کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

نواز شریف کی وطن واپسی ہمارے نظامِ انصاف کا امتحان ہو گی: عمران خان

سابق وزیرِ اعظم عمران خان نے ایک بار پھر الزام عائد کیا کہ ضمانت پر باہر آنے والے شخص جس پر اربوں روپے کی کرپشن کے الزامات ہیں اسے ہم پر مسلط کر دیا گیا ہے۔

جلسے سے خطاب کے دوران عمران خان نے الزام عائد کیا کہ اس ساری سازش کے ماسٹر مائنڈ نواز شریف ہیں۔ وہ قانون سے جھوٹ بول کر ملک سے باہر گئے اس سے پہلے مشرف کے دور میں بھی وہ جھوٹ بول کر باہر گئے تھے۔

اُن کا کہنا تھا کہ اب نواز شریف واپسی کی تیاری کر رہے ہیں اور یہ پاکستان کے سارے نظامِ انصاف کا امتحان ہے۔ پوری قوم دیکھ رہی ہے کہ کیا ہمارا نظامِ انصاف نواز شریف کو قانون کی گرفت میں لے گا یا نہیں۔

ساری قوم باہر نکل کر فوری الیکشن کا مطالبہ کرے: عمران خان

سابق وزیرِ اعظم عمران خان نے ایک بار پھر لفظ نیوٹرل کا تذکرہ کرتے ہوئے کہا کہ اللہ کا حکم ہے کہ تم چوروں اور ڈاکوؤں کے خلاف جہاد کرو۔ آپ راہِ حق پر چلو۔

اُن کا کہنا تھا کہ ہم نے کہا ہے کہ جوڈیشل کمیشن بیٹھے چیف جسٹس کی سربراہی میں اور فیصلہ کرے کے یہ مراسلہ ٹھیک ہے یا نہیں۔

عمران خان کا کہنا تھا کہ سارے پاکستانی نکلیں اور ایک مطالبہ کریں کہ ہمیں الیکشن چاہیے۔

اُن کے بقول شہباز شریف کبھی جلدی الیکشن نہیں کرائیں گے بلکہ وہ پہلے ہر قسم کی انتقامی کارروائی کریں گے۔

عمران خان بولے کہ فارن فنڈنگ کیس جو تحریکِ انصاف پر ڈالا ہے اس سے یہ کوشش کی جائے گی کہ تحریکِ انصاف میچ سے ہی باہر ہو جائے۔

عمران خان کا کہنا تھا کہ میں یہ چاہتا ہوں کہ تحریکِ انصاف، مسلم لیگ (ن) اور پیپلزپارٹی کا فارن فنڈنگ کیس ایک ساتھ سنا جائے۔

اُن کا کہنا تھا کہ موجودہ حکومت الیکشن کمیشن، بیورو کریسی میں اپنے لوگ لائیں گے اور کوشش کریں گے کہ دھاندلی کر کے دوبارہ آ جائیں۔

سابق وزیرِ اعظم کا مزید کہنا تھا کہ ہم مضبوط ادارے چاہتے ہیں، کیوں کہ مضبوط اداروں سے مضبوط قوم بنتی ہے۔

عمران خان کے نجی طیارے کے استعمال پر احسن اقبال کی تنقید

وفاق میں برسرِ اقتدار پاکستان مسلم لیگ (ن) کے رہنما احسن اقبال کا کہنا ہے کہ انہیں اینگرو کارپوریشن کی طرف سے یہ انتہائی غیر پیشہ وارانہ لگا ہے کہ ان کا طیارہ ایک سیاسی رہنما حکومت مخالف ریلی کے لیے استعمال کر رہا ہے۔

احسن اقبال کا سوشل میڈیا پوسٹ میں کہنا تھا کہ قطع نظر اس کے کہ یہ طیارہ چارٹرڈ تھا یا اسپانسر، براہ کرم ایک پبلک لسٹڈ کمپنی ہونے کی وجہ سے کمپنی کو اپنی حدود معلوم ہونی چاہیئں۔

خیال رہے کہ یہ نجی طیارہ گزشتہ روز سابق وزیرِ اعظم عمران خان نے کراچی میں ہونے والے جلسے میں شرکت کے لیے استعمال کیا تھا۔

’عمران خان کے ٹولے کی کرپشن سامنے آئی تو لوگ کانوں کو ہاتھ لگائیں گے‘

پاکستان پیپلز پارٹی (پی پی پی) کے رہنما سعید غنی کا کہنا ہے کہ عمران خان کے ٹولے کی کرپشن سامنے آئے گی تو لوگ کانوں کو ہاتھ لگائیں گے۔

کراچی میں صحافیوں سے گفتگو میں سعید غنی کا کہنا تھا کہ کراچی میں ہونے والے پی ٹی آئی کے جلسے میں 20 ہزار سے زائد لوگ شریک نہیں تھے۔

سعید غنی کا مزید کہنا تھا کہ پی ڈی ایم بنانے اور عدم اعتماد لانے میں پیپلز پارٹی کا اہم کردار ہے۔

انہوں نے مزید کہا کہ عمران خان نے توشہ خانے سے سستے داموں تحائف لے کر مہنگے بیچ دیے اور اگر توشہ خانے کے معاملے پر سابق وزیرِ اعظم یوسف رضا گیلانی اور سابق صدر آصف علی زرداری پر کیسز بن سکتے ہیں تو عمران خان کیا آسمان سے اترے ہیں۔

سعید غنی کا کہنا تھا کہ پاکستانی قانون کے مطابق کوئی بھی سیاسی جماعت بیرونی فنڈنگ نہیں لے سکتی۔ ان کے بقول عمران خان، اسپیکر و ڈپٹی اسپیکر اور صدر نے آئین توڑا ہے۔