیں۔
پرائیوٹ اسپتالوں کو کرونا ویکسین دی جائے گئی جو مفت میں لگائیں گے: وزیراعلیٰ سندھ
پاکستان کے صوبے سندھ کے وزیر اعلیٰ مراد علی شاہ کا کہنا ہے آج سے پرائیوٹ اسپتالوں کو کرونا ویکسین دی جائے گی اور وہ مفت میں لگائیں گے۔
مراد علی شاہ نے کہا کہ کل سے کراچی میں کرونا کے کیسز بڑھ رہے ہیں۔
ان کے بقول سندھ ہیلتھ ڈپارٹمنٹ نے پرائیوٹ اسپتالوں سے بات کی ہے۔