روسی افواج یوکرین میں 'وحشیانہ' طریقے استعمال کر رہی ہے: امریکی وزیرِ خارجہ
امریکی وزیرِ خارجہ اینٹنی بلنکن نے کہا ہے کہ روسی افواج یوکرین جنگ میں 'وحشیانہ' طریقے استعمال کر رہی ہے اور مسلسل عام آبادی کو نشانہ بنایا جا رہا ہے۔
امریکی وزیرِ خارجہ کا یہ بیان روس افواج کی جانب سے یوکرین میں یورپ کے سب سے بڑے جوہری پلانٹ پر حملے کے بعد سامنے آیا ہے۔
جمعے کو برسلز میں یورپی یونین کے وزرائے خارجہ سے ملاقات سے قبل رپورٹرز سے گفتگو کرتے ہوئے بلنکن کا کہنا تھا کہ "ہم سب کو پوٹن کی پسند کی جنگ کا سامنا ہے، جو بلااشتعال، بلاجواز اور ایسی جنگ ہے جس کے خوفناک نتائج برآمد ہوں گے۔"
اُن کا کہنا تھا کہ ہم وہ سب کچھ کریں گے جس سے اس جنگ کو روکا جا سکے۔ تاہم امریکی وزیرِ خارجہ نے یوکرین پر نو فلائی زون نافذ کرنے کے امکان کو رد کرتے ہوئے کہا کہ اس اقدام سے جنگ یوکرین کی سرحدوں سے نکل کر پورے یورپ میں پھیل سکتی ہے۔
خیال رہے کہ نو فلائی زون کے ذریعے کسی ملک کی فضائی حدود میں خاص قسم کے طیارے پرواز نہیں کر سکتے۔ اس کا مقصد اہم تنصیبات کا تحفظ کرنا ہوتا ہے۔ اگر کوئی اس کی خلاف ورزی کرتا ہے تو دُشمن کے طیاروں کو مار گرایا جاتا ہے۔
یوکرین پر روس کا حملہ: تفتیش کے لیے انسانی حقوق کونسل کا کمیشن تشکیل دینے کا اعلان
اقوام متحدہ کی انسانی حقوق کی کونسل نے یوکرین پر روس کے حملے کی چھان بین کے لیے ایک کمیشن تشکیل دینے کا اعلان کیا ہے۔
یہ بات منظور کی گئی ایک قرار داد میں کہی گئی ہے، جس سے قبل جمعے کو عالمی ادارے کی انسانی حقوق کی کونسل میں رکن ممالک نے یوکرین کے خلاف روسی جارحیت پر تقاریر کیں۔
قرارداد کے حق میں 32، مخالفت میں دو (روس اور اریٹریا)، جب کہ 13 ارکان نے رائے شماری میں حصہ نہیں لیا۔
جوہری تنصیب پر روس کا حملہ اور قبضہ: ''ناقابل قبول اور غیر ذمہ دارانہ طرز عمل'' قرار
یوکرین میں 'زپورزیا' کی جوہری تنصیب پر روس کے حملے اور قبضے کے معاملے کو زیر غور لانے کے لیے اقوام متحدہ کی سلامتی کونسل کا ہنگامی اجلاس جاری ہے۔
عالمی ادارے کی سیاسی اور امن امور سے متعلق معاون سیکریٹری جنرل، روزمیری دی کارلو نے کہا ہے کہ ''نیوکلیئر تنصیبات اور دیگر اہم زیریں ڈھانچے کے گرد و نواح میں عسکری نوعیت کی کارروائیاں نہ صرف قابل قبول نہیں، بلکہ انتہائی غیر ذمہ دارانہ طرز عمل ہے''۔
اپنے کلمات میں اقوام متحدہ میں امریکہ کی مستقل مندوب، لِنڈا گرین فیلڈ نے روس پر زور دیا ہے کہ آئندہ نیوکلیئر پاور پلانٹ پر حملے کے ارتکاب کی حرکات سے اجتناب کیا جائے۔
ادھر، ایک ٹوئیٹ میں وائس آف امریکہ کی نمائندہ، مارگریٹ بشیر نے بین الاقوامی جوہری توانائی کے ادارے کے سربراہ کے حوالے سے اپنی رپورٹ میں بتایا ہے کہ اس بات کی تصدیق کی گئی ہے کہ روسی حملے کے باوجود جوہری تنصیب محفوظ ہے۔
'روسی سامعین و ناظرین کو ''حقیقت پر مبنی خبروں کے مواد'' تک رسائی دی جانی چاہیے'
وائس آف امریکہ نے جمعے کو روس کی حکومت کی جانب سے وائس آف امریکہ کی روسی زبان کی نیوز سائٹ کو ملک میں رسائی نہ دینے کے اقدام کا جواب دیا ہے۔
بیان میں وائس آف امریکہ کی قائم مقام ڈائریکٹر، یولنڈا لوپیز نے کہا ہے کہ روس کے سامعین و ناظرین کو ''حقیقت پر مبنی خبروں کے مواد'' تک رسائی ملنی چاہیے۔
انھوں نے کہا کہ وائس آف امریکہ وہ طریقہ کار اختیار کرنے کا حامی ہے جس کے ذریعے خبروں کو بلاک کرنے کی روس کی کوششوں کو نظرانداز کیا جا سکے۔
روس نے انتباہ جاری کیا ہے کہ اگر وائس آف امریکہ اپنی خبروں کا شائع مواد ہٹا نہیں دیتا تو وہ روس تک اس کی رسائی بلاک کر دیں گے، جس مواد میں یوکرین پر روسی جارحیت کے بارے میں اطلاعات دی گئی ہیں۔