یوکرین کے لیے آنے والے دن 'بھیانک' ہو سکتے ہیں: امریکی خفیہ اداروں کا انتباہ
امریکی خفیہ اداروں نے اس خدشے کا اظہار کیا ہے کہ روسی جارحیت کے باعث یوکرین کے لیے آنے والے دن 'بھیانک' ہو سکتے ہیں۔
امریکی انٹیلی جنس حکام کا کہنا ہے کہ روس پر عائد کی گئی عالمی پابندیوں اور یوکرین میں مطلوبہ نتائج کے حصول میں تاحال ناکامی سے صدر پوٹن کیف کے خلاف جنگ میں طاقت کا اندھا دھند استعمال کر سکتے ہیں۔
سالانہ تھریٹ اسسمنٹ رپورٹ پر منگل کو کانگریس میں سماعت ہوئی جس میں امریکی انٹیلی جنس افسران نے اپنے خیالات کا اظہار کیا۔
انٹیلی جنس حکام نے خبردار کیا کہ روسی حملے کے خلاف شدید اور مؤثر مزاحمت کے باوجود یوکرین کے شہریوں کو مشکلات کا سامنا کرنا پڑے گا۔
یوکرین میں پھنسے 232 پاکستانی پی آئی اے کی پرواز سے وطن واپس پہنچ گئے
یوکرین میں پھنسے ہوئے پاکستانیوں کو وطن واپس لانے کے لیے پاکستان انٹرنیشنل ایئر لائنز (پی آئی اے) نے خصوصی آپریشن شروع کیا ہے۔ پی آئی اے کی پہلی پرواز 232 پاکستانیوں کو پولینڈ سے لے کر وطن واپس پہنچ گئی۔ واپس آنے والے طالب علموں نے وائس آف امریکہ کے عاصم علی رانا کو بتایا کہ یوکرین میں حالات انتہائی کشیدہ تھے اور وہاں موجود پاکستانی طالب علموں کو شدید مشکلات کا سامنا کرنا پڑا۔
امریکی ایوانِ نمائندگان میں یوکرین کی امداد کے لیے 13 ارب 60 کروڑ ڈالر کے بل کی منظوری
امریکہ کے ایوانِ نمائندگان نے یوکرین کی امداد کے لیے 13 ارب 60 کروڑ ڈالر مالیت کے بل کی منظوری دے دی ہے۔
اس بل میں شامل ساڑھے چھ ارب ڈالر دفاع پر خرچ ہوں گے جس میں خطے میں امریکی افواج کی تعیناتی اور یوکرین کو دفاعی سامان کا عطیہ شامل ہے۔
اس کے علاوہ بل میں چار ارب ڈالر یوکرین کے مہاجرین کو ہنگامی بنیاد پر خوراک کی فراہمی کے لیے مختص کیے گئے ہیں جب کہ یوکرین کی معاشی امداد کے لیے ایک ارب 80 کروڑ ڈالر رکھے گئے ہیں۔
یوکرین کے صدر اپنے ملک کے دفاع کے لیے پرعزم ہیں: پیلوسی
امریکہ میں ایوانِ نمائندگان کی اسپیکر نینسی پیلوسی کے مطابق انہوں نے یوکرین کے صدر ولودومیر زیلنسکی سے رابطہ کیا ہے اور وہ اپنے ملک کے دفاع کے لیے پرعزم ہیں۔
پیلوسی نے جمعرات کو اپنے ایک ٹوئٹ میں بتایا کہ انہوں نے یوکرین کے صدر سے مختلف امور پر تبادلہ خیال کیا جس میں پوٹن کی جانب سے اسپتال پر ہونے والے حملے میں نومولود، بچوں اور ماؤں کا قتل شامل ہے۔ ان کے بقول امریکہ یوکرین کے لیے حمایت جاری رکھے ہوئے ہے۔