حکومت کی پی ٹی آئی کو سنگجانی میں ریلی کرنے کی اجازت کی پیش کش

بیلاروس کے صدر الیگزینڈر لوکا شینکو تین روزہ سرکاری دورے پر پاکستان پہنچ گئے ہیں۔ نور خان ایئر بیس پر وزیرِ اعظم شہباز شریف سمیت دیگر اعلٰی حکام نے بیلاروسی صدر کا استقبال کیا۔

حکام کے مطابق دورے میں صدر لوکا شینکو وزیرِ اعظم اور صدرِ پاکستان سے ملاقاتوں کے علاوہ باہمی تجارت سمیت دیگر شعبوں میں تعاون پر بھی تبادلۂ خیال کریں گے۔

پاکستان اور بیلاروس کے درمیان تجارت، زراعت اور صنعت سمیت دیگر شعبوں میں معاہدوں پر دستخط ہوں گے۔

اس سے قبل بیلاروس کا ایک 68 رُکن اعلٰی سطح کا وفد اتوار کو پاکستان پہنچا تھا۔

حکام کا کہنا ہے کہ اٹک میں پی ٹی آئی کے مظاہرین کے ساتھ جھڑپوں میں پنجاب پولیس کا ایک اہلکار ہلاک ہوگیا ہے۔

وفاقی وزیرِ داخلہ محسن نقوی نے اپنے بیان میں کہا ہے کہ کانسٹیبل مبشر پر تشدد کرنے والے مظاہرین کو قانون کی گرفت میں لایا جائے گا۔

پی ٹی آئی کا کہنا ہے کہ اس کے حامی پولیس پر تشدد میں ملوث نہیں ہیں۔

وزیرِ اعلیٰ خیبرپختونخوا علی امین گنڈا پور کی قیادت میں احتجاج کے لیے آنے والا قافلہ اسلام آباد کے قریب پہنچ گیا ہے۔

حسن ابدال کے نزدیک پی ٹی آئی کے قافلے میں شامل مظاہرین اور پولیس آمنے سامنے آگئے اور پولیس نے مظاہرین پر شیلنگ بھی کی ہے۔

اطلاعات کے مطابق ہکلہ انٹر چینج پر بھی پی ٹی آئی کے کارکن موجود ہیں۔

وزیرِ اطلاعات پنجاب کی پریس کانفرنس پر اپنے ردِ عمل میں ترجمان پی ٹی آئی نے کہا ہے کہ ہمارے کارکنوں نے خود پر ظلم کرنے والے پولیس اہل کاروں کو ہاتھ لگنے کے باوجود نہ صرف یہ کہ نقصان نہیں پہنچایا بلکہ انہیں آزاد کیا۔

پی ٹی آئی کے ترجمان نے اپنے بیان میں کہا ہے کہ من گھڑت شواہد کا جمعہ بازار لگانے والے آج تک نو مئی سے متعلق عدالت میں ایک بھی قابلِ بھروسہ ثبوت پیش نہیں کرسکے۔

ترجمان نے کہا کہ عوام اور پولیس کے مابین تصادم کی آڑ میں اپنی ناجائز سرکار کا دوام چاہتی ہے۔

انہوں نے کہا کہ پرامن احتجاج کے لیے نکلنے والے ہزاروں افراد پر مشتمل احتجاجی قافلہ مکمل طور پر پرامن اور مثالی نظم و ضبط سے ڈی چوک کی جانب بڑھ رہا ہے۔