پاکستان: وبا کی تیسری لہر کی شدت برقرار
پاکستان میں کرونا وائرس کی تیسری لہر کی شدت برقرار ہے اور یومیہ کیسز اور اموات کی تعداد میں اضافے کا سلسلہ بھی جاری ہے۔
سرکاری اعداد و شمار کے مطابق گزشتہ چوبیس گھنٹوں کے دوران وبا کے شکار مزید 118 مریض ہلاک جب کہ 5395 افراد میں وائرس کی تشخیص ہوئی ہے۔
کرونا وائرس سے متاثر ہونے والے 4276 مریض ایسے ہیں جن کی حالت تشویش ناک بتائی جاتی ہے۔
سرکاری اعداد و شمار کے مطابق ملک بھر میں کرونا کے مجموعی کیسز کی تعداد سات لاکھ 39 ہزار سے زیادہ ہو چکی ہے جن میں سے چھ لاکھ 46 ہزار سے زیادہ مریض صحت یاب ہو چکے ہیں۔
پاکستان میں ایکٹو کیسز کی تعداد 77 ہزار 294 تک پہنچ گئی ہے۔
بھارت میں ریکارڈ دو لاکھ سے زیادہ کیسز رپورٹ
بھارت میں گزشتہ چوبیس گھنٹوں کے دوران دو لاکھ 739 کیسز رپورٹ ہوئے ہیں۔ وبا کے آغاز سے اب تک کیسز کی یہ ریکارڈ تعداد ہے۔
بھارت کو کرونا وائرس کی دوسری لہر کا سامنا ہے جس کے دوران مختلف ریاستوں میں پابندیوں کے باوجود کیسز اور اموات کی تعداد میں مسلسل اضافہ ہو رہا ہے۔
وزارتِ صحت کے مطابق گزشتہ چوبیس گھنٹوں میں کرونا کے شکار مزید ایک ہزار 38 مریض دم توڑ گئے ہیں جس کے بعد ہلاکتوں کی مجموعی تعداد ایک لاکھ 73 ہزار 123 ہو گئی ہے۔
عالمی سطح پر کرونا سے متاثرہ ملکوں کی فہرست میں امریکہ کے بعد بھارت دوسرے نمبر پر ہے جہاں ایک کروڑ 40 لاکھ سے زیادہ کیسز رپورٹ ہو چکے ہیں۔
این سی او سی کا اجلاس، رمضان کے حوالے سے اہم فیصلے
نیشنل کمانڈ اینڈ آپریشن سینٹر (این سی او سی) نے پاکستان میں رمضان کے حوالے سے خصوصی ہدایات جاری کر دی ہیں۔
این سی او سی کے اجلاس کے بعد جاری ہدایات کے مطابق ملک بھر کاروباری مراکز رمضان میں سحر سے شام چھ بجے تک کھولنے کی اجازت ہو گی۔
اسی طرح ہر قسم کی ان ڈور سرگرمیوں پر بھی مکمل طور پر پابندی عائد کی گئی ہے۔
رمضان کے دوران نمازِ تراویح کھلی جگہ پر ادا کرنے کے احکامات جاری کیے گئے ہیں۔
مزارات اور سینما گھروں کی بندش بدستور برقرار رکھی گئی ہے۔
این سی او سی کے اجلاس میں ہفتے اور اتوار کو ملک بھر میں کاروباری سرگرمیاں بند رکھنے کا فیصلہ گیا گیا۔ ان دو دنوں میں بین الصوبائی ٹرانسپورٹ بھی معطل رہے گی۔
اسی طرح ریل گاڑیوں میں 70 فی صد سیٹوں کی بکنگ کی جائے گی۔ جب کہ محکمہ ریلوے اضافی ٹرینیں بھی چلائے گا۔
یوگی ادتیہ ناتھ کا کرونا ٹیسٹ مثبت
بھارت کی ریاست اترپردیش کے وزیرِ اعلیٰ یوگی ادتیہ ناتھ کا کرونا ٹیسٹ مثبت آیا ہے۔
ہندی زبان میں اپنے ایک ٹوئٹ ٘میں یوگی ادتیہ ناتھ نے کہا کہ کرونا وائرس کی ابتدائی علامات ظاہر ہونے پر انہوں نے کرونا ٹیسٹ کرایا جس کی رپورٹ مثبت آئی ہے۔
انہوں نے کہا کہ وہ خود کو آئسولیٹ کر چکے ہیں اور ڈاکٹروں کے مشورے پر عمل کر رہے ہیں۔