امریکہ کرونا ویکسین کی 2 کروڑ خوراکیں عطیہ کرے گا
صدر جو بائیڈن نے پیر کے روز اعلان کیا ہے کہ امریکہ آئندہ چھ ہفتوں کے دوران ویکسین کی دو کروڑ اضافی خوراکیں بیرون ملک ویکسین کی ضرورت پوری کرنے کے لئے عطیہ کرے گا۔یہ اعلان ایک ایسے وقت میں کیا گیا ہے، جب امریکہ میں اندرون ملک ویکسین کی طلب کم ہو رہی ہے اور دنیا بھر میں ویکسین کی تقسیم اور دستیابی کے درمیان فاصلہ بڑھ رہا ہے۔
ایسوسی ایٹڈ پریس کے مطابق، ویکسین کی فراہمی میں مدد کے اس نئے وعدے کے بعد امریکہ نے مجموعی طور پر ویکسن کی آٹھ کروڑ خوراکیں فراہم کرنے کا وعدہ کر لیا ہے۔ اس سے قبل امریکی انتظامیہ نے جون کے آخر تک ایسٹرا زینیکا ویکیسن کی چھ کروڑ خوراکیں مہیا کرنے کا وعدہ کیا تھا۔
صدر بائیڈن نے وائٹ ہاؤس سے کووڈ 19 رسپانس اور ویکسی نیشن پروگرام کے سلسلے میں خطاب کرتے ہوئے کہا ہے کہ امریکہ کرونا ویکسین کی مہم کے لیے ایک اور قدم بڑھا رہا ہے، کیونکہ ہم جانتے ہیں کہ جب تک یہ وبا دنیا بھر میں قابو نہیں آ جاتی تب تک امریکہ بھی محفوظ نہیں رہے گا۔
صدر نے اعلان کیا کہ آج سے امریکہ فائزر، موڈرنا اور جانسن اینڈ جانسن کی ویکسین کی خوراکیں باقی دنیا کو امداد میں دے گا۔
اس سے پہلے رپورٹرز سے بات کرتے ہوئے وائٹ ہاؤس کی ترجمان جین ساکی نے بتایا تھا کہ امریکہ اگلے چھ ہفتے کے دوران ویکسین کی دو کروڑ خوراکیں باقی دنیا کو امداد میں دے گا۔
کرونا کی 'بھارتی قسم' پر برطانوی ماہرین کا اظہارِ تشویش
برطانوی حکومت کی جانب سے کرونا وائرس کی پابندیوں کو بتدریج نرم کرنے کا سلسلہ جاری ہے تاہم سابق اور موجودہ مشیروں نے کرونا کی بھارتی قسم کے تیزی سے پھیلنے پر تشویش کا اظہار کیا ہے۔
حکام کی جانب سے اس بات کو تسلیم کیا جارہا ہے کہ پیر سے بند مقامات پر گھلنے ملنے اور کچھ بین الاقوامی سیاحوں کو آنے کی اجازت دے کر ہم خطرہ مول لے رہے ہیں۔
واضح رہے کہ برطانیہ اور لندن کے شمال مغربی حصے میں B.1.617.2 قسم کے کیسز میں اضافہ ہوا ہے۔ یہ قسم پہلے بھارت میں پائی گئی تھی۔
برطانیہ کے سابق اور موجودہ سائنسی مشیروں نے پابندیوں میں نرمی سے متعلق پہلے سے اعلان کردہ روڈ میپ پر تشویش کا اظہار کیا ہے۔ انہیں خدشہ ہے کہ بھارت میں پھیلنے والی کرونا وائرس کی قسم برطانیہ بھر میں بھی تیزی سے پھیل سکتی ہے جس سے اسپتالوں میں مریضوں کے داخلے اور اموات میں دوبارہ تیزی آسکتی ہے۔
- By ضیاء الرحمن
پنجاب میں پولیس اہلکاروں اور صحافیوں کے لیے ویکسی نیشن مراکز قائم
پنجاب حکومت نے پولیس اہلکاروں اور صحافیوں کے لیے خصوصی ویکسی نیشن مراکز قائم کر دیے ہیں۔
پولیس لائن قلعہ گجر سنگھ میں قائم ویکسی نیشن سینٹر میں پولیس، ٹریفک پولیس، ڈولفن فورس، ایلیٹ فورس اور اینٹی رائٹ فورس سمیت دیگر اہلکاروں کو ویکسین لگائی جا رہی ہے۔
دوسری جانب صحافیوں کے لیے ویکسی نیشن سینٹر لاہور کے پریس کلب میں قائم کیا گیا ہے۔ اس مرکز میں صحافیوں کےاہلِ خانہ بھی ویکسین لگوا سکتے ہیں۔
ویکسین سینٹرز میں خواتین اور مردوں کے لیے الگ الگ ڈیسک بنائی گئی ہیں جب کہ ابھی صرف 30 سال سے زائد عمر کے صحافیوں اور پولیس اہلکاروں کو ویکسین لگائی جا رہی ہے۔
پاکستان میں کرونا سے 135 اموات
پاکستان میں منگل کو 29 ہزار 801 افراد کے کرونا ٹیسٹ کیے گئے جس میں سے دو ہزار 566 کے نتائج مثبت آئے ہیں۔
سرکاری اعداد و شمار کے مطابق ملک میں کرونا مثبت کیسز کی شرح آٹھ اعشاریہ چھ ایک فی صد رہی۔ گزشتہ 24 گھنٹوں میں مزید 135 افراد کرونا کے باعث انتقال کر گئے۔
پاکستان میں اب تک آٹھ لاکھ 82 ہزار 928 افراد کرونا سے متاثر ہوئے ہیں جب کہ وائرس سے ہلاک افراد کی تعداد 19 ہزار 752 ہے۔