بھارت: پابندیوں میں نرمی پر وبا پھیلنے کا اندیشہ
بھارت کی مرکزی حکومت نے تمام ریاستوں کو خبردار کیا ہے کہ وہ کرونا وبا کے پیش نظر لگائی گئی پابندیوں میں نرمی کرتے ہوئے محتاط رہیں۔ تا کہ وبا ایک بار پھر سے نہ پھیل سکے۔
ریاستوں میں وبا کی دوسری لہر میں کمی ہونے کی وجہ سے پابندیوں میں نرمی کی جا رہی ہے۔
بھارت میں وبا سے اب تک دو کروڑ 98 لاکھ سے زائد افراد متاثر اور تین لاکھ 85 ہزار سے زائد اموات ہو چکی ہیں۔
سیکریٹری وزارتِ داخلہ اجے بھلا کا تمام ریاستوں اور وفاق کے زیرِ انتظام علاقوں کو لکھے گئے خط میں کہنا تھا کہ نچلی سطح تک نظام کو یقینی بنایا جائے تاکہ اگر کیسز میں اضافہ ہوتا ہے ہو تو اس پر قابو پایا جا سکے۔
سرکاری اعداد و شمار کے مطابق گزشتہ 24 گھنٹوں کے دوران 60 ہزار 753 کیسز اور ایک ہزار 647 اموات ریکارڈ کی گئیں۔
پاکستان میں ٹیسٹ مثبت آنے کی شرح دو فی صد کے قریب
پاکستان میں کرونا ٹیسٹ مثبت آنے کی شرح دو فی صد کے قریب ہے۔
نیشنل کمانڈ اینڈ آپریشن سینٹر (این سی او سی) کے مطابق پاکستان میں گزشتہ 24 گھنٹوں میں 46 ہزار 269 ٹیسٹ کیے گئے۔ جن میں سے 991 ٹیسٹ مثبت آئے۔
حکام کے مطابق پاکستان ٹیسٹ مثبت آنے کی شرح 2.14 فی صد ہے۔
واضح رہے کہ ملک بھر میں اب تک ایک کروڑ 40 لاکھ 72 ہزار سے زائد ٹیسٹ کیے جا چکے ہیں۔
پاکستان میں ویکسین کی قلت، حکام کا مزید خوراکیں جلد پہنچنے کا عندیہ
پاکستان کے مختلف شہروں میں کرونا ویکسین کی قلت کی اطلاعات سامنے آ رہی ہیں۔
مقامی میڈیا کی رپورٹس کے مطابق سندھ کی صوبائی حکومت نے ویکسین کی قلت کے باعث اتوار کو ویکسی نیشن سینٹر بند رکھنے کا اعلان کیا ہے۔
دوسری جانب وزیرِ اعظم عمران خان کے معاونِ خصوصی برائے صحت ڈاکٹر فیصل سلطان نے کہا ہے کہ ملک بھر میں اب بھی 10 لاکھ سے زائد ویکسین کی خوراکیں موجود ہیں۔
سوشل میڈیا پر ایک بیان میں ان کا کہنا تھا کہ اتوار کو 15 لاکھ 50 ہزار جب کہ دو دن بعد 25 لاکھ خوارکیں پاکستان پہنچ جائیں گی۔
ڈاکٹر فیصل سلطان نے کہا کہ جون کے آخر تک مزید 30 لاکھ تک خوراکیں پاکستان لائی جائیں گی۔
انہوں نے بتایا کہ اس کے ساتھ ساتھ پاکستان میں بھی چار لاکھ پاک ویک کی خوراکیں تیار کر لی جائیں گی۔
واضح رہے کہ پاک ویک چین کی کنسائنو ویکسین کا مقامی نام رکھا گیا ہے۔ چین کی ویکسین پاکستان میں تیار کی جا رہی ہے البتہ اس کے اجزا چین سے لائے جا رہے ہیں۔
پاکستان میں کرونا وائرس سے مزید 27 افراد ہلاک، 35 ہزار سے زائد زیرِ علاج
پاکستان میں کرونا وائرس سے مزید 27 افراد کے ہلاک ہونے کے بعد مجموعی اموات کی تعداد 21 ہزار 940 ہو گئی ہے۔
سرکاری اعداد و شمار کے مطابق گزشتہ 24 گھنٹوں میں وبا سے مزید 991 افراد متاثر ہوئے ہیں۔ وبا سے اب تک نو لاکھ 47 ہزار افراد متاثر ہو چکے ہیں جن میں آٹھ لاکھ 89 ہزار صحت یاب ہو چکے ہیں۔
حکام کے مطابق ملک بھر میں اب بھی ساڑھے 35 ہزار مریض زیرِ علاج ہیں۔ زیرِ علاج افراد میں 2296 افراد انتہائی نگہداشت میں ہیں۔