طیارہ معمول کے مطابق پرنسلے جیٹس کو دیا گیا تھا: اینگرو
اینگرو کارپوریشن کا گزشتہ روز سابق وزیرِ اعظم عمران خان کے استعمال کردہ طیارے کے حوالے سے، جو کراچی میں ہونے والے جلسے کے لیے استعمال ہوا تھا، میڈیا میں چلنے والی قیاس آرائیوں کی وضاحت دیتے ہوئے کہنا ہے کہ وہ جہاز اینگرو فرٹیلائزر کی ملکیت ضرور ہے تاہم یہ طیارہ پرنسلے جیٹس کو معمول کی پریکٹس کے طور پر دیا گیا تھا۔
اینگرو کا سوشل میڈیا پوسٹ میں مزید کہنا تھا کہ اینگرو نے فلائٹ سے متعلق کوئی خرچہ برداشت نہیں کیا۔
گورنر پنجاب کی وزیرِ اعلیٰ حمزہ شہباز سے حلف لینے پر آئینی ماہرین سے مشاورت
گورنر پنجاب عمر سرفراز چیمہ نے نو منتخب وزیراعلیٰ پنجاب حمزہ شہباز سے حلف لینے سے متعلق ابھی کوئی فیصلہ نہیں کیا۔
گزشتہ روز منتخب ہونے والے حمزہ شہباز سے حلف لینے کا فیصلہ سیکریٹری پنجاب اسمبلی سے طلب کی گئی رپورٹ حاصل ہونے کے بعد کیا جائے گا۔
خیال رہے کہ گزشتہ روز وزیرِ اعلیٰ پنجاب کے انتخاب کے موقع پر پنجاب اسمبلی میں ہنگامہ آرائی دیکھنے میں آئی تھی۔
گورنر پنجاب اس حوالے سے فیصلہ آئینی ماہرین اور قائدین سے مشاورت کے بعد کریں گے اور گورنر نے آئینی ماہرین سے مشاورت کے لیے دوبارہ اجلاس طلب کر لیا ہے۔
کراچی میں پی ٹی آئی کا جلسہ، مسلم لیگ (ن) کی تنقید
پاکستان مسلم لیگ (ن) کی رہنما مریم اورنگزیب نے کہا ہے کہ عمران خان کو کراچی جاکر جھوٹ بولنے اور غداری کے سرٹیفکیٹ جاری کرنے کے بجائے یہ بتانا تھا کہ پونے چار سال میں انہوں نے کراچی کے لیے کیا کیا ؟
سوشل میڈیا پر ایک پوسٹ میں کراچی میں تحریکِ انصاف کے جلسے پر تنقید کرتے ہوئے مریم اورنگزیب نے کہا کہ عمران خان نے سب سے زیادہ ٹیکس دینے والے شہر اور ملک کی معاشی شہہ رگ کے ساتھ اپنے دور اقتدار میں کیا کیا؟
سابق وزیرِ اعظم سے سوال پوچھتے ہوئے انہوں نے مزید کہا کہ کیا وہاں کے لوگوں کو پینے کا پانی دیا؟ اعلان کرکے پیکج کے پیسے روک لیے۔
ان کا کہنا تھا کہ عمران خان کو مخاطب کرتے ہوئے کہا کہ ملک کا مزید وقت ضائع نہ کریں۔
گورنر پنجاب کا وزیرِ اعلیٰ پنجاب کی تقریبِ حلف برداری مؤخر کرنے کا اعلان
گورنر پنجاب عمر سرفراز چیمہ نے نو منتخب وزیرِ اعلیٰ پنجاب حمزہ شہباز کی حلف برداری کی تقریب کو گزشتہ روز پنجاب اسمبلی میں ہونے والی ہنگامہ آرائی کی وجہ سے فی الحال مؤخر کر دیا ہے۔
لاہور میں صحافیوں سے گفتگو میں عمر سرفراز چیمہ کا کہنا تھا کہ اس سلسلے میں اسپیکر اسمبلی اور آئینی ماہرین سے آرا مانگی گئی ہے اور تب تک حلف برداری کی تقریب کو مؤخر کیا گیا ہے۔
ان کا کہنا تھا کہ گزشتہ روز جو کچھ اسمبلی میں ہوا وہ شرم ناک ہے۔
گورنر پنجاب عمر سرفراز چیمہ کا کہنا تھا کہ معزز اراکان پارلیمنٹ پر تشدد ہوا۔ ان کے بقول حمزہ شہباز کا انتخاب متنازع ہے۔
انہوں نے کہا کہ جس طرح سے کل وزیرِ اعلیٰ کا انتخاب ہوا اس سے ایک غلط روایت سیٹ ہونے جا رہی ہے۔ اس واقعے کی جتنی بھی مذمت کی جائے، کم ہے۔
عمر سرفراز کا کہنا تھا کہ اگر حمزہ شہباز کے پاس اتنی تعداد موجود تھی تو انہیں تحمل سے کام لینا چاہیے تھا۔ حمزہ شہباز کا انتخاب ان کے گھر کے لوگوں نے متنازع بنایا۔