معدنی ایندھن کا بڑھتا ہوا استعمال مزید لوگوں کو بیمار کر رہا ہے، عالمی ادارہ صحت
ڈاکٹروں اور صحت کے دوسرے ماہرین کا کہنا ہے کہ معدنی ایندھن کے استعمال کی عادت دنیا کو مزید بیمار اور لوگوں کو ہلاک کر رہی ہے ۔
منگل کے روز کے طبی جریدے لینسیٹ میں شائع ہونے والی ایک رپورٹ میں کہا گیا ہے کہ آب وہوا کی تبدیلی کی وجہ سے پیدا ہونے والے شدید موسم نے لگ بھگ 100 ملین لوگوں کو بھوک میں مبتلا کر دیا ہے ۔
رپورٹ میں یہ بھی کہا گیا ہے کہ کمزور گروپس میں 68 فیصد لوگ گرمی کی وجہ سے ہلاک ہو جاتے ہیں اور ہر سال کوئلے ، تیل اور قدرتی گیس جلانے سے پیدا ہونے والی آلودگی سے دنیا بھر میں 12 لاکھ لوگ لقمہ اجل بن جاتے ہیں۔
لینسیٹ کی رپور ٹ میں صحت کے 43 مختلف اشاریوں کا جائزہ لیا گیا ہے ۔
رپورٹ کے مصنفین کا کہنا ہے کہ گلوبل وارمنگ کی وجہ سے صحت کے عالمی مسائل بد تر شکل اختیار کر رہے ہیں۔
ناک کے ذریعے دیے جانے والی اسپرے ویکسین کا استعمال شروع ہو گیا
چین کے شہر شنگھائی نے بدھ کے روز سے کویڈ* 19 کی ناک کے ذریعے لی جانےوالی ویکسین کی فراہمی شروع کر دی ہے جو دنیا میں بظاہر ایسی پہلی ویکسین ہے۔
شہر کے ایک سرکاری سوشل میڈیا اکاونٹ پر پوسٹ کیے گئے ایک اعلان کے مطابق اسپرے کے ذریعے منہ کےراستے دی جانے والی اس ویکسین کو پہلے سے ویکسین شدہ لوگوں کو ایک بوسٹر ڈوز کے طور پر فری دیا جا رہا ہے۔
سوئی کے بغیر دی جانے والی ویکسینز ان لوگوں کوویکسین کی جانب راغب کر سکتی ہے جوٹیکے لگوانا پسند نہیں کرتے ، جب کہ یہ غریب ملکوں میں ویکسی نیشن کی توسیع میں بھی مدد گار ہو سکتی ہیں کیوں کہ ان کا انتظام کرنا زیادہ آسان ہوتا ہے ۔
چین کے پاس ویکسین کا عالمی اجازت نامہ نہیں ہے لیکن وہ چاہتا ہے کہ زیادہ سے زیادہ لوگ اس کے بوسٹر شاٹس لگوا لیں۔ اس سے قبل کوویڈ-19 کی سخت پابندیوں کے باعث چین کی معیشت متاثر ہو چکی ہے۔
سیمی کنڈیکٹر چپ کی درآمد میں کمی کے باعث چین کی چپ انڈسٹری کے خدشات میں اضافہ
جنوبی کوریا کی کمپیوٹر چپ ساز کمپنی ایس کے ہینکس نے کہا ہے کہ اگر امریکہ کی جانب سے چین کو سیمی کنڈکٹر ٹیکنالوجی اور مینوفیکچرنگ آلات کی برآمدات پر کریک ڈاؤن میں اضافہ ہوا تو وہ چین میں اپنے مینیوفیکچرنگ آپریشنز فروخت کرنے پر مجبور ہوسکتا ہے۔
ایس کے ہینکس کے چیف مارکیٹنگ آفیسر کیون نوہ نے بدھ کو اس کے بعد ایک کانفرنس کال کے دوران ان خدشات کا اظہار کیا جب کمپنی نے بتایا کہ اس کا آپریٹنگ منافع گزشتہ سال کے مقابلے میں آخری سہ ماہی میں 60 فیصد کم ہوا ہے۔
اس نے کاروبار کے بگڑتے ہوئے ماحول کو اس کمی کا ذمہ دار ٹھہرایا۔
یوکرین کے خلاف روس کی جنگ سے عالمی افراط زر میں اضافے اور بڑھتی ہوئی قیمتوں کا مقابلہ کرنے کے لیے مرکزی بینکوں کی طرف سے عائد سود کی بڑھتی ہوئی شرحوں اور صارفین کی مانگ میں کمی کے باعثان ہائی ٹٰک مصنوعات کی طلب میں کمی ہوئی ہے جن میں کمپیوٹر چپ استعمال ہوتی ہے ۔
ی فرانسیسی صدر ایمانویل اور جرمن چانسلر شلز کے درمیان ملاقات. یورپی یونین کے معاملات پر گفتگو متوقع
فرانسیسی صدرایمانویل میکراں بدھ کے روز جرمن چانسلر اولاف شلز کے ساتھ پیرس میں ملاقات کر رہے ہیں جب کہ یورپی یونین کی اسٹریٹیجی ، دفاع اور اقتصادی پالیسیوں پر دونوں پڑوسی ملکوں اور یورپی یونین کے اتحادیوں کے درمیان اختلافات جاری ہیں ۔
میکراں اور شلز بدھ کے رو ز صدارتی محل میں ایک ورکنگ لنچ کریں گے ۔
ابتدا میں اس دن فرانس اور جرمنی کی ایک مشترکہ کابینہ میٹنگ ہونا تھی لیکن اسے جنوری کے لئے ملتوی کر دیا گیا ہے ۔
پیرس اور برلن دونوں یہ کہہ رہے ہیں کہ انہیں ابھی کچھ دو طرفہ مسائل پر اتفاق رائے پیدا کرنے کے لیے کام کرنا ہے ۔
فرانس اور جرمنی کے درمیان اختلافات غیر معمولی بات نہیں ہے جو دونوں ہی یورو زون کی سب سے بڑی معیشتیں ہیں اور دفاع اور توانائی سمیت متعدد موضوعات پر مختلف موقف رکھتی ہیں ۔