روس اور چین کی دفاعی مشقیں ہفتہ بھر جاری رہیں گی

ایسے میں کہ جب روس اور بیجنگ کوامریکہ کے ساتھ کشیدگی کا سامنا ہے ، روس نے چین کے ساتھ دفاعی تعاون میں اضافے کے اظہار میں جمعرا ت کے روز جنگی مشقوں کا آغاز کر دیا ہے ۔

ایک ہفتے پر محیط ان مشقوں میں چین اور دوسرے ملک کی فورسز شامل ہوں گی جن کا مقصد یہ بھی ظاہر کرنا ہے کہ ماسکو بڑے پیمانے کی مشقوں کی کافی صلاحیت رکھتا ہے اس کے باوجود کہ اس کے فوجی یوکرین میں فوجی کارروائی میں مصروف ہیں ۔

روسی وزارت دفاع کا کہنا ہے کہ Vostok ووسٹوک 2022 مشق 7 ستمبر تک روس کے مشرق بعید اور بحیرہ جاپان میں سات فائرنگ رینجز پر منعقد کی جائے گی اور اس میں 50,000 سے زیادہ فوجی اور 5,000 ہتھیاروں کے یونٹ شامل ہوں گے، جن میں 140 طیارے اور 60 جنگی بحری جہاز شامل ہیں ۔

اومیکرون کے خلاف نیا مؤثر بوسٹر لگانے کی اجازت مل گئی

امریکی ریگولیٹرز نے کویڈ 19 کے اپ ڈیٹڈ بوسٹرز کی اجازت دےدی ہے، جو آج کے سب سے عام اومیکرون وائرس کو براہ راست نشانہ بنانے والے پہلے بوسٹرز ہیں جنہیں چند دنوں میں لگانا شروع کر دیا جائے گا۔

ایسو سی ایٹڈ پریس کے مطابق فوڈ اینڈ ڈرگ ایڈمنسٹریشن کی جانب سے بدھ کو کیا گیا اقدام فائزر اور موڈیرنا کے بنائے گئے شاٹس کی ترکیب کو بہتر بناتا ہے۔

امید ہے کہ ترمیم شدہ بوسٹر موسم سرما میں اس وائرس کے ایک اور اضافے کو ختم کردے گا۔

اب تک، ویکسینز صرف اصل کورونا وائرس کو نشانہ بنا رہی تھیں ۔نئے بوسٹرزکا نصف حصہ اصل نسخے اور نصف تازہ ترین اومیکرون وائرس کے خلاف تحفظ سے متعلق نئے نسخے پر مشتمل ہے ۔

شاٹس شروع ہونے سے پہلے، بیماریوں کے کنٹرول اور روک تھام کے مراکز یہ تجویز کریں گے کہ کہ اضافی خوراک کس کو ملنی چاہیے۔ سی ڈی سی کے مشیر جمعرات کو اس پر بحث کریں گے۔

ایران: جوہری معاہدے کی بحالی کے لیے زیاد ہ مضبوط امریکی ضمانتیں درکار ہیں

ایرانی وزیر خارجہ حسین امیر عبداللہیان کا کہنا ہے کہ ان کے ملک کو 2015 کے جوہری معاہدے کی بحالی کے لیے واشنگٹن سے پہلے سے زیادہ مضبوط ضمانتوں کی ضرورت ہے، اور اس بات کا اعادہ کیا کہ اقوام متحدہ کے جوہری نگران ادارے کو تہران کے جوہری کام کے بارے میں اپنی "سیاسی طور پر محرک تحقیقات" کو ختم کر دینا چاہیے۔

بدھ کے روز ماسکو کے دورے کے دوران جہاں انہوں نے روسی وزیر خارجہ سرگئی لاوروف سے ملاقات کی ، امیر عبداللہیان نے کہا کہ تہران جوہری معاہدے کی بحالی کے لیے یورپی یونین کے متن پر واشنگٹن کے ردعمل کا " احتیاط سے" جائزہ لے رہا ہے۔

اقوام متحدہ کا جوہری توانائی کا نگران ادارہ ایران کے تین غیر اعلان شدہ مقامات پر پائے جانے والے جوہری مواد کے ماخذ کے بارے میں چھان بین کر رہا ہے۔

آئی ایم ایف سری لنکا کو بحران سے نکلنے میں مدد کے لیے دو ارب 90 کروڑ ڈالر فراہم کرے گا

بین الاقوامی مالیاتی فنڈ ، آئی ایم ایف نے جمعرات کو اعلان کیا کہ وہ سری لنکا کو اس کے بد ترین اقتصادی بحران سے نکالنے میں مدد کے لیے ایک ابتدائی معاہدے کے تحت چار سال کی مدت میں 2 اعشاریہ 9 ارب ڈالر فراہم کرے گا۔

سری لنکا کا دورہ کرنے والی آئی ایم ایف ٹیم نے ایک بیان میں کہا کہ یہ انتظام مالی اور معاشی استحکام اور قرضوں کی پائیداری کو بحال کرنے کے ساتھ ساتھ ملک کی ترقی کی صلاحیت کو از سر نو فعال کرنے کے لیے کام کرے گا ۔

ٹیم نے کہا ہے کہ اس پیکیج کا انحصار آئی ایم ایف کے انتظامی اور ایکزیکیو بورڈ سے منظوری اور سری لنکا کے قرض دہندگان کی طرف سے مالیاتی یقین دہانیوں سے مشروط ہے ، جن میں چین ،بھارت اور جاپان جیسے ملک شامل ہیں۔

سری لنکا غیر ملکی کرنسی کی شدید قلت کے باعث ضروری اشیا ء مثلاً ایندھن ، ادویات اور خوراک کی شدید قلت کا سامنا کر رہا ہے ۔ ملک نے اس سال واجب الادا لگ بھگ سات ارب ڈالر کے غیر ملکی قرض کی ادائیگی معطل کر دی ہے ۔ اس کا کل غیر ملکی قرض 51 ارب ڈالر سے زیادہ ہے ۔ اس کی معیشت متوقع طور پر 8 اعشاریہ سات فیصد تک سکڑ سکتی ہے اور اس کاافراط زر 60 فیصد سے تجاوز کر چکا ہے۔