پاکستان میں وبا کی تیسری لہر میں پہلی بار یومیہ پانچ ہزار کیسز رپورٹ
پاکستان میں کرونا وائرس سے متاثرہ زیرِ علاج افراد کی تعداد 56 ہزار سے تجاوز کر گئی ہے۔
سرکاری اعداد و شمار کے مطابق ملک بھر میں گزشتہ 24 گھنٹوں وبا سے مزید پانچ ہزار 234 افراد کے متاثر ہونے کی تصدیق ہوئی۔ جون 2020 کے بعد سامنے آنے والے یومیہ کیسز کی یہ سب سے زیادہ تعداد ہے جس کے بعد زیرِ علاج افراد کی تعداد 56 ہزار 347 ہو گئی ہے۔
اعداد و شمار کے مطابق پاکستان میں مجموعی طور پر چھ لاکھ 78 ہزار 165 افراد وبا سے متاثر ہوئے تھے جن میں سے چھ لاکھ سات ہزار 205 افراد صحت یاب ہو چکے ہیں۔ جب کہ 14 زار 613 اموات ہوئی ہیں۔
پاکستان میں زیرِ علاج افراد میں سے تین ہزار 384 مریض انتہائی نگہداشت میں ہیں۔
فرانس میں عوامی مقامات پر مہ نوشی پر پابندی
فرانس کی حکومت نے کرونا وبا کی نئی لہر کے پیشِ نظر عوامی مقامات بشمول پارکس میں مہ نوشی پر پابندی عائد کر دی ہے۔
حکام کا کہنا ہے کہ عوامی مقامات پر چھ سے زائد افراد کو جمع ہونے کی اجازت نہیں ہو گی۔ یہ پابندیاں فرانسیسی صدر کی جانب سے بدھ کو کیے گئے اعلانات کا حصہ ہیں۔
فرانس کے وزیرِ اعظم نے پارلیمنٹ کو بتایا کہ پیرس کے مختلف مقامات پر ٹولیوں کی صورت میں شراب نوشی کرنے کی تصاویر اور ویڈیوز سامنے آئی ہیں جس کے بعد یہ پابندی عائد کی گئی ہے۔
کرونا کیسز کے پیشِ نظر اولمپک ٹارچ ریلی منسوخ کرنے کی تجویز
جاپان کے شہر اوساکا کے گورنر ہیروفومی یوشیمورا نے کرونا کیسز میں تیزی سے اضافے کے پیشِ نظر اولمپک ٹارچ ریلی منسوخ کرنے کی تجویز دی ہے۔
جاپان سمر اولمپکس کا میزبان ملک ہے جہاں ایونٹ کا باقاعدہ آغاز 20 جولائی سے ہوگا۔ تاہم اس سے قبل جاپان میں اولمپک ٹارچ ریلیاں نکالی جا رہی ہیں۔
تیرہ اور 14 اپریل کو اوساکا میں اولمپک ٹارچ ریلی نکالی جانی ہے۔ لیکن گورنر ہیروفومی یوشیمورا نے ریلی کی صورت میں کرونا کیسز بڑھنے کے خدشے کا اظہار کیا ہے۔
یاد رہے کہ اوساکا ایک ماہ قبل ہی کرونا وائرس کی ایمرجنسی کی صورتِ حال سے باہر نکلا ہے، جہاں بدھ کو 599 نئے کیسز رپورٹ ہوئے ہیں جو جنوری میں سب سے زیادہ ریکارڈ کیے جانے والے 654 کیسز کی تعداد کے قریب ہے۔
امریکہ کی نامزد سابق نائب صدر سارہ پالن کا کرونا ٹیسٹ مثبت
امریکہ کی نامزد سابق ری پبلکن نائب صدر اور ریاست الاسکا کی سابق گورنر سارہ پالن کرونا وائرس کا شکار ہو گئی ہیں۔
سارہ پالن نے بتایا کہ ان کا کرونا ٹیسٹ مثبت آیا ہے اور ساتھ ہی انہوں نے کرونا سے بچاؤ کے لیے عوام کو ماسک پہننے پر بھی زور دیا ہے۔
تاہم یہ بات واضح نہیں ہے کہ 57 سالہ سارہ پالن کا کرونا ٹیسٹ کب مثبت آیا ہے۔
انہوں نے 'پیپلز' میگزین سے گفتگو کرتے ہوئے بتایا کہ ان کے گھر کے دیگر افراد کا بھی کرونا ٹیسٹ مثبت آیا ہے۔