افغانستان کی صورتِ حال پر وزرائے خارجہ کا ورچوئل اجلاس آج ہو گا
افغانستان کی تیزی سے بدلتی ہوئی صورتِ حال پر امریکی وزیرِ خارجہ اینٹنی بلنکن کی میزبانی میں مختلف ممالک کے وزرائے خارجہ پیر کو آئندہ کے لائحہ عمل پر غور کے لیے ورچوئل اجلاس میں شرکت کریں گے۔
اتوار کو امریکی محکمۂ خارجہ کی جانب سے جاری کیے گئے اعلامیے کے مطابق امریکہ افغانستان کی صورتِ حال پر اہم شراکت داروں کے ساتھ مشاورت کرے گا۔
اعلامیے میں کہا گیا ہے کہ کینیڈا، جرمنی، فرانس، اٹلی، برطانیہ، قطر، ترکی، نیٹو ممالک اور یورپی یونین کے بعض ممالک کے نمائندے ورچوئل اجلاس میں شریک ہوں گے۔
یہ اجلاس ایسے وقت میں ہو رہا ہے جب امریکہ اور اتحادی افواج کا افغانستان سے انخلا حتمی مرحلے میں ہے۔
محکمہ خارجہ کے اعلامیے میں کہا گیا ہے کہ وزیرِ خارجہ بلنکن ورچوئل اجلاس کے اختتام پر افغانستان سے متعلق امریکی کاوشوں پر دیگر ممالک کو اعتماد میں لیں گے۔
بائیڈن کی کابل دھماکے میں ہلاک ہونے والے فوجیوں کے اہلِ خانہ سے ملاقات
امریکہ کے صدر جو بائیڈن نے خاتون اول جل بائیڈن کے ہمراہ کابل ایئرپورٹ دھماکے میں ہلاک ہونے والے 13 امریکی فوجیوں کے اہلِ خانہ سے ملاقات کی ہے۔
اس سے قبل صدر اور خاتون اول امریکی ریاست ڈیلاویئر کے ڈوور فضائی اڈے پر ان فوجیوں کے جسدِ خاکی اہلِ خانہ کے حوالے کرنے کے موقع پر بھی موجود تھے۔
خیال رہے کہ جمعرات کو کابل ایئرپورٹ کے باہر ہونے والے خوفناک خود کش حملے میں 13 امریکی فوجیوں سمیت 170 افراد ہلاک ہو گئے تھے جن میں اکثریت افغانستان سے نکلنے کے خواہش مند افغان شہریوں کی تھی۔
حملے میں ہلاک ہونے والے امریکی فوجیوں کی عمریں محض 20 سے 31 برس کے درمیان تھیں۔
پی آئی اے کا کارگو طیارہ ڈبلیو ایچ او کا امدادی سامان لے کر مزار شریف پہنچ گیا
افغانستان میں پاکستان کے سفیر منصور احمد خان نے کہا ہے کہ قومی ایئر لائن پی آئی اے کا ایک کارگو طیارہ عالمی ادارۂ صحت (ڈبلیو ایچ او) کی جانب سے افغانستان کے لیے بھجوائے گئے طبی سامان کی کھیپ لے کر مزار شریف پہنچ گیا ہے۔
منصور احمد خان کا کہنا تھا کہ عالمی اداروں کے تعاون سے افغانستان کی مدد کے لیے ضروری سامان کی فراہمی کے لیے مزار شریف میں ایئر برج بنایا گیا ہے۔
اس سے قبل کابل ایئر پورٹ پر حملے کے بعد ڈبلیو ایچ او نے خدشہ ظاہر کیا تھا کہ افغانستان کو طبی سامان کی اشد ضرورت ہو گی جس کے لیے مزار شریف میں پاکستان کی مدد سے ایئر برج بنانے کی کوشش کی جائے گی۔
منصور احمد خان نے مزار شریف کے لیے کارگو فلائٹ آپریٹ کرنے پر پی آئی اے کا شکریہ بھی ادا کیا۔
افغان طالبان کابل ایئر پورٹ کے قریب امریکی حملے پر معترض
افغان طالبان نے کابل ایئرپورٹ کے قریب امریکی فضائی کارروائی پر اعتراض اُٹھاتے ہوئے اسے بغیر اجازت دوسرے ملک پر حملہ قرار دیا ہے۔
چین کے سرکاری ٹی وی 'سی جی ٹی این' سے گفتگو کرتے ہوئے ترجمان طالبان ذبیح اللہ مجاہد نے کہا کہ اگر امریکہ کو کسی حملے کا خطرہ تھا تو اُنہیں پہلے ہمیں آگاہ کرنا چاہیے تھا۔
اُن کا کہنا تھا کہ اس امریکی حملے میں سات عام شہری بھی ہلاک ہوئے ہیں۔ لہذٰا امریکہ کی یہ کارروائی غیر قانونی اور دوسرے ملک میں مداخلت کے مترادف ہے۔
امریکی فوج نے اتوار کی صبح ایک بیان میں کہا تھا کہ اس نے کابل ایئرپورٹ کے لیے خطرہ بننے والی داعش خراسان کی ایک گاڑی کو افغان دارالحکومت میں نشانہ بنایا ہے۔
بعدازاں امریکی فوج کی سینٹرل کمانڈ کے ترجمان بل اربن نے ایک بیان میں کہا ہے کہ ہم فضائی کارروائی میں عام شہریوں کی ہلاکت سے متعلق آگاہ ہیں۔