اسپتالوں پر دباؤ بڑھتا جا رہا ہے: اسد عمر
پاکستان کے وفاقی وزیر برائے منصوبہ بندی اسد عمر نے کہا ہے کہ پیر کو نیشنل کمانڈ اینڈ آپریشن سینٹر (این سی او سی) کے اجلاس کے دوران وبا کے پھیلاؤ، اسپتالوں میں گنجائش اور پابندیوں سے متعلق احتیاطی تدابیر پر عمل درآمد کا جائزہ لیا گیا۔
اسد عمر نے ایک ٹوئٹ میں بتایا کہ ایس او پیز پر عمل درآمد کی صورتِ حال اب بھی بہت نازک ہے اور اسپتالوں پر دباؤ بھی بڑھتا جا رہا ہے۔
اسد عمر کے مطابق حکام کو کہا گیا ہے کہ وہ احتیاطی تدابیر پر عمل درآمد کرائیں تاکہ کسی بحران سے محفوظ رہا جا سکے۔
برطانیہ میں کرونا پابندیوں میں مزید نرمی کا اعلان
برطانوی حکومت نے کرونا پابندیوں میں مزید نرمی کا اعلان کرتے ہوئے ریستوران، جم، لائبریریز اور شراب خانوں کو جزوی طور پر کھولنے کی اجازت دے دی ہے۔
حکومتی اعلان کے بعد ان ڈور جم، سوئمنگ پولز، چڑیا گھر اور لائبریریز کے دروازے عوام کے لیے کھل جائیں گے۔
رمضان المبارک کے موقع پر برطانیہ میں مساجد بھی کھلی رہیں گی لیکن نمازیوں کو سماجی فاصلے کی دوری کی احتیاط کے ساتھ نماز پڑھنے کی اجازت ہو گی۔
وزیرِ اعظم بورس جانسن نے پابندیوں میں نرمی کو 'آزادی کی جانب سے بڑھتے قدم' سے تشبیہ دی ہے۔
بورس جانسن نے کہا کہ انہیں یقین ہے کہ پابندیوں میں نرمی سے ان کاروباری حضرات کو بڑا ریلیف ملے گا جنہوں نے طویل عرصے سے اپنا کاروبار بند کر رکھا تھا۔
خیبرپختونخوا: کرونا کے مریض صحت کارڈ کے ذریعے علاج کرا سکیں گے
پاکستان کے صوبے خیبر پختونخوا کے وزیرِ صحت تیمور خان جھگڑا نے کہا ہے کہ صوبے بھر میں کرونا کے مریض صحت کارڈ کی مدد سے مفت علاج کرا سکیں گے۔
ان کے بقول صوبے میں کسی بھی سرکاری اور مختص پرائیوٹ اسپتال میں کرونا کے مریض علاج کرا سکتے ہیں۔
تیمور جھگڑا نے اپنے ایک ٹوئٹ میں کہا ہے کہ مشکل کی اس گھڑی میں وہ لوگوں کی مشکلات کم کرنے کی ہر ممکن کوشش کر رہے ہیں۔
پاکستان میں مزید 58 ہلاکتیں
پاکستان میں گزشتہ چوبیس گھنٹوں کے دوران کرونا وائرس کے شکار مزید 58 مریض ہلاک ہو گئے ہیں جب کہ 4201 مریضوں کی حالت تشویش ناک ہے۔
سرکاری اعداد و شمار کے مطابق ملک بھر میں گزشتہ چوبیس گھنٹوں کے دوران 4584 افراد میں وائرس کی تشخیص ہوئی ہے جس کے بعد کیسز کی مجموعی تعداد سات لاکھ 25 ہزار سے تجاوز کر گئی ہے۔
عالمی وبا سے پاکستان میں اب تک 15 ہزار 501 افراد ہلاک اور چھ لاکھ 34 ہزار سے زیادہ صحت یاب ہو چکے ہیں۔
پاکستان میں کرونا وائرس کی تیسری لہر کی شدت برقرار ہے اور ایکٹو کیسز کی تعداد 75 ہزار 266 تک پہنچ گئی ہے جس میں مسلسل اضافہ ہو رہا ہے۔