'کوویکس' پروگرام کیا ہے؟
عالمی ادارۂ صحت کا کرونا ویکسین فراہم کرنے کا 'کوویکس' پروگرام کیا ہے؟ جانیے ان گرافکس میں۔
بھارت میں ایک کروڑ 17 لاکھ سے زائد افراد کی ویکسی نیشن
بھارت میں گزشتہ 24 گھنٹوں کے دوران چھ لاکھ 38 ہزار افراد کو ویکسین دی گئی۔ جب کہ مجموعی طور پر ایک کروڑ 17 لاکھ 45 ہزار سے زیادہ لوگوں کو ویکسین دی جا چکی ہے۔
ذرائع کے مطابق صحتِ عامہ کے کارکنوں میں ویکسین کے تعلق سے تحفظات ہیں۔ اسی لیے ویکسین لگانے کا عمل سست ہو رہا ہے۔
محکمہ صحت کو اس بات پر تشویش ہے۔
برطانوی وزیرِ اعظم کا لاک ڈاؤن ختم کرنے کا جامع منصوبہ پیش کرنے کا اعلان
برطانیہ کے وزیرِ اعظم بورس جانسن نے اعلان کیا ہے کہ وہ پیر کو لاک ڈاؤن کے خدشات کو ختم کرنے کے لیے ایک جامع منصوبہ پیش کریں گے۔
وزیرِ اعظم آفس 'ٹین ڈاؤننگ اسٹریٹ' سے جاری بیان کے مطابق بورس جانسن کا کہنا ہے کہ اسکولوں میں تدریسی عمل بحال کرنا اور لوگوں کو محفوظ انداز سے اپنے پیاروں سے ملنے کی اجازت دینا ان کی بنیادی ترجیح ہے۔
بورسن جانسن پیر کو ایوان میں کرونا وائرس سے نمٹنے اور پابندیوں میں نرمی سے متعلق اپنی نئی حکمتِ عملی بیان کریں گے اور وہ اس سلسلے میں نیوز کانفرنس بھی کریں گے۔
برطانوی وزیرِ اعظم کی جانب سے آٹھ مارچ سے اسکولوں میں تعلیمی عمل بحال کرنے کا اعلان بھی متوقع ہے۔
یاد رہے کہ برطانیہ کرونا وائرس سے یورپ کا سب سے زیادہ متاثرہ ملک ہے جہاں گزشتہ برس دسمبر میں سب سے پہلے کرونا ویکسی نیشن مہم کا آغاز کیا گیا اور اب تک ایک کروڑ 70 لاکھ سے زیادہ افراد ویکسین کی پہلی خوراک لگوا چکے ہیں۔
عالمی وبا سے برطانیہ میں اب تک ایک لاکھ 20 ہزار سے زیادہ اموات رپورٹ ہو چکی ہیں۔
پاکستان میں کرونا سے یومیہ اموات کی تعداد میں کمی
پاکستان میں کرونا وائرس سے مرنے والوں کی یومیہ تعداد میں بدستور کمی واقع ہو رہی ہے۔
سرکاری اعداد و شمار کے مطابق گزشتہ چوبیس گھنٹوں کے دوران کرونا کے شکار مزید 16 مریض دم توڑ گئے ہیں جس کے بعد اموات کی کُل تعداد 12 ہزار 617 تک پہنچ گئی ہے۔
پیر کو رپورٹ ہونے والی ہلاکتوں کی تعداد نومبر 2020 کے بعد کم ترین یومیہ تعداد ہے۔
حکام کے مطابق ملک بھر میں کرونا کے مزید ایک ہزار 160 نئے کیسز رپورٹ ہونے کے بعد کیسز کی مجموعی تعداد پانچ لاکھ 72 ہزار سے زیادہ ہو گئی ہے جن میں سے پانچ لاکھ 35 ہزار سے زیادہ مریض صحت یاب بھی ہو چکے ہیں۔