کیٹ میڈلٹن نے وبا کے دوران کھینچی گئی تصاویر پر مشتمل کتاب مرتب کر دی
برطانیہ کے شاہی خاندان کی بڑی بہو اور ڈچس آف کیمبرج کیٹ مڈلٹن نے کرونا لاک ڈاؤن کے دوران کھینچی گئی تصاویر پر مبنی ایک کتاب لانچ کر دی ہے۔
اس کتاب کا عنوان 'ہولڈ اسٹل: اے پوٹریٹ آف آور نیشن ان 2020' ہے اور یہ سات مئی سے دستیاب ہو گی۔
ملکۂ برطانیہ الزبتھ دوم کے بڑے پوتے شہزادہ ولیم کی اہلیہ کیٹ مڈلٹن نے اس پروجیکٹ کا آغاز گزشتہ برس نیشنل پوٹریٹ گیلری کے تعاون سے کیا تھا۔
انہوں نے لوگوں کو دعوت دی تھی کہ وہ برطانیہ میں کرونا وائرس کے پہلے لاک ڈاؤن کے دوران کھینچی گئی تصاویر کو جمع کرائیں۔
پاکستان: کرونا مثبت کیسز کی شرح 11 فی صد سے زیادہ
پاکستان میں کرونا کیسز میں تیزی سے اضافہ ہو رہا ہے اور مثبت کیسز کی شرح 11 فی صد سے زائد ریکارڈ کی گئی ہے۔
سرکاری اعداد و شمار کے مطابق گزشتہ چوبیس گھںٹوں کے دوران 40 ہزار 369 افراد کے کرونا ٹیسٹ کیے گئے جن میں 4525 افراد کے ٹیسٹ مثبت آئے ہیں۔
حکام کے مطابق کرونا مثبت ٹیسٹ کی شرح گیارہ اعشاریہ دو ایک فی صد تک جا پہنچی ہے۔
پاکستان میں عالمی وبا کے شکار مزید 41 مریض دم توڑ گئے ہیں جس کے بعد ہلاکتوں کی مجموعی تعداد 14 ہزار 256 ہو گئی ہے اور اب بھی تین ہزار سے زیادہ مریضوں کی حالت تشویش ناک بتائی جاتی ہے۔
سرکاری اعداد و شمار کے مطابق پاکستان میں اب تک چھ لاکھ 59 ہزار سے زیادہ کیسز رپورٹ ہو چکے ہیں جن میں سے پانچ لاکھ 98 ہزار 197 مریض صحت یاب ہوئے ہیں۔
پاکستان میں عالمی وبا پر قابو پانے کے لیے کرونا ویکسی نیشن کا عمل بھی جاری ہے اور مجموعی طور پر ایک کروڑ 10 لاکھ سے زیادہ افراد کے کرونا ٹیسٹ بھی کیے جا چکے ہیں۔
کرونا سے متعلق غلط معلومات، وینزویلا کے صدر کا فیس بک پیج معطل
سماجی رابطوں کی سب سے بڑی ویب سائٹ 'فیس بک' نے کہا ہے کہ کمپنی نے کووڈ-19 سے متعلق غلط معلومات کا پرچار کرنے پر وینزویلا کے صدر نکولس مدورو کا پیچ 30 روز کے لیے معطل کر دیا ہے۔
فیس بک کے ایک ترجمان نے خبر رساں ادارے 'رائٹرز' کو بتایا کہ مدورو نے کرونا کے علاج کے لیے اپنے پیج پر جڑی بوٹیوں سے تیار کیے گئے ایک مشروب سے متعلق بغیر کسی طبی حقائق کے ایک ویڈیو شیئر کی تھی۔
ترجمان کے بقول صدر نے اس ویڈیو کے ساتھ لکھا کہ یہ کرونا وائرس کے خلاف ایک مؤثر دوا ہے۔
ترجمان نے بتایا کہ وینزویلا کے صدر نے مزید لکھا کہ یہ مشروب ایک معجزہ ہے جو کسی بھی مضر اثرات کے بغیر کرونا وائرس کا خاتمہ کر سکتا ہے۔
کرونا کی تیسری لہر، پہلی اور دوسری سے زیادہ خطرناک ہے: وزیرِ اعظم عمران خان
پاکستان کے وزیرِاعظم عمران خان نے کہا ہے کہ کرونا وائرس کی تیسری لہر شدید ہے۔ اگر احتیاطی تدابیر نہ اپنائیں تو اسپتال مریضوں سے بھر جائیں گے۔
اتوار کی شام کرونا کی صورتِ حال سے متعلق قوم کے نام اپنے ویڈیو پیغام میں عمران خان نے کہا کہ سینیٹ انتخابات کے دوران وہ احتیاط نہ کر سکے جس کے باعث اُنہیں کرونا ہوا۔ تاہم عمران خان کا کہنا تھا کہ وہ اور اُن کی اہلیہ اب بہتر ہیں۔
وزیرِ اعظم عمران خان کا کہنا تھا کہ عوام ماسک کا استعمال لازمی کریں اور ایس او پیز پر سختی سے عمل کیا جائے۔
عمران خان کے بقول ہم ملک میں مکمل لاک ڈاؤن نہیں کر سکتے۔ ہمارے پاس وسائل نہیں ہیں کہ ہم پابندیاں لگا کر لوگوں کو کھانا فراہم کریں۔
وزیرِاعظم کا کہنا تھا کہ اسپتالوں میں دباؤ بڑھتا جا رہا ہے۔ لوگ وینٹی لیٹرز اور آکسیجن پر جا رہے ہیں اگر یہی رُحجان رہا تو اسپتال مریضوں سے بھر جائیں گے۔
ان کے بقول دنیا بھر میں کرونا ویکسین کی قلت ہو گئی ہے۔ بہتر یہی ہے کہ ہم ایس او پیز پر عمل کریں۔ شادیوں، بند مقامات اور رش والی جگہوں پر نہ جائیں۔