کرونا کی احتیاط: جو بائیڈن کی حلف برداری کے دوران پریڈ کی تقریب آن لائن ہو گی
امریکہ کے نومنتخب صدر جو بائیڈن کی حلف برداری کی تقریب کے منتظمین نے اعلان کیا ہے کہ حلف برداری کے روز امریکہ بھر میں پریڈز منعقد کی جائیں گی جن میں ہجوم پر پابندی ہو گی اور یہ آن لائن ٹیلی کاسٹ کی جائیں گی۔
بیس جنوری کی حلف برداری کے دوران منتخب صدر جو بائیڈن اپنی اہلیہ جل بائیڈن اور منتخب نائب صدر کاملا ہیرس اور ان کے شوہر ڈگ ایم ہاف سماجی دوری کا خیال رکھتے ہوئے ملٹری پریڈ کا معائنہ کریں گے۔
بائیڈن کو واشنگٹن ڈی سی کی 15ویں اسٹریٹ سے صدارتی دستہ وائٹ ہاؤس تک لے جائے گا، جس میں فوج کی ہر شاخ کے نمائندے شرکت کریں گے۔
حلف برداری تقریب کے منتظمین کے مطابق یہ تقریب بھی سماجی دوری کے اصولوں پر عمل کرتے ہوئے منعقد ہو گی۔
واشنگٹن میں پاکستانی سفارت خانہ کرونا کے خطرے کے باعث تین روز کے لیے بند
واشنگٹن میں قائم پاکستانی سفارت خانے میں کرونا وائرس کا ایک ممکنہ مریض سامنے آنے کے بعد اسے تین روز کے لیے بند کر دیا گیا ہے۔
سفارت خانے کے جاری کردہ ایک نوٹی فکیشن کے مطابق چار سے چھ جنوری تک سفارت خانے میں قونصلر آفس کی خدمات سمیت تمام سرگرمیاں معطل رہیں گی۔ تاہم اس دوران ویزہ کے اجرا اور پاسپورٹ کی تجدید کی آن لائن خدمات بدستور جاری رہیں گی۔
نوٹی فکیشن کے مطابق سفارت خانے کی بندش کے دوران پوری عمارت میں جراثیم کش اسپرے کیا جائے گا اور تمام عملے کے کرونا ٹیسٹ لیے جائیں گے۔ جس کے بعد ہی سفارت خانے میں سرگرمیاں دوبارہ شروع کرنے کا فیصلہ کیا جا سکے گا۔
نوٹی فکیشن کے مطابق اس دوران ویزہ اور پاسپورٹ کی تجدید کے لیے کی گئی ای میل کے جواب بھی دیے جائیں گے اور ضروری اقدامات بھی کیے جائیں گے۔
میکسیکو میں کرونا ویکسین کے استعمال کی اجازت
میکسیکو نے دوا ساز کمپنی ایسٹرا زینیکا اور یونیورسٹی آف آکسفورڈ کی مشترکہ طور پر تیار کردہ کرونا وائرس ویکسین کو ملک میں ہنگامی طور پر استعمال کی اجازت دے دی ہے۔
میکسیکو کرونا وائرس سے بدترین متاثرہ ممالک میں سے ایک ہے جہاں وبائی مرض سے بڑے پیمانے پر اموات ہو چکی ہیں۔
نائب وزیرِ صحت ہیوگو لوپیز گیٹیل نے ٹوئٹر پر جاری ایک اعلان میں کہا ہے کہ میکسیکو کی دوا ساز کمپنیوں کے نگراں ادارے نے ایسٹرا زینیکا اور آکسفورڈ کی تیار کردہ ویکسین کی منظوری دی ہے اور یہ ویکسین ممکنہ طور پر مارچ میں دستیاب ہو گی۔
اس ویکسین کے استعمال کی اجازت میکسیکو سے قبل برطانیہ، بھارت اور ارجنٹائن کی حکومتیں بھی دے چکی ہیں۔
میکسیکو میں 24 دسمبر کو فائزر اور بائیو این ٹیک ویکسین کی مہم شروع کی گئی تھی جس کے تحت پہلے مرحلے میں طبی کارکنوں کو ویکسین لگائی گئی تھی۔ اب تک مجموعی طور پر 30 ہزار کارکنوں کو یہ ویکسین دی جا چکی ہے۔
میکسیکو نے ایسٹرا زینیکا کے ساتھ ویکسین کی سات کروڑ 74 لاکھ خوراکیں خریدنے کا معاہدہ کیا ہے۔ حکومت نے تقریباً 12 کروڑ 90 لاکھ افراد کو یہ ویکسین مفت فراہم کرنے کا وعدہ کیا ہے۔
برطانیہ میں دوبارہ لاک ڈاؤن نافذ
برطانیہ میں ایک مرتبہ پھر لاک ڈاؤن نافذ کر دیا گیا ہے جس کے تحت تمام اسکولز اور غیر ضروری دکانوں کو بند کیا جا رہا ہے۔
برطانوی وزیرِ اعظم بورس جانسن نے عوام کو ہدایت کی ہے کہ وہ فروری کے وسط تک گھروں سے باہر نکلنے سے اجتناب کریں۔
بورس جانسن نے پیر کو قوم سے خطاب میں کہا کہ اگر ہر فرد حکومتی ہدایات پر عمل کرے تو وہ امید کرتے ہیں کہ لاک ڈاؤن جلد اٹھا لیا جائے گا۔
وزیرِ اعظم جانسن نے لاک ڈاؤن کا اعلان ایسے موقع پر کیا ہے جب ایک روز قبل ہی محکمۂ صحت کے حکام نے تصدیق کی تھی کہ کرونا وائرس کی دوسری قسم تیزی سے سرایت کر رہی ہے اور یہ عالمی وبا سے زیادہ خطرناک ہے۔
یاد رہے کہ برطانیہ میں صحت کے شعبے سے وابستہ افراد اور بزرگوں کو کرونا وائرس کی ویکسین لگانے کا سلسلہ بھی جاری ہے۔