کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

عدالت اللہ اور پاکستان کے نام پر پارلیمنٹ کو بحال کرے: شہباز شریف

مسلم لیگ (ن) کے صدر شہباز شریف نے کہا ہے کہ اگر ڈپٹی اسپیکر کی رولنگ غلط ہے تو پارلیمنٹ کو بحال کیا جائے۔

ڈپٹی اسپیکر رولنگ کیس کی سماعت کے دوران چیف جسٹس نے شہباز شریف کو بھی روسٹرم پر بلا لیا۔

شہباز شریف نے کہا کہ وہ عام آدمی ہیں، قانونی بات نہیں کریں گے۔ عدالت میں پیش ہونا اُن کے لیے اعزاز کی بات ہے۔

رہنما مسلم لیگ (ن) نے مزید کہا کہ رولنگ ختم ہونے پر تحریکِ عدم اعتماد بحال ہو جائے گی۔ اسپیکر کی رولنگ کالعدم ہو تو اسمبلی کی تحلیل ازخود ختم ہو جائے گی۔

شہباز شریف کا کہنا تھا کہ ہماری تاریخ میں آئین کئی مرتبہ پامال ہوا، جو بلنڈر ہوئے ان کی توثیق اور سزا نہ دیے جانے کی وجہ سے یہ حال ہوا۔ عدالت اللہ اور پاکستان کے نام پر پارلیمنٹ کو بحال کرے۔

چیف جسٹس نے ریمارکس دیے کہ سری لنکا میں بجلی اور دیگر سہولیات کے لیے بھی پیسہ نہیں بچا۔ آج روپے کی قدر کم ہوگئی، ڈالر 190 تک پہنچ چکا ہے۔ ہمیں مضبوط حکومت درکار ہے۔

’ججز کے سامنے وہ مواد ہونا چاہیے جس کی وجہ سے اسپیکر نے رولنگ دی‘

پاکستان تحریکِ انصاف کے رہنما فواد چوہدری نے کہا کہ ججز کے سامنے وہ مواد ہونا چاہیے جس کی وجہ سے اسپیکر نے رولنگ دی۔

قومی اسمبلی میں وزیرِ اعظم عمران خان کے خلاف تحریکِ عدم اعتماد پر ڈپٹی اسپیکر کی رولنگ پر سپریم کورٹ میں ازخود نوٹس کی سماعت کے حوالے سے فواد چوہدری نے سوال اٹھایا کہ اگر ججز نے دستاویزات اور شہادتیں ہی نہیں دیکھنیں تو وہ رولنگ کے درست یا غلط ہونے کا فیصلہ کیسے کریں گے؟

انہوں نے تجویز دی کہ ان کیمرہ کارروائی میں شہادتوں کا جائزہ لیا جائے۔ ان کے بقول ورنہ آزادی کا سفر 1940 سے دوبارہ شروع کرنا ہوگا۔

اپوزیشن نے اسپیکر پنجاب اسمبلی کے خلاف تحریکِ عدم اعتماد جمع کرا دی

پنجاب اسمبلی میں اپوزیشن اراکین نے اسپیکر پنجاب اسمبلی چوہدری پرویز الہٰی کے خلاف تحریکِ عدم اعتماد جمع کرا دی۔

اسپیکر کے خلاف عدم اعتماد کی تحریک جمع کروانے اپوزیشن کے اراکین اسمبلی سمیع اللہ، طاہر خلیل سندھو، پیر اشرف رسول، خواجہ سلمان رفیق، مرزا جاوید اور میاں عبدالرؤف پنجاب اسمبلی پہنچے۔

اپوزیشن نے تحریکِ عدم اعتماد پنجاب اسمبلی کے اسپیشل سیکریٹری چودھری عامر حبیب کو جمع کروائی۔

نگران وزیرِ اعظم کا تقرر؛ عمران خان نے پارلیمانی کمیٹی کے لیے چار نام تجویز کر دیے

وزیرِ اعظم عمران خان نے نگران وزیرِ اعظم کے تقرر کے لیے تحلیل کی گئی قومی اسمبلی کے اسپیکر اسد قیصر کے خط کے جواب میں چار نام تجویز کر دیے ہیں۔

عمران خان نے اسپیکر کو ارسال کیے گئے خط میں اسد عمر، پرویز خٹک، شفقت محمود اور ڈاکٹر شیریں مزاری کے نام تجویز کیے ہیں۔

قبل ازیں عمران خان نے سپریم کورٹ کے سابق چیف جسٹس گلزار احمد کو نگران وزیرِ اعظم بنانے کی تجویز دی تھی البتہ تحلیل کی گئی قومی اسمبلی میں اپوزیشن لیڈر شہباز شریف نے ایسی کسی بھی مشاورت کا حصہ بننے سے انکار کر دیا تھا۔

قائد حزبِ اختلاف شہباز شریف نے مؤقف اختیار کیا تھا کہ وزیرِ اعظم کے خلاف تحریکِ عدم اعتماد پر ڈپٹی اسپیکر کی رولنگ اور اس کے بعد اسمبلی کی تحلیل سمیت تمام اقدامات غیر آئینی ہیں۔