کرونا وائرس: بھارت میں وبا سے اموات کی تعداد 10 گنا زیادہ ہونے کا اندیشہ
جنوبی ایشیا میں کرونا وائرس سے سب سے زیادہ متاثر ہونے والے ملک بھارت میں وبا سے ہونے والے جانی نقصان پر ایک حالیہ جامع تحقیق میں سامنے آیا ہے کہ کرونا سے بھارت میں ہونے والی اموات کی تعداد سرکاری اعداد و شمار سے 10 گنا زیادہ ہو سکتی ہے۔ ان ہلاکتوں کی تعداد کے باعث یہ حالیہ تاریخ کا بدترین انسانی بحران بھی ہو سکتا ہے۔
محققین کا خیال ہے کہ بھارت میں حکومت کے فراہم کردہ اعداد و شمار کے مطابق وبا سے لگ بھگ چار لاکھ 15 ہزار اموات ہوئی ہیں تاہم یہ تعداد حقیقی اموات کے مقابلے میں کئی گنا کم بتائی جا رہی ہے۔ دوسری جانب حکومت ان دعوؤں کی تردید کر رہی ہے۔ نئی دہلی کا کہنا ہے کہ وبا سے اموات کی تعداد کے حوالے سے مبالغہ آرائی اور گمراہ کن خدشات کا اظہار کیا جا رہا ہے۔
منگل کو جاری ہونے والی رپورٹ میں بھارت میں زیادہ اموات کا ذکر کیا گیا ہے۔ اس رپورٹ کے مطابق وبا سے اموات اور حقیقی اعداد و شمار میں فرق ہو سکتا ہے۔ جب کہ جنوری 2020 سے جون 2021 کے ڈیڑھ سال کے دورانیے میں بھارت میں 30 لاکھ سے 47 لاکھ افراد کرونا وبا سے ہلاک ہونے کا اندازہ لگایا گیا ہے۔
رپورٹ میں واضح کیا گیا ہے کہ حقیقی اعداد و شمار پیش کیے جانے کے بعد وبا کی شدت بتائی جانے والی حقیقت سے کئی گنا زیادہ سامنے آئے گی۔
یہ رپورٹ بھارت کی حکومت کے سابق معاشی مشیر اروند سبرامنین نے شائع کی ہے۔ جب کہ اس کی اشاعت میں سینٹر فار گلوبل ڈویلپمنٹ اور ہارورڈ یونیورسٹی کے دو معاونین نے ان کا ساتھ دیا ہے۔
پاکستان میں کرونا سے 30 اموات
پاکستان میں گزشتہ 24 گھنٹوں کے دوران کرونا وائرس سے مزید 30 افراد ہلاک ہو گئے ہیں جس کے بعد ہلاکتوں کی مجموعی تعداد 22 ہزار 811 ہو گئی ہے۔
سرکاری اعداد و شمار کے مطابق ملک میں 24 گھنٹوں کے دوران 49 ہزار 503 ٹیسٹ کیے گئے جن میں سے دو ہزار 452 افراد میں وائرس کی تشخیص ہوئی ہے۔
پاکستان میں کرونا سے 903 مریض صحت یاب بھی ہوئے ہیں۔ ملک میں وائرس سے اب تک نو لاکھ 91 ہزار 727 افراد متاثر ہو چکے ہیں۔
برطانیہ میں کرونا پابندیاں ختم
برطانیہ کی حکومت نے پیر کو ایک سال سے زائد عرصے سے عائد کرونا پابندیوں کو ختم کرنے کا اعلان کیا ہے۔
خبر رساں ادارے ’رائٹرز‘ کے مطابق برطانیہ کے وزیر اعظم بورس جانسن نے شہریوں پر زور دیا ہے کہ وہ احتیاط برتیں اور ویکسین لگوانے پر اعتماد رکھیں۔
بورس جانسن نے کہا کہ یہ صحیح لمحہ ہے لیکن ہمیں یہ محتاط انداز میں کرنا ہے۔ ہمیں یہ یاد رکھنا ہوگا کہ وائرس اب بھی موجود ہے۔
اے ایف پی کے مطابق برطانیہ میں نائٹ کلبس، انڈور مقامات کو مکمل گنجائش کے ساتھ کھولنے جب کہ ماسک پہننے اور گھروں سے کام کرنے والے قانونی احکامات کو ختم کر دیا گیا ہے۔
جان ہاپکنز یونی ورسٹی کے اعداد و شمار کے مطابق برطانیہ کرونا سے سب سے زیادہ اموات ہونے والے ممالک کی فہرست میں ساتویں نمبر پر ہے۔
برطانیہ میں اب تک کرونا سے ایک لاکھ 28 ہزار 708 افراد جان کی بازی ہار چکے ہیں جب کہ ملک میں وائرس سے متاثرہ افراد کی مجموعی تعداد پانچ لاکھ 45 ہزار سے زائد ہے۔
بھارت: تین ماہ بعد کم ترین اموات رپورٹ
بھارت میں تین ماہ بعد کرونا سے کم ترین اموات رپورٹ ہوئی ہیں۔
بھارت کے وزارت صحت کی جانب سے جاری اعداد و شمار کے مطابق ملک میں گزشتہ 24 گھنٹوں کے دوران 499 افراد ہلاک ہوئے ہیں۔
اعداد و شمار کے مطابق ملک میں مزید 38 ہزار 164 افراد میں وائرس کی تشخیص ہوئی ہے جب کہ 24 گھنٹوں میں 38 ہزار 660 افراد صحت یاب بھی ہوئے ہیں۔
بھارت میں کرونا وائرس سے اب تک تین کروڑ 11 لاکھ 44 ہزار سے زائد افراد متاثر اور چار لاکھ 14 ہزار 108 افراد ہلاک ہو چکے ہیں۔