اکشے کمار اسپتال میں داخل
کرونا وائرس کا شکار ہونے والے بالی وڈ اداکار اکشے کمار اسپتال میں داخل ہو گئے ہیں۔
اکشے نے اپنے ایک ٹوئٹ میں بتایا ہے کہ ان کی صحت بہتر ہے لیکن ڈاکٹروں کی ہدایت پر احتیاط کے پیشِ نظر وہ اسپتال میں داخل ہوئے ہیں۔
اداکار نے نیک تمناؤں کا اظہار کرنے اور اپنی دعاؤں میں انہیں یاد کرنے والوں کا شکریہ بھی ادا کیا ہے۔
بھارت میں پہلی مرتبہ ایک دن میں ایک لاکھ سے زیادہ کیسز رپورٹ
بھارت کو کرونا وائرس کی دوسری لہر کا سامنا ہے اور پہلی مرتبہ ملک میں ایک روز کے دوران ایک لاکھ سے زیادہ کیسز رپورٹ ہوئے ہیں۔
بھارت کی وزارتِ صحت کے مطابق گزشتہ چوبیس گھنٹوں کے دوران ملک میں ایک لاکھ تین ہزار 558 کیسز رپورٹ ہوئے ہیں جس کے بعد کیسز کی کل تعداد ایک کروڑ 24 لاکھ سے زیادہ سے زیادہ ہے۔
سرکاری اعداد و شمار کے مطابق گزشتہ چوبیس گھنٹوں میں عالمی وبا کے شکار مزید 478 مریض ہلاک ہو گئے ہیں جس کے بعد مرنے والوں کی کل تعداد ایک لاکھ 65 ہزار 101 ہو گئی ہے۔
پاکستان میں مزید 43 اموات، 4323 نئے کیسز رپورٹ
پاکستان میں کرونا وائرس کی دوسری لہر کی شدت برقرار رہے۔ گزشتہ چوبیس گھنٹوں کے دوران وائرس کے شکار مزید 43 مریض دم توڑ گئے ہیں جب کہ 4323 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک بھر میں کرونا کیسز کی تعداد چھ لاکھ 92 ہزار سے زیادہ ہے جب کہ چھ لاکھ 15 ہزار سے زیادہ مریض صحت یاب ہو چکے ہیں۔
پاکستان میں عالمی وبا سے ہلاکتوں کی مجموعی تعداد 14 ہزار 821 ہے اور حکام کے مطابق اب بھی 3587 مریضوں کی حالت تشویش ناک ہے۔
چین: شمالی شہر رلی میں کیسز بڑھنے لگے
میانمار سے متصل چین کے شہر رلی میں کرونا کیسز میں مسلسل اضافہ ہو رہا ہے اور کیسز کی تعداد بڑھ کو 100 سے زیادہ ہو گئی ہے۔
حکام نے وبا پر قابو پانے کے لیے شہر کے تمام تین لاکھ شہریوں کو ویکسین لگانے کی جمعے سے شروع ہونے والی مہم کو مزید تیز کر دیا ہے۔
نیشنل ہیلتھ کمیشن کے مطابق پیر کو مزید 20 افراد میں وائرس کی تشخیص ہوئی ہے۔
رلی شہر میں ان افراد کو اسپتالوں میں داخل کر دیا گیا ہے جن کے کیسز مثبت آئے تھے جب کہ وہ لوگ جن میں کرونا کی صرف علامات پائی گئی تھیں انہیں آئسولیٹ کر دیا گیا ہے۔