90 فی صد چینی نوجوان چین کو امریکہ اور مغرب سے برتر یا برابر سمجھتے ہیں

چین کےسرکاری میڈیا کے ایک ادارے کی جانب سے کرائے گئے ایک سروے سے پتا چلا ہے کہ ملک کے 90 فیصد نوجوان مغرب اور امریکہ کو چین کے برابر سمجھتے ہیں یا انہیں کمتر ہی سمجھتے ہیں ۔

کمیونسٹ پارٹی سے منسلک گلوبل ٹائمز کی جانب سے 100 سے زائد شہروں میں 14 سے 35 سال کی عمر کے 1,655 افراد کے سروے سے یہ بھی ظاہر ہوا ہے نوجوان پہلے سے زیادہ پر اعتماد ہو گئے ہیں۔

سروے اور اس سے منسلک خبر میں یہ بھی کہا گیا ہے کہ بیجنگ کی جانب سے سوشل سیکیورٹی ، تاریخ اور کلچر جیسے شعبوں کی بہتری نے بھی نوجوانوں کے ان رویوں میں ایک کردار ادا کیا ہے ۔

جائزے کے نتائج حالیہ سماجی تبدیلیوں کے برعکس ہیں جیسے کہ شرح پیدائش میں کمی اور سماجی نقل و حرکت کی کمی کی وجہ سے نوجوانوں میں اتنی مایوسی کہ وہ شادی کرنے، بچے پیدا کرنے، گھر یا کار خریدنے سے گریز کر رہے ہیں اور صرف اور صرف پیسہ کمانے کی دوڑ میں مصروف ہیں ۔

عراقی کابینہ نے محمد شیعہ ال سوڈانی کی قیادت میں نئی حکومت کی منظوری دے دی

عراقی پارلیمنٹ نے جمعرات کو ایک نئی حکومت کی منظوری دے کر ایک سال سے زیادہ عرصے سے جاری تعطل کو ختم کردیا ہے لیکن اسے ابھی تک بہت سے چیلنجوں کا سامنا ہے ۔

52 سالہ وزیر اعظم محمد شیعہ ال سوڈانی ، جو اس سےپیشتر عراق کے انسانی حقوق کے امور اور محنت اور سماجی امور کے وزیر کے طور پر خدمات انجام دے چکے ہیں ، اگلی حکومت کی قیادت کریں گے ۔

سوڈانی نے ووٹنگ سے قبل ایک تقریر میں دوسرے امور کے علاوہ معیشت کی اصلاح ، بدعنوانی کے سد باب، انحطاط پذیر پبلک سروسز کو بہتر بنانے ، غربت اور بے روزگاری کے مقابلے کا عزم ظاہر کیا ۔

انہوں نے تین ماہ کے اندر انتخابی قانون میں ترمیم اور ایک سال کے اندر جلد پارلیمانی انتخابات کے انعقاد کا وعدہ بھی کیا ۔

جمعرات کو پارلیمنٹ کی ووٹنگ اس انتخاب کے ایک سال بعد ہوئی ہے جس میں شیعہ عالم مقتدی الصدر سب سے بڑے فاتح تھے لیکن جو ایک حکومت کی تشکیل کے لئے حمایت حاصل کرنے میں ناکام ہو گئے تھے ۔

ڈرٹی بم کے روسی الزامات: جوہری توانائی کا عالمی ادارہ یوکرین کی جوہری تنصیات کا معانئہ کرے گا

انٹرنیشنل اٹامک انرجی ایجنسی ’آئی اے ای اے‘ کے ڈائریکٹر جنرل رافیل گروسی نے جمعرات کو کہا کہ معائنہ کاروں کو یوکرین کی دو تنصیبات پر چند دنوں میں پہنچ کر کام کرنا شروع کر دینا چاہیے جن کے بارے میں روس نے الزام لگایا ہے کہ وہاں جوہری مواد کو ڈرٹی بم بنانے کی جانب منتقل کیا جا رہا ہے۔

گروسی نے نیویارک میں اقوام متحدہ میں صحافیوں کو بتایا کہ، میں نے اس بارے میں یوکرینی وزیر خارجہ دمیتروکولیبا کے ساتھ ٹھوس بات چیت کی۔ وہ اس نتیجے پر پہنچے، اور میں نے اتفاق کیا کہ کسی کا بھی شک کو دور کرنے کا بہترین طریقہ یہ ہے کہ انسپکٹرز کو جوہری تنصیبات کے اندر جانے کی اجازت دی جائے۔

انہوں نے کہا کہ ’آئی اے ای اے‘ کے انسپکٹرز یہ دیکھنے کی کوشش کریں گے کہ آیا تنصیبات پر ایندھن کو کسی طرح سے دو بارہ پراسس کیا گیا ہے تاکہ اس میں سے دو اجزا سیزیم اور سٹرونٹیم حاصل کیے جائیں جو تابکاری بم بنانے میں استعمال ہوتے ہیں ۔

گروسی نے کہا کہ انسپکٹر چند روز میں اپنا نتیجہ اخذ کر سکیں گے۔

یورپ میں توانائی کا بحران : لکڑی کی مانگ اور قیمتوں میں اضافہ

یوکرین کے خلاف روس کی جنگ کے دورا ن روس کی جانب سے قدرتی گیس کی ترسیل میں کمی کے باعث یورپ میں پیدا ہونےوالے توانائی کے بحران نے کچھ لوگوں کو موسم سرد تر ہونے پر گرم رہنے کے لئے سستے ذرائع مثلاً جلانے کی لکڑیوں کا رخ کرنے پر مجبور کر رہا ہے ۔ مالڈووا اور کوسوو جیسے غریب ملکوں کے ساتھ ساتھ مغربی اور وسطی یورپ کے امیر ملکوں میں بھی لکڑی کی مانگ بڑھ رہی ہے۔ لوگ جتنا زیادہ ان کا ذخیرہ کر رہے ہیں اور جلا رہے ہیں اتنا ہی ان کی قیمتوں میں اضافہ ہور ہا ہے اور ان کی قلتوں اور چوریوں کی رپورٹس مل رہی ہیں جب کہ فراڈ کے واقعات بھی پیش آرہے ہیں۔ اور لکڑیوں کے جلانے اور درختوں کی کٹائی میں اضافے سے ماحولیات کی آلودگی میں اضافے کے بارے میں خدشات بھی بڑھ رہے ہیں۔