پاکستان میں کرونا کے مزید 958 کیس، 47 اموات
پاکستان میں کرونا وائرس کے مزید 958 کیس رپورٹ ہوئے ہیں جس کے بعد وبا کا شکار ہونے والے افراد کی مجموعی تعداد پانچ لاکھ 64 ہزار سے زائد ہو گئی ہے۔ پاکستان میں اس مہلک وائرس سے اب تک 12 ہزار 380 افراد ہلاک ہو چکے ہیں۔
نیشنل کمانڈ اینڈ آپریشن سینٹر (این سی او سی) کے مطابق پاکستان میں اب تک کرونا کے 85 لاکھ کے لگ بھگ ٹیسٹس کیے جا چکے ہیں۔ ملک کے مختلف اسپتالوں کے انتہائی نگہداشت وارڈز میں 1648 مریض زیرِ علاج ہیں۔
سندھ میں اب تک دو لاکھ 54 ہزار سے زائد، پنجاب میں ایک لاکھ 64 ہزار 696، خیبرپختونخوا میں 69 ہزار 885، بلوچستان میں 18946 کیس رپورٹ ہو چکے ہیں۔
پاکستان کے زیرِ انتظام کشمیر میں 9532 جب کہ گلگت بلتستان میں 4941 کیس رپورٹ ہو چکے ہیں۔
کرونا ویکسی نیشن: امریکی طلبہ ترجیحی فہرست میں نیچے
امریکہ میں کرونا وبا سے بچاؤ کے لیے ملک گیر ویکسی نیشن مہم جاری ہے۔ حکام نے فیصلہ کیا ہے کہ کالج اور یوینورسٹیز میں زیرِ تعلیم طلبہ کو ویکسین کے لیے ترجیحی فہرست میں نیچے رکھا جائے گا۔
البتہ، حکام کا کہنا ہے کہ ایسے نوجوان طلبہ جو میڈیکل کے شعبے یا فرنٹ لائن پر کام کر رہے ہیں یا کسی موذی مرض کا شکار ہیں تو اُنہیں یہ ویکسین ترجیحی بنیادوں پر لگائی جائے گی۔
امریکہ میں وبائی امراض کے ماہر ڈاکٹر انتھونی فاؤچی کا کہنا ہے کہ نوجوان طلبہ کو اپریل سے قبل ویکسین نہیں لگائی جا سکے گی۔
امریکہ میں اب تک کرونا کے دو کروڑ 70 لاکھ کیس رپورٹ ہو چکے ہیں جب کہ اس مہلک وائرس سے اب تک چار لاکھ 84 ہزار اموات ہو چکی ہیں۔
امریکہ میں اب تک پانچ کروڑ سے زائد افراد کو کرونا ویکسین لگائی جا چکی ہے۔ ابتداً طبی عملے اور معمر افراد کو ویکسین لگائی جا رہی ہے۔
کرونا وبا جلد ختم نہیں ہو گی تاہم ویکسین اہم ہے: ماہرین
ماہرین کا کہنا ہے کہ کرونا وبا جلد ختم ہونے والی نہیں بلکہ اس کی بدلتی ہوئی اقسام انسانوں کے درمیان موجود رہیں گی۔
البتہ، سائنس دان متفق ہیں کہ 20 لاکھ سے زائد افراد کی جانیں لینے والی اس وبا کا مقابلہ کرنے لیے ویکسی نیشن کی بہت اہمیت ہے۔
بھارت کے معروف ماہرِ صحت ڈاکٹر جیکب جان نے خبر رساں ادارے 'ایسوسی ایٹڈ پریس' کو بتایا کہ کرونا، پولیو اور چیچک کی طرح ہی ایک بیماری ہے جس کے ساتھ اب انسانوں کو جینا ہو گا۔
ادھر دنیا کے مختلف ممالک میں کرونا ویکسی نیشن مہم جاری ہے۔ افریقی ملک زمبابوے کو بھی پیر کو چین کی 'سائنو فارم' کرونا ویکسین کی دو لاکھ خوراکیں موصول ہو گئی ہیں۔ یہ خوراکیں چین نے عطیہ کی ہیں۔ تاہم زمبابوین حکام کا کہنا ہے کہ وہ مزید چھ لاکھ خوراکیں خریدنے کا ارادہ رکھتے ہیں۔
برطانیہ: ہائی رسک ممالک سے آنے والوں کو 10 روز تک قرطینہ میں رہنا ہو گا
برطانیہ نے کرونا وائرس سے زیادہ متاثرہ ممالک سے آنے والے مسافروں کو 10 روز تک قرنطینہ میں رہنے کی شرط عائد کر دی ہے۔ ان ممالک میں جنوبی افریقہ، زمبابوے، جنوبی امریکہ کے کئی ممالک بشمول برازیل، متحدہ عرب امارات، تنزانیہ شامل ہیں۔
برطانوی حکام کے مطابق یہ پابندی برطانوی شہریوں یا مستقل ویزہ رکھنے والے افراد پر بھی لاگو ہو گی۔ مسافروں کو حکومت کے منظورہ شدہ ہوٹلز میں 10 روز قیام کرنا ہو گا۔
حکام کا کہنا ہے کہ اس مقصد کے لیے برطانیہ کے مختلف شہروں کے ہوائی اڈوں کے قریب 16 ہوٹلز کے ساتھ پانچ ہزار کمروں کے معاہدے کیے گئے ہیں۔ 10 روزہ قیام کے لیے مذکورہ شخص کو دو ہزار یوروز ادا کرنا ہوں گے جن میں کھانا، ٹرانسپورٹیشن، سیکیورٹی، ٹیسٹںگ سمیت دیگر سہولیات دی جائیں گی۔
برطانیہ نے یہ اقدامات وائرس کی نئی قسم کو پھیلنے سے روکنے کے لیے کیے ہیں۔