امریکہ اور کینیڈا کی سرحد کھولنے کے امکانات میں اضافہ
امریکہ اور کینیڈا کے درمیان سرحد کھولنے کا باضابطہ اعلان کسی بھی وقت متوقع ہے۔ تقریباً 9 ہزار کلومیٹر طویل سرحد، جس پر آرپار جانے کے لیے 117 سرکاری گزرگاہیں ہیں، گزشتہ سال مارچ میں کرونا وائرس کی عالمی وبا پھیلنے کے بعد غیر ضروری سفر کے لیے بند کر دی گئی تھی۔
دنیا کی اس سب سے طویل سرحد کی بندش کو ہرمہینے بڑھایا جاتا رہا ہے، جس کی موجودہ مدت پیر کے روز ختم ہو رہی ہے۔
امریکہ کے محکمہ خارجہ کے مطابق وبا شروع ہونے سے پہلے ہر روز چار لاکھ کے لگ بھگ افراد اسے عبور کرتے تھے اور اس سرحد کے ذریعے روزانہ دو ارب ڈالر کی تجارت ہو رہی تھی۔
کینیڈا کے وزیر اعظم جسٹن ٹروڈو نے اشارہ دیا ہے کہ سرحد کھولنے کا عمل بتدریج ہو گا اور اس کا انحصار کرونا وائرس کا پھیلاؤ روکنے کے لیے لگائی گئی پابندیوں پر ہو گا۔
وینکوور میں واقع سائمن فریسر یونیورسٹی میں گلوبل ہیلتھ شعبے کی پروفیسر کیلی لی کا کہنا ہے کہ ان کا خیال ہے کہ غیرضروری مقاصد کے لیے سرحد عبور کرنے والوں کو چار کیٹیگریز میں ڈالا جائے گا۔
کابل: امریکی سفارتخانے کے متعدد اہل کار کرونا میں مبتلا، سفارتی سرگرمیاں معطل
افغانستان میں امریکی سفارت خانے کے درجنوں افراد میں کرونا وائرس کے ٹیسٹ مثبت پائے گئے ہیں جس کے نتیجے میں سفارتی مشن کی بیشتر سرگرمیوں کو روک دیا گیا ہے۔
عہدیداروں کا کہنا ہے کہ ایک شخص پہلے ہی کووڈ نائنٹین میں مبتلا ہو کر ہلاک ہو چکا ہے جب کہ 114 افراد کو قرنطینہ میں رکھا گیا ہے اور متعدد افراد کو طبی بنیادوں پر وہاں سے نکال لیا گیا ہے۔
عہدیداروں کا کہنا ہے کہ 95 فیصد کیسز میں ایسے افراد شامل ہیں جنہیں کرونا سے بچاؤ کی ویکسین نہیں ملی یا پھر وہ ویکسین کی خوراکوں کا کورس مکمل نہیں کر سکے تھے۔
امریکہ: پانچ سے 11 سال کے بچوں پر کرونا ویکسین کے تجربات، ردِ عمل کیا ہے؟
کرونا ویکسین کے تجربات کا حصہ بننے والے پانچ سے 11 سال کے بچے کیا سوچ رہے ہیں اور ماہرین کا کیا کہنا ہے؟ تفصیلات کے لیے دیکھیے مونا کاظم شاہ کی رپورٹ، جو وائس آف امریکہ کے مستقل سلسلے 'لائف 360' کے تحت پیش کی جا رہی ہے۔
بھارت کے ’فلائنگ سکھ‘ کا وبا کے باعث انتقال
بھارت کے معروف ایتھلیٹ ملکھا سنگھ کرونا وبا کے سبب 91 سال کی عمر میں انتقال کر گئے۔
ملکھا سنگھ جو کہ ‘فلائنگ سکھ’ کے نام سے مشہور تھے۔ ان کے بیٹے جیو ملکھا سنگھ نے ذرائع ابلاغ کو بتایا کہ ان کے والد جمعے کو انتقال کر گئے ہیں۔
ملکھا سنگھ رواں سال 20 مئی کو کرونا وبا سے متاثر ہوئے تھے۔ جب کہ ان کی اہلیہ نرمل کور بھی کرونا وائرس کی وجہ سے رواں ہفتے انتقال کر گئی تھیں۔
انہوں نے 1958 اور 1962 کی ایشین گیمز میں بھارت کے لیے گولڈ میڈلز جیتے تھے۔
ان کی شہرت کو دیکھتے ہوئے 2013 میں ‘بھاگ ملکھا بھاگ’ کے نام سے بالی وڈ میں فلم بھی بنائی گئی تھی۔