امریکہ کی وزیرِ اعظم شہباز شریف کو مبارک باد، نئی حکومت کے ساتھ کام کرنے کا عزم
امریکہ نے پاکستان کے نو منتخب وزیرِ اعظم شہباز شریف کو عہدہ سنبھالنے پر مبارک باد پیش کی اور اس عزم کا اظہار کیا ہے کہ واشنگٹن اسلام آباد حکومت کے ساتھ مل کر کام کرنے کا خواہاں ہے۔
امریکی محکمۂ خارجہ نے ایک بیان میں کہا ہے کہ گزشتہ 75 برسوں کے دوران پاکستان امریکہ کا اہم شراکت دار رہا ہے اور ہم اس تعلق کو اہمیت دیتے ہیں۔
امریکہ کی جانب سے شہباز شریف کو ایسے موقع پر مبارک باد کا پیغام بھیجا گیا ہے جب سابق وزیرِ اعظم عمران خان کی جانب سے امریکہ پر تواتر سے الزامات لگائے گئے کہ ان کی حکومت گرانے کی سازش امریکہ نے کی ہے جس کے آلہ کار مقامی لوگ بنیں ہیں۔
تاہم امریکہ نے بارہا ان الزامات کی تردید کی اور کہا کہ عمران خان کے بیانات میں کوئی صداقت نہیں ہے۔
فارن فنڈنگ کیس کا فیصلہ 30 روز میں سنایا جائے: اسلام آباد ہائی کورٹ
اسلام آباد ہائی کورٹ نے الیکشن کمیشن آف پاکستان کو حکم دیا ہے کہ تحریکِ انصاف کے فارن فنڈنگ کیس کا فیصلہ 30 روز میں سنایا جائے۔
اسلام آباد ہائی کورٹ کے جج جسٹس محسن اختر کیانی نے تحریکِ انصاف کی درخواست مسترد کرتے ہوئے پارٹی کے بانی رُکن اکبر ایس بابر کو اس کیس کی پیروی سے روکنے کی استدعا بھی مسترد کر دی۔
عدالت نے حکم دیا کہ الیکشن کمیشن درخواست گزار اکبر ایس بابر کی درخواست پر 30 دن کے اندر فیصلہ سنائے۔
خیال رہے کہ تحریکِ انصاف کو ملنے والی فارن فنڈنگ میں ممنوعہ فنڈنگ کے الزامات لگاتے ہوئے پارٹی کے بانی رُکن اکبر ایس بابر نے 2014 میں الیکشن کمیشن میں درخواست دائر کی تھی۔
پاکستان تحریک انصاف نے 25 جنوری اور 31 جنوری کو دائر درخواستیں مسترد کرنے کا الیکشن کمیشن کا فیصلہ اسلام آباد ہائی کورٹ میں چیلنج کیا تھا جہاں سماعت کے بعد آج عدالت نے تحریری فیصلہ جاری کر دیا۔
جسٹس محسن اختر کیانی نے تحریری فیصلہ جاری کرتے ہوئے پاکستان تحریک انصاف کی اکبر ایس بابر کے خلاف درخواست خارج کر دی اور اس بارے میں الیکشن کمیشن کا فیصلہ برقرار رکھا ہے۔
پاکستان تحریک انصاف کے خلاف ممنوعہ فارن فنڈنگ کیس نومبر 2014 سے الیکشن کمیشن میں زیر سماعت ہے اور پی ٹی آئی کئی برسوں سے اس کیس میں التوا مانگتی رہی ہے لیکن اب عدالت نے اس کیس میں 30 دن کا وقت دیا ہے۔
ڈی جی آئی ایس پی آر کی پریس کانفرنس جمہوریت کے لیے تازہ ہوا کا جھونکا ہے: بلاول بھٹو
چیئرمین پیپلزپارٹی بلاول بھٹو زرداری کا کہنا ہے کہ ڈی جی آئی ایس پی آر کی پریس کانفرنس جمہوریت کے لیے تازہ ہوا کا جھونکا ہے۔
اپنی ٹوئٹ میں بلاول بھٹو کا کہنا تھا کہ یہ صرف کسی ادارے کی نہیں بلکہ ہر پاکستانی کی ذمے داری ہے کہ وہ جمہوریت، آئین اور قانون کی بالادستی کی حمایت کرے۔
تحریکِ انصاف کے 123 اراکینِ اسمبلی کے استعفے منظور کر لیے: قاسم سوری
ڈپٹی اسپیکر قومی اسمبلی قاسم سوری نے تحریکِ انصاف کے 123 اراکینِ قومی اسمبلی کے استعفے منظور کر لیے ہیں۔
ڈپٹی اسپیکر قومی اسمبلی نے ایک ٹوئٹ میں کہا کہ یہ اراکینِ اسمبلی خودمختار پاکستان اور امریکی سازش کو ناکام بنانے کے لیے کھڑے ہو گئے جس پر وہ خراجِ تحسین کے مستحق ہیں۔