پاکستان میں مزید 65 اموات، دو ہزار سے زیادہ نئے کیسز رپورٹ
بھارت کا نظامِ صحت کرونا بحران سے نمٹنے کے لیے تیار کیوں نہیں تھا؟
طبی ماہرین کے بقول، بھارت میں صحتِ عامہ کا نظام کرونا وبا کی دوسری لہر سے نمٹنے میں بالکل ناکام نظر آیا۔ کیا یہ صرف مس مینجمنٹ تھی؟ اور کیا خطے کے دیگر ممالک بھارت کے کرونا بحران سے کچھ سیکھ سکتے ہیں؟ دہلی سے طبی ماہرین کیا کہہ رہے ہیں، جانیے بھون گوسوامی کی رپورٹ میں
امریکہ: پابندیوں میں نرمی کے بعد فضائی سفر میں اضافہ
امریکہ میں جہاز کے ذریعے سفر کرنے والے مسافروں کی تعداد میں اضافہ ہوا ہے جس کے پیشِ نظر ایئر لائنز کمپنیاں موسم گرما میں مقامی فضائی سفر میں اضافے کی تیاریاں کر رہی ہیں۔ حکومتی حلقوں میں بھی اس بات پر بحث ہو رہی ہے آیا مزید غیر ملکی سیاحوں کو ملک میں آنے کی اجازت دی جائے۔
امریکہ میں کرونا وبا کے پھیلاؤ کو روکنے کے لیے ویکسی نیشن کا عمل تیزی سے جاری ہے اور اب ملک میں زندگی معمول کی طرف لوٹ رہی ہے۔
منگل کو امریکن ایئر لائنز، یونائیٹڈ ایئر لائنز اور ڈیلٹا ایئر لائنز کے شیئرز میں اس وقت تیزی سے اضافہ ریکارڈ کیا گیا جب اعلیٰ حکام نے کہا کہ سیر و تفریح کے لیے سفر کرنے والے مسافروں کی تعداد میں اضافہ ہوا ہے۔
ڈیلٹا ایئر لائنز کے صدر گلین ہوئن اسٹین نے ایک کانفرنس کے دوران بتایا کہ "فضائی سفر کے لیے بکنگ توقعات سے زیادہ ہے اور ہم سفر کے لیے لوگوں کی بڑھتی دلچسپی دیکھ کر کافی خوش ہیں۔"
پاکستان: 19 سال اور اس سے زائد عمر کے افراد کی ویکسین رجسٹریشن کا فیصلہ
نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کہا ہے کہ ملک بھر میں 19 سال اور اس سے زائد عمر کے افراد کی کرونا ویکسین کے لیے رجسٹریشن کا عمل شروع کرنے کا فیصلہ کیا گیا ہے۔
اسد عمر کے مطابق یہ فیصلہ این سی او سی کے اجلاس میں کیا گیا جس کے بعد طبی ماہرین کی جانب سے منظور کردہ ملک کی تمام آبادی کے لیے رجسٹریشن شروع ہو جائے گی۔