روس میں متاثرہ افراد کی تعداد 30 لاکھ سے متجاوز
روس میں کرونا وائرس سے متاثر ہونے والے افراد کی تعداد 30 لاکھ سے تجاوز کر گئی۔
گزشتہ 24 گھنٹوں میں مزید 29 ہزار سے زائد افراد میں وبا کی تشخیص ہوئی جس کے بعد روس میں عالمی وبا کا شکار ہونے والے افراد کی تعداد 30 لاکھ 21 ہزار 964 ہو گئی ہے۔
اعداد و شمار کے مطابق 24 گھنٹوں میں مزید 567 اموات رپورٹ کی گئیں۔
امریکہ کی 'جان ہاپکنز یونیورسٹی' کے مطابق روس میں اس وبا کے سبب اب تک 53 ہزار سے زائد ہلاکتیں ہو چکی ہیں۔
پاکستان میں کرونا ویکسین مارچ میں ملنے کا امکان
پاکستان میں گزشتہ ڈھائی ماہ سے چین میں بنائی گئی کرونا ویکسین کی آزمائش جاری ہے۔ بڑے پیمانے پر جاری تجربات میں ہزاروں رضاکار شریک ہیں۔ لیکن حکام کا کہنا ہے کہ ویکسین کے لیے کم از کم اگلے سال مارچ تک انتظار کرنا ہوگا۔ ویکسین کی تیاری اور دستیابی کے لیے جاری کوششوں پر لاہور سے ضیاء الرحمٰن کی رپورٹ۔
موڈرنا ویکسین کے ری ایکشن کے ایک کیس کی اطلاعات
امریکہ کی ریاست میسا چوسٹس کے شہر بوسٹن میں ایک ڈاکٹر کو موڈرنا کمپنی کی کرونا ویکسین جمعرات کو لگائے جانے کے بعد اس کا ری ایکشن جمعے کو سامنے آیا ہے۔
امریکی اخبار ‘نیو یارک ٹائمز’ کے مطابق ڈاکٹر حسین صدر زادہ جو کہ بوسٹن میڈیکل سینٹر سے وابستہ ہیں، کا کہنا تھا کہ ویکسین لگوانے کے فوری بعد اس کا شدید ری ایکشن ہونے لگا اور انہیں چکر آنے لگے۔ جب کہ ان کے دل کی دھڑکن بھی تیز ہو گئی۔
موڈرنا ویکسین کا ری ایکشن پہلی بار سامنے آیا ہے۔ اس ویکسین کے امریکہ میں لگانے جانے کا عمل رواں ہفتے شروع کیا گیا ہے۔
خیال رہے کہ امریکہ کی فوڈ اینڈ ڈرگ ریگولیٹری ایڈمنسٹریشن (ایف ڈی اے) کے حکام کا پچھلے ہفتے کہنا تھا کہ وہ فائزر اور بائیو این ٹیک کی کرونا ویکسین کے پانچ ری ایکشن کیسز کی تحقیقات کر رہی ہے۔
ترکی آمد کے لیے کرونا ٹیسٹ کی منفی رپورٹ لازمی قرار
ترکی کے وزیرِ صحت کا کہنا ہے کہ آئندہ ہفتے پیر سے ترکی آنے والوں مسافروں کے لیے کرونا کا منفی ٹیسٹ لازمی ہو گا۔ جو کہ سفر سے 72 گھنٹے پہلے کیا گیا ہو۔
وزیرِ صحت فرحتین کوکا کا کہنا تھا کہ جو مسافر کرونا کے پی سی آر ٹیسٹ کی منفی رپورٹ دکھائیں گے صرف ان کو ہی ترکی آنے والی فلائٹوں پر سوار ہونے دیا جائے گا۔
ان کا مزید کہنا تھا کہ برطانیہ، جنوبی افریقہ اور ڈنمارک سے آنے والے مسافروں کے لیے کرونا کے منفی ٹیسٹ رپورٹ کے ساتھ ساتھ ترکی پہنچنے پر قرنطینہ میں جانا ہوگا۔