افغانستان سے لگ بھگ 1100 امریکی شہری نکال لیے: وائٹ ہاؤس
وائٹ ہاؤس نے بتایا ہے کہ امریکہ کی فوجی پروازوں کے ذریعے افغانستان سے 1100 کے قریب ایسے افراد اور ان کے خاندانوں کو نکال لیا ہے جو امریکہ کی مستقل سکونت رکھتے ہیں۔
وائٹ ہاؤس کے مطابق شہریوں کے انخلا کے لیے 12 سی سیونٹین اور ایک سی ون تھرٹی طیارہ استعمال کیا گیا۔
وائٹ ہاؤس کا مزید بتانا ہے کہ شہریوں کے انخلا کی رفتار اور تعداد میں اضافہ ہو سکتا ہے۔ اب تک کل 3200 افراد کو افغانستان سے باہر لایا گیا ہے اور ان میں 2000 کے قریب ایسے افغان شہری ہیں جو اسپیل امیگرنٹ ویزا پر ہیں جنہیں امریکہ میں آباد کیا گیا ہے۔
دوسروں پر الزام لگانے کے بجائے اپنے شہریوں کے انخلا پر توجہ ہونی چاہیے: سینیٹر ٹیڈ کروز
امریکی سینیٹ میں خارجہ تعلقات کی کمیٹی کے رکن اور ریاست ٹیکساس سے ری پبلکن رہنما ٹیڈ کروز نے امریکیوں کی افغانستان سے بحفاظت واپسی کے ان کے بقول واضح منصوبہ نہ ہونے پر تنقیدی بیان جاری کیا ہے۔
انہوں نے کہا کہ صدر بائیڈن کی انتظامیہ اس بات کی تصدیق نہیں کر سکی کہ انہوں نے تمام امریکیوں کو افغانستان سے نکالنے یا 31 اگست کے بعد بھی انخلا جاری رکھنے کا پروگرام بنا لیا ہے۔ یہ چیز ان کے بقول مکمل طور پر ناقابل قبول ہے۔
ان کا کہنا تھا کہ صدر بائیڈن اور ان کے مشیروں کو دوسروں پر انگلیاں اٹھانا اور دوسروں کو الزام دینا بند کر دینا چاہیے اور اپنے شہریوں کو افغانستان سے نکالنے پر توجہ دینی چاہیے۔
سینیٹر ٹیڈ کروز کے بقول، "کانگریس کے بہت سے دیگر اراکین اور میں نے اپنے اسٹاف اور وسائل کو منظم کیا ہے کہ ہم اپنے لوگوں اور ان کے خاندانوں اور دیگر ایسے افراد کو افغانستان سے نکالنے میں ہر طرح کی مدد کر سکیں جو وہاں سے نکلنے کی کوششیں کر رہے ہیں۔
انہوں نے مزید کہا کہ صدر بائیڈن کے پاس پہلے سے کوئی منصوبہ ہونا چاہیے تھا اور اب انہیں چاہیے کہ امریکی عوام کو یقین دہانی کرائیں کہ ان کی پوری انتظامیہ امریکی شہریوں کے انخلا کے کسی منصوبے پر فوری طور پر عمل درآمد کرنے پر کام کر رہی ہے۔
کابل سے انخلا کے آپریشن میں تیزی
افغانستان سے غیرملکی شہریوں اور افغان باشندوں کے انخلا کا عمل جاری ہے جس میں مزید تیزی آ گئی ہے۔
خبر رساں ادارے رائٹرز کے مطابق مغربی سیکیورٹی حکام نے بتایا ہے کہ 2200 سے زیادہ سفارتی عملے کے علاوہ دیگر عام شہری افغانستان سے بذریعہ ملٹری فلائٹس روانہ ہو چکے ہیں۔
ویسٹرن سیکیورٹی آفیشل کا کہنا ہے کہ شہریوں کے انخلا میں عمل میں تیزی آئی ہے اور اب تک سفارتی عملے کے علاوہ ان افغان شہریوں کو بیرونِ ملک منتقل کیا جا چکا ہے جنہوں نے دو دہائیوں کے دوران غیر ملکی سفارت خانوں کے لیے خدمات انجام دی تھیں۔
انہوں نے کہا کہ یہ اب تک واضح نہیں ہے کہ عام شہریوں کے لیے پروازوں کا آغاز کب سے ہو گا۔
امریکہ کی طویل ترین جنگ کا اختتام ایسے کیوں ہوا؟
افغانستان سے متعلق امریکی حکمتِ عملی پر بحث جاری ہے۔ پاکستان کے لیے سابق امریکی سفیر کیمرون منٹر نے وی او اے کی مونا کاظم شاہ سے گفتگو میں کہا کہ امریکی حکام کو افغانستان میں بیس سال کے دوران کبھی اتنے تسلسل سے کام کرنے کا موقع ہی نہیں ملا کہ وہ مقامی سطح پر گہرے روابط قائم کر پاتے۔
