روس کی کرنسی روبل کی قدر میں مسلسل کمی
یوکرین پر حملے کے بعد روس کی کرنسی روبل کی قدر میں مسلسل کمی ہو رہی ہے۔
خبر رساں ادارے ’رائٹرز‘ کے مطابق ایک ڈالر کے مقابلے میں روبل سو سے بھی نیچے چلا گیا ہے۔
دو مارچ کو روبل کی قدر میں مزید چار فی صد کم ہوئی جس سے ایک ڈالر مقابلے میں روبل کی قدر 105.2 ہو گئی ہے۔
دوسری جانب ایک یورو 117.9 روبل کا ہو گیا ہے۔
روس میں اسٹاک ایکسچینج بدستور بند
روس کا سب سے بڑا ماسکو اسٹاک ایکسچینج بدھ کو مسلسل تیسرے روز بھی بند رہے گا۔
روس میں حکام نے بین الاقوامی پابندیاں لگنے کے بعد پیر کو اسٹاک ایکسچینج میں ٹریڈنگ بند کر دی تھی۔
روس کے مرکزی بینک کا کہنا ہے کہ بدھ کو محدود پیمانے پر آپریشنز کی اجازت دی جا سکتی ہے۔
روس نے یوکرین کے جنوب میں بھی فوج اتار دی
برطانیہ کی وزارتِ دفاع نے روس کے یوکرین پر حملے کے حوالے سے خفیہ اداروں کی نئی رپورٹ جاری کی ہے۔
وزارتِ دفاع کی جاری کی گئی رپورٹ کے مطابق ایسی اطلاعات موصول ہوئی ہیں کہ روس نے یوکرین کے جنوب میں بھی فوج اتار دی ہے البتہ اب تک ماسکو کو زیادہ کامیابی نہیں مل سکی ہے۔
روس نے گزشتہ 24 گھنٹوں میں یوکرین کے شہروں خارکیف، کیف، ماریوپول اور چرنیہو کو فضائی حملوں اور گولہ باری میں نشانہ بنایا ہے۔
خارکیف میں پولیس اسٹیشن پر حملہ، ویڈیو جاری
یوکرین کی وزارتِ دفاع نے ایک ویڈیو جاری کی ہے جس میں خارکیف میں ایک سرکاری عمارت کی تباہی کے مناظر ہیں۔
وزارتِ دفاع کا کہنا ہے کہ روس نے میزائل کے ذریعے نیشنل پولیس بلڈنگ کو نشانہ بنایا گیا ہے۔
واضح رہے کہ خارکیف یوکرین کا دوسرا بڑا شہر ہے جس پر روس کی جارحیت جاری ہے۔